ឯកឧត្តមទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូនបានលើក​ឡើងថា ការ​តាំង​ពិព័រណ៍​យានយន្តអគ្គិសនី និងសម្ពោធដាក់ឱ្យប្រើប្រាស់ស្ថានីយ​បញ្ចូល​ថាមពល​សម្រាប់​យាន​យន្តអគ្គិសនីនេះ នឹងជួយជំរុញឱ្យមានការចូលរួមអភិវឌ្ឍន៍ និងលើក​កម្ពស់ការប្រើប្រាស់​យានយន្តអគ្គិសនី​នៅកម្ពុជា ដើម្បីចូលរួមជាមួយរាជរដ្ឋាភិបាល ក៏ដូចជា​ពិភពលោក ក្នុងការ​កាត់បន្ថយ​ការបំភាយឧស្ម័នកាបូនឌីអុកស៊ីត (CO2) ចេញពីវិស័យ​យាន​យន្ត ដែលជាផ្នែក​មួយ​នៃការ​កើនឡើងនូវឧស្ម័នផ្ទះកញ្ចក់ (GHG)បណ្តាលឱ្យមានការឡើង​កំដៅផែនដី បម្រែ​បម្រួល​អាកាស​ធាតុ ការធ្លាក់ចុះនូវគុណភាពខ្យល់ និងការបំពុលបរិស្ថាន។ ការលើកឡើងរបស់ឯកឧត្ដមទេសរដ្ឋមន្រ្ដីនេះ ក្នុងពិធីតាំងពិព័រណ៍យានយន្តអគ្គិសនី និង​សម្ពោធដាក់ឱ្យប្រើ​ប្រាស់​ស្ថានីយបញ្ចូលថាមពល សម្រាប់យានយន្តអគ្គិសនី ដោយមាន​ការអញ្ជើញចូលរួមពីថ្នាក់ដឹកនាំក្រសួង មន្ត្រីរាជការ ឯកអគ្គរាជទូត ឯកអគ្គរដ្ឋទូត​នៃបណ្តា​ប្រទេសជាមិត្តប្រចាំព្រះរាជា ណាចក្រកម្ពុជា តំណាងកម្មវិធីអភិវឌ្ឍន៍​អង្គការសហប្រជាជាតិ (UNDP) តំណាង Energy Lab តំណាង SMMR/GIZ តំណាងក្រសួង-ស្ថាប័នពាក់ព័ន្ធ តំណាង​សហព័ន្ធសមាគមយានយន្តនៅកម្ពុជា វិស័យឯកជន និងក្រុមហ៊ុនយានយន្ត​អគ្គិសនី​ចំនួន១២ នាព្រឹកថ្ងៃទី២៦ ខែមីនា ឆ្នាំ២០២២ នៅទីស្តីការក្រសួងសាធារណការ និងដឹកជញ្ជូន។ ឯកឧត្តមទេសរដ្ឋមន្ត្រី ស៊ុន ចាន់ថុល បានគូសបញ្ជាក់ថា ក្រសួងបានទទួលជំនួយ​ពី​អង្គការ UNDP នូវឧបករណ៍បញ្ចូលថាមពលយានយន្តអគ្គិសនីចំនួន០៤គ្រឿង ហើយក្រុម​ហ៊ុន​ឯកជន​ដែលជាដៃគូ បានសន្យាគាំទ្រលើការជំរុញការប្រើប្រាស់​យានយន្តអគ្គិសនី​នៅ​កម្ពុជា ដោយ​ជំហានដំបូងសន្យាផ្តល់ឧបករណ៍បញ្ចូលថាមពលយាន​យន្តអគ្គិសនីចំនួន​១០​គ្រឿង។ ឯកឧត្តមទេសរដ្ឋមន្ត្រីបានថ្លែងអំណរគុណយ៉ាងជ្រាលជ្រៅដល់អង្គការ UNDP, EnergyLab និងអង្គការ SMMR/GIZ ផ្នែកឯកជន និងដៃគូអភិវឌ្ឍន៍ពាក់ព័ន្ធនានា ដែលបាន​ជួយគាំទ្រនូវសកម្មភាពលើការអភិវឌ្ឍ និងលើកកម្ពស់ការប្រើប្រាស់​យានយន្តអគ្គិសនីនៅ​កម្ពុជា តាមរយៈការជួបពិភាក្សា និងការរៀបចំសិក្ខាសាលាជាបន្តបន្ទាប់កន្លងមក និងបាន​សំណូមពរដល់ស្ថាប័នពាក់ព័ន្ធទាំងអស់យកចិត្តទុកដាក់សហការគ្នាឱ្យកាន់តែប្រសើរថែមទៀតដើម្បីអភិវឌ្ឍន៍ និងលើកកម្ពស់វិស័យយានយន្តអគ្គិសនីនៅកម្ពុជា ។ ឯកឧត្តមទេសរដ្ឋមន្ត្រីបានគូសបញ្ជាក់ពីសមត្ថកិច្ចរបស់ក្រសួងសាធារណការ និងដឹក​ជញ្ជូនក្នុងការគ្រប់គ្រង និងអភិវឌ្ឍវិស័យដឹកជញ្ជូន ដឹកនាំការងាររៀបចំ និងអនុវត្តន៍គោល​នយោបាយ ផែនការយុទ្ធសាស្ត្រ និងវិធានការចាំបាច់នានាដើម្បីឈានទៅ សម្រេចបាននូវ​ការប្រើប្រាស់រថយន្តអគ្គិសនីក្នុងអត្រា៤០ភាគរយ និងទោចក្រយានយន្ត(ម៉ូតូ) អគ្គិសនីក្នុង​អត្រា​៧០ភាគរយ នៅឆ្នាំ២០៥០ ស្របតាមការកំណត់ទិសដៅជាក់លាក់​ដែល​មាន​ចែងនៅ​ក្នុង​របាយការណ៍បច្ចុប្បន្នភាពនៃការរួមចំណែករបស់ជាតិ និងយុទ្ធសាស្រ្ត​អភិវឌ្ឍន៍​រយៈ​ពេល​វែងសំដៅ សម្រេចបានអត្រាកាបូនសូន្យនៅឆ្នាំ២០៥០នៅកម្ពុជា (Long-term Strategy for Carbon Neutrality 2050) និងនិន្នាការនៃការប្រើប្រាស់យានយន្តអគ្គិសនី​របស់ពិភពលោក តំបន់ ក៏ដូចជាកម្ពុជាផងដែរ។ ឯកឧត្តមទេសរដ្ឋមន្ត្រីបានបន្ថែមថា៖ ដើម្បីសម្រេចបាន​គោល​ដៅនេះ ទាមទារឱ្យមានការចូលរួមពី ក្រសួង-សា្ថប័ន និងភាគី​ពាក់ព័ន្ធ​ទាំងអស់ ដើម្បីរៀបចំ និងអនុវត្តន៍គោលនយោបាយ ផែនការយុទ្ធសាស្ត្រ និងវិធានការនានាប្រកបដោយ​ប្រសិទ្ធ​ភាព និងប្រសិទ្ធផល ជំរុញការគាំទ្រ និងការលើក​ទឹកចិត្តដល់ការអភិវឌ្ឍ និងការប្រើប្រាស់​យាន​យន្តអគ្គិសនី ដោយផ្តោតទៅលើយុទ្ធ​សាស្ត្រ​ទាក់ទាញឱ្យមានកំណើននៃការប្រើប្រាស់​យានយន្តអគ្គិសនី កំណើននៃការបង្កើតស្ថានីយ​បញ្ចូលថាមពលយានយន្ត អគ្គីសនី និងការ​គ្រប់​គ្រង ការកែច្នៃ និងការបោះបង់សំណល់​អាគុយប្រកបដោយសុវត្ថិភាព។ សូមជម្រាបជូនថា ការតាំងពិព័រណ៍នេះបានរៀបចំឡើងដោយក្រសួងសាធារណការ និងដឹកជញ្ជូន សហការជាមួយអង្គការ UNDP, Energy Lab និង SMMR/GIZ ដើម្បីបើក​ឡើង​ទំព័រប្រវត្តិសាស្រ្តថ្មីមួយរបស់កម្ពុជា ក្នុងគោលបំណងបញ្ជ្រាបការយល់ដឹងដល់សាធារណជន អំពីបច្ចេកវិទ្យា ឧបករណ៍ បរិក្ខារ និងអត្ថប្រយោជន៍នានា នៃយានយន្តអគ្គិសនីសំដៅលើក​កម្ពស់ការប្រើប្រាស់យានយន្តអគ្គិសនីនៅកម្ពុជាឱ្យកាន់តែទូលំទូលាយថែមទៀត។ តាមរបាយការណ៍របស់ឯកឧត្តម ឈួន វ៉ន់ អគ្គនាយកនៃអគ្គនាយកដ្ឋាន​ដឹក​ជញ្ជូន​ផ្លូវគោក ក្រសួងសាធារណការ និងដឹកជញ្ជូនបានគូសបញ្ជាក់ថា ចំនួនយានយន្ត​អគ្គិសនី​ដែល​បានចុះបញ្ជីមានចំនួនតែ០២គ្រឿងប៉ុណ្ណោះ ក្នុងឆ្នាំ២០២០ និងចំនួន៦២គ្រឿង​នៅឆ្នាំ ២០២១។ ឯកឧត្ដមបន្ដថា នៅក្នុងរយៈពេលតែ៣ខែ​ប៉ុណ្ណោះពោលគឺ ពីខែមករា ដល់​ខែមីនា ឆ្នាំ២០២២នេះ ការចុះបញ្ជីយានយន្តអគ្គិសនីមានរហូតដល់៤៧គ្រឿង បើធៀបនឹង​ឆ្នាំ២០២១​ក្នុងរយៈពេលដូចគ្នា (ចំនួន០៧ គ្រឿងប៉ុណ្ណោះ) មានការកើនឡើង៦៧១ភាគរយ ដែលនេះ​គឺជាកំណើននៃការប្រើប្រាស់យានយន្តអគ្គិសនីមួយគួរឱ្យកត់សម្គាល់។ យោងតាមក្រសួងសាធារណការ និងដឹកជញ្ជូនបានលើកឡើងថា ក្រសួងសហការជា​មួយក្រសួង ស្ថាប័នពាក់ព័ន្ធ និងដៃគូ អភិវឌ្ឍន៍នានា បាននិងកំពុងធ្វើការងារមួយ​ចំនួន​ពាក់​ព័ន្ធទៅនឹងការអភិវឌ្ឍ និងការលើក​កម្ពស់​ការប្រើ ប្រាស់យានយន្តអគ្គិសនីដូចជាការរៀបចំ​សេចក្តី​ព្រាង​គោលនយោបាយជាតិ​ស្តីពីអភិវឌ្ឍន៍វិស័យដឹក ជញ្ជូនផ្លូវគោកដែលមានបញ្ចូល​នូវ​ចំណុចស្តីពីការលើកទឹក​ចិត្តដល់​ការប្រើប្រាស់យានយន្តអគ្គិសនី ការលើកទឹកចិត្តឱ្យមាន​ការបង្គុំដំឡើង និងការផលិតយាន​យន្តអគ្គិសនីនៅកម្ពុជា ការចងក្រងឯកសារគតិយុត្តដើម្បី​គាំទ្រដល់ការអភិវឌ្ឍ​យានយន្ត​អគ្គិសនី ការកំណត់យកបទដ្ឋានបច្ចេកទេស និងការរៀបចំ ផែនទីបង្ហាញផ្លូវ​ក្នុងការរៀបចំ​ហេដ្ឋារចនាសម្ព័ន្ធគាំទ្រជាដើម។ ដើម្បីអនុវត្តន៍ការងារនេះ​កាន់​តែមានប្រសិទ្ធភាព វឌ្ឍនភាព និងអនុលោមតាមបទដ្ឋានអន្តរជាតិ និងផ្សព្វ ផ្សាយឱ្យបាន​ទូលំ​ទូលាយ ក្រសួងកំពុងស្វែករក​ជំនួយជាថវិកា និងបច្ចេកទេសពីដៃគូអភិវឌ្ឍន៍ និងពីវិស័យ​​ឯកជន ជាពិសេសស្វែងរកការ​គាំទ្រ និងចូលរួមសហការពីបណ្តាក្រសួង​ស្ថាប័នពាក់ព័ន្ធ​ដើម្បី​រួមគ្នា​អភិវឌ្ឍន៍វិស័យ​យានយន្ត​អគ្គិសនីនៅកម្ពុជា រួមទាំងពិធីពិព័រណ៍យានយន្តអគ្គិសនី​នាថ្ងៃ​នេះផងដែរ។ បើតាមអ្នកជំនាញបានឱ្យដឹងថា ការបំភាយឧស្ម័នកាបូនឌីអុកស៊ីត(CO2) ចេញពីយាន​យន្តគឺជាកត្តាដ៏ចំបងមួយនៃការកើនឡើងនូវឧស្ម័នផ្ទះកញ្ចក់(GHG) ដែលនាំឱ្យផែនដីឡើង​កម្តៅ មានការប្រែប្រួលអាកាសធាតុ ការធ្លាក់ចុះនូវគុណភាពខ្យល់ និងការបំពុលបរិស្ថាន​ពិភពលោកទាំងមូល។ ឆ្លើយតបទៅនឹងបញ្ហាខាងលើ ប្រទេសនានានៅក្នុងពិភពលោក និង​តំបន់ បានផ្តោតការយកចិត្តទុកដាក់ទៅលើការប្រើប្រាស់យានយន្ត អគ្គិសនី ដែលមានការ​កើន​ឡើងជាលំដាប់ពីមួយថ្ងៃទៅមួយថ្ងៃ៕ដោយ រិទ្ធី ប្រភព៖ ក្រសួងសាធារណការ