ភ្នំពេញ៖ នាយករដ្ឋមន្រ្តីកម្ពុជា សម្តេចតេជោ ហ៊ុន សែន និងនាយករដ្ឋមន្ត្រីជប៉ុន លោក ស៊ីដា ហ្វូមីអូ បានបញ្ជាក់ពីគោលបំណងរួមគ្នាក្នុងការអភិវឌ្ឍកំពង់ផែស្វយ័តខេត្តព្រះសីហនុឲ្យទៅជាកំពង់ផែដែលមានសក្ដានុពលនៅក្នុងតំបន់ ពោលគឺនឹងជំរុញកំពង់ផែមួយនេះអោយទៅជាកំពង់ផែអន្តរជាតិធំមួយ។ ថ្លែងនៅក្នុងសន្និសីទសារព័ត៌មានរួមគ្នានៅយប់ថ្ងៃទី២០ ខែមីនា ឆ្នាំ២០២២នេះ សម្ដេចតេជោ ហ៊ុន សែន បានថ្លែងថា ទៅថ្ងៃអនាគតក្រោមការចូលរួមក្រោមការចូលរួមជួយពីប្រទេសជប៉ុនកំពង់ផែស្វយ័តខេត្តព្រះសីហនុនឹងក្លាយទៅជាកំពង់ផែដែលមិនត្រឹមតែមានសារៈសំខាន់ចំពោះកម្ពុជាប៉ុណ្ណោះទេក៏ប៉ុន្តែក៏ជាកំពង់ផែដ៏មានសារៈសំខាន់នៅក្នុងតំបន់ផងដែរ។ នេះគឺជាការព្រមព្រៀងគ្នាមួយ រវាងសម្ដេចតេជោ និងនាយករដ្ឋមន្ត្រីជប៉ុនដែលបានជួបពិភាក្សានៅក្នុងជំនួបជាង ២ម៉ោងនៅ ល្ងាចថ្ងៃទី២០ ខែមីនានេះ។ នាយករដ្ឋមន្ត្រីជប៉ុន លោក ស៊ីដា ហ្វូមីអូ បានបញ្ជាក់ក្នុងសន្និសីទកាសែតនាយប់នេះថា ប្រទេសកម្ពុជា ជាប្រទេសដែលពោរពេញទៅដោយសក្ដានុពល។ លោកមានជំនឿចិត្តទៅលើការរីកចម្រើននៃសេដ្ឋកិច្ចនៃប្រទេសនេះ និងបញ្ជាក់ថាជប៉ុននឹងគាំទ្រឲ្យកម្ពុជាសម្រេចបាននូវគោលដៅកែប្រែកំពង់ផែខេត្តព្រះសីហនុឲ្យទៅជាកំពង់ផែនៅក្នុងតំបន់មួយ។ កំពង់ផែស្វយ័តក្រុងព្រះសីហនុ (កសស) ត្រូវបានសាងសង់លើកដំបូងនៅឆ្នាំ១៩៥៦ ហើយចាប់ផ្ដើមបន្តប្រតិបត្តិការអាជីវកម្មជាថ្មីឡើងវិញក្រោយឆ្នាំ១៩៧៩។ ដើម្បី ធ្វើឲ្យ មាន លក្ខណៈ ងាយស្រួល និង មាន ប្រសិទ្ធភាព បន្ថែមទៀតនៅឆ្នាំ២០២២ ទីភ្នាក់ងារ សហប្រតិបត្តិ ការ អន្តរជាតិ ជប៉ុន (JICA) បានជួយរៀបចំនឹងកសាងចំណត ផែ កុងតេន័រ បន្ថែមទៀត។ បច្ចុប្បន្នកំពង់ផែក្រុងព្រះសីហនុគ្រោងនឹងពង្រីកផ្ទៃកំពង់ផែនៅចុងឆ្នាំ២០២២ខាងមុខ ដែលនឹងពង្រីកដល់ប្រវែង៣៥០ម៉ែត្រ និងដល់ជម្រៅទឹក ១៤ម៉ែត្រកន្លះ ដែលអនុញ្ញាតដល់កប៉ាល់ដែលមានសមត្ថភាពផ្ទុករហូតដល់ ៤០០០កុងតឺន័រអាចចូលកំពង់ផែបាន៕