Mc៖ ក្នុងរយៈពេលជាង៤ខែមកនេះ រថយន្តប្រមាណជាង១៥០គ្រឿង ត្រូវបានក្រសួងសាធារណការនិងដឹកជញ្ជូន រក្សាទុករយៈពេល១ឆ្នាំ មិនឱ្យបន្តអាជីវកម្មដឹកជញ្ជូននោះឡើយ ដោយសារតែពួកគាត់ល្មើសនឹងច្បាប់ ក្នុងការដឹកលើសទម្ងន់ដែលបានកំណត់ ដែលធ្វើឱ្យប៉ះពាល់ដល់ស្ថានភាពផ្លូវ។ អ្នកយកព័ត៌មានយើងធ្វើសេចក្តីរាយការណ៍បន្ថែម….. ឯកឧត្តម គឹម សាន់ អនុរដ្ឋលេខាធិការ នៃក្រសួងសាធារ ណការ និងដឹកជញ្ជូន បានមានប្រសាសន៍ថា ចាប់តាំងពីប្រតិបត្តិការជាថ្មី ដែលមានរយៈពេលជាង៤ខែមកនេះ ក្រសួងបានឃាត់រថយន្តដឹកលើសទម្ងន់ ដែលច្បាប់បានកំណត់ពី២០%ឡើងទៅ គឺមានចំនួនប្រមាណជាង១៥០គ្រឿងហើយ ដែលត្រូវបានផាកពិន័យ និងដឹកយកទៅរក្សាទុក១ឆ្នាំ ដោយមិនអនុញ្ញាតឱ្យមានការចរាចរលើដងផ្លូវទៀតនោះទេ ដើម្បីឱ្យម្ចាស់រថយន្តរាងចាល និងឈប់ដឹកលើសទម្ងន់បន្តទៀត ។ ឯកឧត្តម បានបន្តថា មកទល់ពេលនេះបទល្មើសដឹកលើសកំណត់បានថយចុះជាងមុនបន្តិចហើយ ប៉ុន្តែវប្បធម៌នៃការអន្តរាគមន៍នៅតែកើតមានដដែល ដូចនេះឯកឧត្តម ក៏សូមអំពាវនាវជាថ្មី ដល់ឈ្មួញដែលជាអ្នកមានអំណាចទាំងឡាយ មេត្តាបិទបញ្ចប់នូវវប្បធម៌អន្តរាគមន៍ ហើយនាំគ្នាអនុវត្តច្បាប់ ដើម្បីភាពធន់នៃការប្រើប្រាស់ផ្លូវថ្នល់បានយូរអង្វែង។ ការអនុវត្តនិងការប្រតិបត្តិការរបស់យើងកន្លងមក រហូតមកដល់ពេលនេះ រថយន្តចំនួន១៥៤គ្រឿង នឹងរក្សាទុករយៈពេល១ឆ្នាំ យើងចាប់ផ្ដើមអនុវត្តតាំងពីដើមខែ១១រហូតដល់ថ្ងៃនេះជិតប្រាំខែហើយ យើងឃើញមានការថយចុះច្រើនមានការគោរពច្បាប់ច្រើន ប៉ុន្តែដោយឡែកនៅមានការអន្តរាគមន៍នៅមានសេសសល់នៅឡើយទេ រាល់ថ្ងៃនេះមានការអន្តរាគមន៍ពីសំណាក់ខាងឈ្មួញ ដែលគេមានអំណាច គឺគេធ្វើការអន្តរាគមន៍ជាហូរហែ ប៉ុន្តែអ្វីដែលជាអនុសាសន៍របស់ឯកឧត្ដមទេសរដ្ឋមន្រ្តីដែលបានលើកឡើង គឺយើងធ្វើការចាប់និងអនុវត្តច្បាប់នេះគឺស្មើភាពគ្នា គឺលោកបានលើកហើយ មិនគិតថាអ្នកក្រ អ្នកមាន អ្នកតូចអ្នកធំអីទេ គឺយើងធ្វើឱ្យស្មើភាពគ្នានៅក្នុងការអនុវត្តច្បាប់នេះ ហើយក្នុងន័យនេះ ខ្ញុំចង់ជម្រាបជូនថា អ្វីដែលយើងធ្វើការប្រតិបត្តិការដូចភ្លៀងរលឹម តាមអនុសាសន៍របស់ឯកឧត្ដមទេសរដ្ឋមន្រ្តី គឺយើងនៅតែជួបប្រទះនូវបទល្មើសនេះមួយចំនួនដែរ ប៉ុន្តែមួយចំនួនតូចទេ។ សូមបញ្ជាក់ថា រហូតមកដល់ពេលនេះ ក្រសួងសាធារណការនិងដឹកជញ្ជូន បានពង្រាយជញ្ជីងចល័ត និងអចល័តនៅទូទាំងប្រទេស ចំនួន៣៦ គោលដៅ ដែលក្នុងនោះមានជញ្ជីងចល័តចំនួនពីរឈុត ដើម្បីចល័តនៅពេលដែលទទួលបានព័ត៌មានជាក់លាក់ ពីតំបន់ណាមួយ ឬមានប្រជាពលរដ្ឋរាយការណ៍ថានៅកន្លែងណាមួយ កំពុងតែមានរថយន្តដឹកលើសទម្ងន់ដែលច្បាប់កំណត់មក បានធ្វើចរាចរណ៍នៅតាមដងផ្លូវ គឺក្រុមការងារជញ្ជីងចល័ត និងចុះទៅធ្វើប្រតិបត្តិការសម្ងាត់ភ្លាមៗតែម្ដង៕