ដោយៈ សុផល / ភ្នំពេញៈ លោក​ទេសរដ្ឋមន្ត្រី ស៊ុន ចាន់ថុល​រដ្ឋមន្ត្រីក្រសួង សាធារណការ និង ដឹកជញ្ជូន នៃ​ព្រះរាជាណាចក្រ​កម្ពុជា និង​ជា​ប្រធាន​កិច្ចប្រជុំ រដ្ឋមន្ត្រី​ដឹកជញ្ជូន​អាស៊ាន បាន​អញ្ជើញ​ដឹកនាំ​កិច្ចប្រជុំ​រដ្ឋមន្ត្រី ដឹកជញ្ជូន​អាស៊ាន លើក​ទី​២៧ ជាមួយ​ក្រុមប្រឹក្សា​ធុរកិច្ច អាស៊ាន​-​សហរដ្ឋអាមេរិក (US-ABC) តាមរយៈ ប្រព័ន្ធ​វីដេអូ​ពី​ចម្ងាយ ដោយមាន​ការអញ្ជើញ​ចូលរួម ពី​លោក ឯកអគ្គរដ្ឋទូត Michael W. Michalak អនុប្រធាន​ជាន់ខ្ពស់ និង​ជានា​យក​គ្រប់គ្រង ប្រចាំ តំបន់ នៃ​ក្រុមប្រឹក្សា ធុរកិច្ច អាស៊ាន​-​សហរដ្ឋអាមេរិក (US-ABC) លោក លោកស្រី​រដ្ឋមន្ត្រី​ដឹកជញ្ជូន អាស៊ាន អគ្គលេខាធិការ អាស៊ាន សមាជិក US-ABC និង​គណៈប្រតិភូ​អមដំណើរ​។​ ​ថ្លែង​ក្នុង​សុន្ទរកថា​បើក លោក​ទេសរដ្ឋមន្ត្រី បាន​គូសបញ្ជាក់ ពី​បញ្ហា​ប្រឈម​ដ៏​ធំ​បំផុត ដែល​បង្កើត ឡើង ដោយ​ជំងឺ​រាតត្បាត​កូ​វីដ​-១៩ មិន​ត្រឹមតែ​សម្រាប់​តំបន់​អាស៊ាន និង​សហរដ្ឋអាមេរិក ប៉ុណ្ណោះ​ទេ ប៉ុន្តែ​សម្រាប់​តំបន់​ផ្សេងទៀត ជុំវិញ​ពិភពលោក ផងដែរ​។​ ​លោក​ទេសរដ្ឋមន្ត្រី បានកត់សម្គាល់​ថាៈ តាមរយៈ វិធានការ​ឆ្លើយតប ប្រកបដោយ ប្រសិទ្ធភាព ពិភពលោក បាន​ដើរ​លើ​គន្លង​ផ្លូវ ឆ្ពោះទៅរក​ការ​ងើបឡើង​វិញ នៃ​សេដ្ឋកិច្ចសង្គម ហើយ​បច្ចុប្បន្ននេះ រដ្ឋមន្ត្រី​ដឹកជញ្ជូន​អាស៊ាន កំពុងធ្វើការ​ឆ្ពោះ ទៅរក​ការ​ស្តារឡើងវិញ ក្រោយ​វិបត្តិ​កូ​វីដ​-១៩ ដើម្បី​ធានា​ការតភ្ជាប់​ប្រកបដោយ និរន្តរភាព និង​ភាព​ធន់​។​ ​ជាមួយគ្នា​នោះ​ផងដែរ លោក​ទេសរដ្ឋមន្ត្រី បាន​ជម្រាបជូន​អង្គប្រជុំ អំពី​លទ្ធផល សំខាន់ៗ នៃ​កិច្ចប្រជុំ​រដ្ឋមន្ត្រី​ដឹកជញ្ជូន​អាស៊ាន លើក​ទី​២៧ និង​បញ្ហា​អាទិភាព សំខាន់ៗ រួមមានៈ ការបញ្ចប់​ពិធីសារ ដើម្បី​អនុវត្ត​កញ្ចប់​សន្យា​ទី​១២ ស្តីពី​សេវាកម្ម ដឹកជញ្ជូន តាមផ្លូវ​អាកាស ក្រោម​កិច្ចព្រមព្រៀង ក្របខ័ណ្ឌ​អាស៊ាន ស្តីពី​សេវាកម្ម ការបញ្ចប់​ការចរចា​កិច្ចព្រមព្រៀង ដឹកជញ្ជូន​ផ្លូវអាកាស គ្រប់​ជ្រុងជ្រោយ អាស៊ាន -​សហភាព អឺរ៉ុប ការដាក់ឱ្យ​ដំណើរការ ការអនុវត្ត​ពិធីសារ​ទី​៧ ស្តីពី​ប្រព័ន្ធ​ដឹកជញ្ជូន ឆ្លងកាត់​គយ​អាស៊ាន នៃ​កិច្ចព្រមព្រៀង​ក្របខណ្ឌ អាស៊ាន ស្តីពី​កិច្ច​សម្រួល​ដឹក ជញ្ជូន​ទំនិញ​ឆ្លងកាត់ និង​ការអនុម័ត សេចក្តីប្រកាស​ភ្នំពេញ ស្តីពី​ការដឹកជញ្ជូន ក្នុង​ទីក្រុង​ប្រកបដោយ​និរន្តរភាព ដែល​ជួយ​ពង្រឹង​បន្ថែម ដល់​ការរួមបញ្ចូល​គ្នា នៃ​ការដឹកជញ្ជូន ក្នុង​ទីក្រុង ប្រកបដោយ​និរន្តរភាព និង​ការធ្វើផែនការ​ប្រើប្រាស់​ដី ក្នុង​តំបន់​អាស៊ាន​៕/V​-PC