ហេដ្ឋារចនាសម្ព័ន្ធចំណតផែកុងតឺន័រ LM១៧ ជំហានទី៣ ដំណាក់កាលទី១ របស់កំពង់ផែស្វយ័តភ្នំពេញ បានសម្ពោធដាក់ឱ្យប្រើប្រាស់ជាផ្លូវការហើយ កាលពីថ្ងៃទី២០ ខែកញ្ញា ឆ្នាំ២០២១ ក្រោមវត្តមានលោករដ្ឋមន្ត្រី ស៊ុន ចាន់ថុល។ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឲ្យដឹងថា ហេដ្ឋារចនាសម្ព័ន្ធចំណតផែកុងតឺន័រ LM១៧ ជំហានទី៣ ដំណាក់កាលទី១ របស់កំពង់ផែស្វយ័តភ្នំពេញ ឋិតនៅភូមិកណ្តាលលើ ឃុំបន្ទាយដែក ស្រុកកៀនស្វាយ ខេត្តកណ្តាល។ យោងតាមរបាយការណ៍កំពង់ផែស្វយ័តភ្នំពេញ នៅឆ្នាំ២០១១កំពង់ផែបានសម្រេចធ្វើការវិនិយោគលើការពង្រីកចំណតផែកុងតឺន័រ LM១៧ ឋិតនៅលើផ្ទៃដីទំហំ១០ ហិកតា មានសមត្ថភាពផ្ទុកកុងតឺន័រ បាន ១៥០ 000 TEUs ក្នុងមួយឆ្នាំ ដោយប្រើប្រាស់ទុនវិនិយោគ ដែលបានមកពីកម្ចីឥណទានរបស់សាធារណរដ្ឋប្រជាមានិតចិនក្នុងទឹកប្រាក់ប្រមាណ២៨ ៩០០ ០០០ ដុល្លារអាមេរិក ដោយពុំទាន់ រាប់បញ្ចូលគ្រឿងចក្រលើកដាក់ទំនិញ ដើម្បីឆ្លើយតបនឹងកំណើនកុងតឺន័រឆ្លងកាត់។ ដោយឡែកកំណើនកុងតឺន័រឆ្លងកាត់កំពង់ផែស្វយ័តភ្នំពេញគិតជាមធ្យមប្រចាំឆ្នាំមានចន្លោះពី១៥% ទៅ ១៨% ក្នុងនោះ៖ ឆ្នាំ២០១៩បរិមាណកុងតឺន័រឆ្លងកាត់មានចំនួន ២៨១ ០៤៣ TEUs និងឆ្នាំ២០២០ មានចំនួន២៩០ ៨៥៧ TEUs ទោះបីជាមានវិបត្តិដែលកើតឡើងដោយជំងឺកូវីដ-១៩ក៏ដោយ ដែលបរិមាណនេះបានឈានជិតដល់សមត្ថភាពផ្ទុកកុងតឺន័រសរុបនៃចំណតផែកុងតឺន័រ LM១៧ ជំហានទី១ និងទី២ ដែលនាំឱ្យមានតម្រូវការពង្រីកហេដ្ឋារចនាសម្ព័ន្ធបន្ថែមនៃចំណតផែកុងតឺន័រ LM១៧ ដូច្នេះហើយទើបនៅចុងឆ្នាំឆ្នាំ២០១៩ កំពង់ផែស្វយ័តភ្នំពេញបានអនុវត្តគម្រោងពង្រីកហេដ្ឋារចនាសម្ព័ន្ធនៃចំណតផែកុងតឺន័រLM១៧ ជំហានទី៣ ដំណាក់កាលទី១នេះ។ លោករដ្ឋមន្ត្រី ស៊ុន ចាន់ថុល អះអាងថា ការបង្កើតផែរណប១០០% និងបានជំរុញឱ្យកំពង់ផែស្វយ័តភ្នំពេញសហការជាមួយផ្នែកឯកជនក្នុងការបង្កើតផែរណបថែមទៀតឱ្យបានច្រើន ដើម្បីបង្កើនប្រសិទ្ធភាពនៃការដឹកជញ្ជូនតាមផ្លូវទឹក ដោយហេតុថាយើងមានតែកំពង់ផែស្វយ័តតែមួយ នៅភ្នំពេញមិនអាចដឹកទំនិញកសិផលនៅទូទាំងប្រទេសមកកំពង់ផែស្វយ័តភ្នំពេញបានទេ៕