ថ្ងៃសុក្រ ៤រោច ខែស្រាពណ៍ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី២៧ ខែសីហា ឆ្នាំ២០២១ នៅទីស្តីការក្រសួង ឯកឧត្តម លឹម ស៊ីដេនីន រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិភាក្សាផ្សព្វផ្សាយអនុក្រឹត្យស្តីពីក្រមសីលធម៌មន្ត្រីមានសមត្ថកិច្ច ក្នុងការសិក្សា ការរៀបចំ ការអនុវត្ត និងការគ្រប់គ្រងគម្រោងហេដ្ឋារចនាសម្ព័ន្ធរូបវន្តសាធារណៈ ដោយមានការចូលរួម​​តាមប្រព័ន្ធវីដេអូពីចម្ងាយ ពីថ្នាក់ដឹកនាំក្រសួងទទួលបន្ទុក មន្ត្រីជំនាញ ក្រុមការងារបច្ចេកទេសក្រោម​ឱវាទក្រសួង មន្ទីរសាធារណការ និងដឹកជញ្ជូនរាជធានី-ខេត្តទាំង២៥ និងភាគីពាក់ព័ន្ធផងដែរ។ ជាកិច្ចចាប់ផ្តើមនៃអង្គប្រជុំ ឯកឧត្តមរដ្ឋលេខាធិការ បានគូសបញ្ជាក់ពីសារសំខាន់នៃវិស័យហេដ្ឋារចនា​សម្ព័ន្ធរូបវន្ត ក្នុងការជួយទ្រទ្រង់ដល់កំណើនសេដ្ឋកិច្ចជាតិឱ្យមានការរីកចម្រើន ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងបានបន្ថែមទៀតថា៖ ការវិនិយោគទៅលើវិស័យហេដ្ឋារចនាសម្ព័ន្ធរបស់រាជរដ្ឋាភិបាល ត្រូវបានធ្វើឡើងជាបន្តបន្ទាប់ប្រកបដោយលទ្ធផលផ្លែផ្កាល្អ ស្របពេលជាមួយគ្នានេះ ក៏មានការលេចឡើងនូវបាតុភាពអសកម្មមួយចំនួនផងដែរ ដែលទាមទារឱ្យរាជរដ្ឋាភិបាលដាក់ចេញនូវអនុក្រឹត្យនេះ ដើម្បីលុប​បំបាត់នូវភាពបាតុភាពអសកម្មទាំងនោះ។ សូមជម្រាបជូនថា៖ អនុក្រឹត្យនេះត្រូវបានរៀបចំឡើងក្នុងគោលបំណងឆ្លើយតបទៅនឹងបរិការណ៏ នៃការ​កែទម្រង់ប្រព័ន្ធគ្រប់គ្រងវិនិយោគសាធារណៈ កំណត់ជាវិធានប្រតិបត្តិក្រមសីលធម៌ក្នុងការសិក្សា ការរៀបចំ ការអនុវត្ត និងការគ្រប់គ្រងគម្រោងហេដ្ឋារចនាសម្ព័ន្ធរូបវន្តសាធារណៈ លើកកម្ពស់ និងពង្រឹង គុណតម្លៃនៃសីលធម៍វិជ្ជាជីវៈ គុណតម្លៃបុគ្គល និងគណនេយ្យភាពរបស់មន្ត្រីមានសមត្ថកិច្ច និងពង្រឹង​ប្រសិទ្ធភាព និងសក្កិសិទ្ធភាពក្នុងការសិក្សា ការរៀបចំ ការអនុវត្ត និងការគ្រប់គ្រងគម្រោង។ អនុក្រឹត្យនេះចែកចេញជា៦ជំពូក និង១១មាត្រា ក្នុងនោះជំពូកទី១ ចែងអំពីបទប្បញ្ញត្តិទូទៅមានចំនួន៣​មាត្រា ជំពូកទី២ ចែងអំពីគោលការណ៍គ្រឹះនៃក្រមសីលធម៌មាន១មាត្រា ជំពូកទី៣ ចែងអំពីវិធាន​ប្រតិបត្តិការគោលការណ៍គ្រឹះនៃ​ក្រមសីលធម៌មាន២មាត្រា ជំពូកទី៤ ចែងអំពីទណ្ឌកម្ម និងយន្តការ​ដាក់ទោសទណ្ឌមាន២មាត្រា ជំពូកទី៥ ចែងអំពីបទប្បញ្ញត្តិដោយឡែក​មាន១មាត្រា និងជំពូក៦ ចែង អំពីអវសាន្តបញ្ញត្តិ មាន២មាត្រា៕