ភ្នំពេញ៖ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងថា កម្ពុជាចង់រៀនបទពិសោធន៍ពីវេទិកាដឹកជញ្ជូនអន្តរជាតិ ទាក់ទងយុទ្ធសាស្ត្រដឹកជញ្ជូនបៃតង ដោយសារកម្ពុជា មិនទាន់មានយាន យន្តដើរដោយអគ្គិសនី (Electric Vehicle)។ ក្នុងជំនួបពិភាក្សាការងារជាមួយ លោក Young Tae Kim អគ្គលេខាធិការ នៃវេទិកាដឹកជញ្ជូនអន្តរជាតិ (International Transport Forum) តាមប្រព័ន្ធវីដេអូពីចម្ងាយ នាថ្ងៃទី១០ ខែមិថុនា ឆ្នាំ២០២១ លោក ស៊ុន ចាន់ថុល បានថ្លែងថា «កម្ពុជាចង់រៀនសូត្របទពិសោធន៍របស់វេទិកាដឹក ជញ្ជូនអន្តរជាតិ ទាក់ទងនឹងគោលនយោបាយ យុទ្ធសាស្ត្រ ការដឹកជញ្ជូនបៃតង ដោយសារកម្ពុជា សព្វថ្ងៃនេះមិនទាន់មានយានយន្តដើរដោយអគ្គិសនី(Electric Vehicle) នៅឡើយទេ ប៉ុន្តែកម្ពុជាកំពុង ធ្វើដំណើរឆ្ពោះទៅកាន់ទិសដៅនោះហើយ»។ ជាងនេះទៅទៀត លោកក៏បានស្នើសុំអនុសាសន៍ និងការចែករំលែកព័ត៌មានពីវេទិកាដឹកជញ្ជូនអន្តរជាតិ លើការប្រើប្រាស់ប្រព័ន្ធGPS បំពាក់លើយានយន្តដើម្បីតាមដានស្ថានភាពយានយន្តដែលកំពុងបើកបរ លើដងផ្លូវ ដោយសារបច្ចុប្បន្នេះមានប្រព័ន្ធច្រើនមិនដឹងថាប្រព័ន្ធណាមួយល្អអាចទទួលយកបានសម្រាប់ កម្ពុជា ក៏ដូចជាបណ្តាប្រទេសអាស៊ាន ដើម្បីយកបញ្ហានេះទៅសិក្សាស្វែងយល់ និងពិភាក្សានៅក្នុងកិច្ច ប្រជុំថ្នាក់រដ្ឋមន្ត្រីដឹកជញ្ជូនអាស៊ាន សំដៅអនុម័តយកបទដ្ឋានរួមមួយសម្រាប់ប្រើប្រាស់ទាំងអស់គ្នា។ នាឱកាសនោះ លោករដ្ឋមន្ដ្រីសាធារណការ លើកឡើងថា បញ្ហាសុវត្ថិភាពចរាចរណ៍គឺជាបញ្ហាគួរឱ្យព្រួយបារម្ភ បំផុតរបស់កម្ពុជា ក៏ដូចជាអាស៊ានទាំងមូល ដោយហេតុថា៖ បច្ចុប្បន្ននេះមានមនុស្សចំនួនពី៤ ទៅ ៥នាក់ គិតជាមធ្យម បានស្លាប់ដោយសារគ្រោះថ្នាក់ចរាចរណ៍នៅកម្ពុជា បើយោងតាមការប៉ាន់ស្មានរបស់ធនាគារពិភពលោក ដោយក្នុងនោះបានបង្កឱ្យខូចខាតទ្រព្យសម្បត្តិប្រមាណ៣០០ លានដុល្លារ ក្នុងមួយឆ្នាំ ខាតបង់ពេលវេលា និងប៉ះពាល់ដល់សេដ្ឋកិច្ចជាតិផងដែរ និងបានសម្ដែងបំណងចង់ធ្វើការ យ៉ាងជិតស្និតជាមួយវេទិកាដឹកជញ្ជូនអន្តរជាតិដើម្បីដោះស្រាយបញ្ហានេះឱ្យមានប្រសិទ្ធភាព។ ឆ្លៀតឱកាសនោះដែរ លោក Young Tae Kim បានឲ្យដឹងថា ប៉ុន្មានឆ្នាំកន្លងទៅនេះ ITFទទួលបាន សមាជិកថ្មីមួយចំនួនទៀតរួមមាន ប្រទេសMongolia ប្រទេសObekistan និងបណ្តាប្រទេសចំនួន៧ទៀតមកពីទ្វីបអាស៊ី និងបានសម្តែងនូវការស្វាគមន៍ចំពោះទំនាក់ទំនងរវាងបណ្តាប្រទេសអាស៊ីអាគ្នេយ៍ ជាពិសេស កម្ពុជា ដែលមានបំណងចង់ចូលជាសមាជិករបស់វេទិកាដឹកជញ្ជូនអន្តរជាតិ តាមរយៈ អង្គការUNSCAP និងធនាគារអភិវឌ្ឍន៍អាស៊ី និងលេខាធិការដ្ឋានអាស៊ានផងដែរ។ ជាការឆ្លើយតប លោក ស៊ុន ចាន់ថុល បានស្វាគមន៍ ចំពោះការចូលរួមដោយផ្ទាល់ របស់វេទិកាដឹកជញ្ជូនអន្តរជាតិនៅក្នុងកិច្ចប្រជុំ ថ្នាក់រដ្ឋមន្ត្រីដឹកជញ្ជូនអាស៊ាន ដែលកម្ពុជាគ្រោងនឹងធ្វើជាម្ចាស់ផ្ទះ នៅក្នុងខែវិច្ឆិកា ឆ្នាំ២០២១នេះ នៅពេលទទួលបានការយល់ព្រមជាទូទៅពីរដ្ឋសមាជិកអាស៊ានទាំងអស់ នៅក្នុងបរិបទនៃការរាតត្បាត ជំងឺកូវីដ-១៩៕