កាលពី ខែកុម្ភៈ ឆ្នាំ២០២១ កន្លងមក ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍ ជុំវិញគម្រោងពង្រីកផ្លូវ និងជួសជុលផ្លូវដូចជា៖ ផ្លូវជាតិលេខ៤៖ ឯកឧត្តម ស៊ុន ចាន់ថុលបញ្ជាក់ថាផ្លូវជាតិលេខ ៤ នេះ កំពុងដាក់ដេញថ្លៃ នឹងជ្រើសរើសក្រុមហ៊ុនដើម្បីសាងសង់ ដោយពង្រីកទទឹងពី ៧ ទៅ១១ម៉ែត្រ។ ផ្លូវជាតិលេខ៧ ពីក្រចេះទៅស្ទឹងត្រែង៖ មានប្រវែងប្រមាណ ៩៣ គីឡូម៉ែត្រ បានលើកគុណភាពប្រភេទDBST ទៅ AC ដែលគម្រោងស្ថាបនាផ្លូវមួយខ្សែនេះ កំពុងត្រៀមរកថវិកាពីមិត្តចិន ដើម្បីចាក់AC រហូតដល់ព្រំប្រទល់កម្ពុជា ឡាវ នៅត្រពាំងគ្រៀល។ ផ្លូវជាតិលេខ៨៖ កំពុងស្វែងរកថវិកាក្នុងការជួសជុល និងពង្រីកផ្លូវជាតិនេះ មួយចំនួនពី២គន្លង ទៅ ៤គន្លង។ ផ្លូវជាតិលេខ ៧១សេ៖ ស្ពានស្ទឹងត្រង់-ក្រូចឆ្មា នឹងបញ្ចប់ការសាងសង់នៅខែមីនា ហើយរដ្ឋាភិបាលនឹងបើកការដ្ឋានសាង់សង់ផ្លូវជាតិលេខ ៧១សេ តភ្ជាប់ជាមួយនឹងស្ពានស្ទឹងត្រង់-ក្រូចឆ្មា នេះ ក្នុងខែជាមួយគ្នាផងដែរ។ ផ្លូវជាតិលេខ ៤១ ៣១ និង៣៣៖ ឯកឧត្តមស៊ុន ចាន់ថុល បញ្ជាក់ថាផ្លូវទាំង៣ខ្សែនេះ បានចរចាចប់សព្វគ្រប់ហើយ ដោយកំពុងត្រៀមចុះហត្ថលេខាលើប្រាក់កម្ចី រវាងក្រសួងសេដ្ឋកិច្ច និងហិរញ្ញវត្ថុ ជាមួយនឹងសាធារណៈរដ្ឋចិន ដើម្បីយកមកកសាងផ្លូវទាំង៣ខ្សែនេះ។ ផ្លូវកំពត-វាលរេញ៖ ឯកឧត្តម ស៊ុន ចាន់ថុល បានលើកឡើងអំពីបញ្ហាផ្លូវដូចនេះថា ផ្លូវមួយចំនួនដែលបងប្អូនតែងតែលើកពីបញ្ហាផ្លូវពីកំពតទៅវាលរេញ ជាពិសេស២០គីឡូម៉ែត្រនៅវាលរេញនេះ គឺធ្វើមុនខូចក្រោយ ធ្វើក្រោយខូច នេះគឺជាបញ្ហាមួយដែលជាបញ្ហាដែលខ្ញុំទទួលយកមិនបាន អ៊ីចឹងកំពុងតែស្វែងរកនីតិវិធីធ្វើឱ្យបានមាំ នៅលើផ្លូវ២០គីឡូម៉ែត្រនៃផ្លូវជាតិលេខ៣នេះឯង។ ដោយសារតែផ្លូវហ្នឹងត្រូវតែកាយគ្រឹះវាចេញ ព្រោះមានដីភក់ប្រហែលជា១៨ម៉ែត្រត្រូវកាយទាំងភក់តែម្តង ប៉ុន្តែយើងអត់ទាន់មានថវិកាគ្រប់គ្រាន់ យើងបានត្រឹមប៉ះប៉ូវពីលើទេ បើចង់ធ្វើឱ្យជាប់មានតែកាយគ្រឹះចេញទាំងភក់១៨ម៉ែត្រនោះ។ ផ្លូវលេខ៧ ត្បូងឃ្មុំ៖ ឯកឧត្តមបញ្ជាក់ថាផ្លូវមួយទៀតលេខ៧ នៅត្បូងឃ្មុំ ដូចគ្នា ធ្វើមុខខូចក្រោយ ធ្វើក្រោយខូចមុខ ហើយខ្ញុំក៏កំពុងតែរកនីតិវិធីដែរ ដើម្បីធ្វើផ្លូវនោះឱ្យបានត្រឹមត្រូវ មានថវិកាគ្រប់គ្រាន់ កុំឱ្យមានតែថវិកាបន្តិបន្តួច យកមកត្រឹមតែប៉ះប៉ូវនោះទេ៕