កិច្ចប្រជុំបូកសរុបលទ្ធផលការងាររយៈពេល៩ខែ ឆ្នាំ២០២៥ របស់ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរីក្រោមកិច្ចដឹកនាំពី ឯកឧត្តម ឈួន វិន ប្រធានក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី ខេត្តមណ្ឌលគីរី៖ នារសៀលថ្ងៃសុក្រ ទី១២ ខែកញ្ញា ឆ្នាំ២០២៥ ឯកឧត្តម ឈួន វិន រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី បានអញ្ជើញដឹកនាំកិច្ចប្រជុំបូកសរុបលទ្ធផលការងាររយៈពេល៩ខែ ឆ្នាំ២០២៥ របស់ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី ដោយមានការអញ្ជើញចូលរួមពី ឯកឧត្តម ម៉ែន ង៉ុយ ប្រធានក្រុមប្រឹក្សាខេត្តមណ្ឌលគិរី ឯកឧត្តម ថង សាវុន អភិបាលនៃគណៈអភិបាលខេត្តមណ្ឌលគិរី ឯកឧត្តមប្រធានក្រុមការងាររាជរដ្ឋាភិបាលចុះមូលដ្ឋានគ្រប់ក្រុង-ស្រុក នៃខេត្តមណ្ឌលគិរី និងសមាជិក នៃក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី និងមន្ត្រីពាក់ព័ន្ធពីគ្រប់អង្គភាពជុំវិញខេត្ត។ កិច្ចប្រជុំនេះប្រារព្ធឡើង ក្នុងគោលដើម្បីពិនិត្យលើវឌ្ឍនភាពការងារដែលសម្រេចបានជាលទ្ធផលរយៈពេល៩ខែ ឆ្នាំ២០២៥ និងសកម្មភាពជាក់ស្តែងរបស់ក្រុមការងាររាជរដ្ឋាភិបាលចុះមូលដ្ឋានគ្រប់លំដាប់ថ្នាក់។ ថ្លែងក្នុងអង្គប្រជុំឯកឧត្តមប្រធាន បានសម្តែងនូវអំណរគុណចំពោះក្រុមការងាររាជរដ្ឋាភិបាលគ្រប់លំដាប់ថ្នាក់ ដែលបានចុះធ្វើវេទិកាសាធារណៈ ទទួលបានលទ្ធផលល្អប្រសើរ ស្របតាមផែនការគ្រោងទុក ព្រមទាំងក្តាប់បាននូវបញ្ហាប្រឈម តម្រូវការ និង ចម្ងល់នានារបស់ប្រជាពលរដ្ឋ ជាមួយនឹងការបកស្រាយ និងដោះស្រាយតាមលទ្ធភាព និងសមត្ថកិច្ចរបស់ខ្លួននៅនឹងកន្លែងជាបន្តបន្ទាប់រួចមក ចំពោះបញ្ហានៅសេសសល់មួយចំនួន ដែលក្រុមការងារយើងត្រូវពិនិត្យរួមគ្នា និងពិគ្រោះយោបល់ជាមួយក្រសួង ស្ថាប័នពាក់ព័ន្ធ ដើម្បីដោះស្រាយបន្តទៀត។ ឯកឧត្តមប្រធានបានរំលេចដោយសង្ខេបសមិទ្ធផលជាក់ស្ដែងធំៗ សម្រេចបាននាពេលថ្មីៗនេះ របស់រាជរដ្ឋាភិបាលកម្ពុជា នីតិកាលទី៧ ដូចជា អត្រាពន្ធនាំចូលសហរដ្ឋអាមេរិច ១៩% ការយកចិត្តទុកដាក់អនុវត្តការចុះឈ្មោះអ្នកសេដ្ឋកិច្ចក្រៅប្រព័ន្ធ ដែលជាវិធានការមួយនៃយុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធ ឆ្នាំ២០២៣-២០២៨ និងបញ្ហាព្រំដែនកម្ពុជា-ថៃ។ ជាទីបញ្ចប់ ឯកឧត្តមប្រធានក៏បានលើកទឹកចិត្តក្រុមការងាររាជរដ្ឋាភិបាលចុះមូលដ្ឋានទាំងអស់ ឱ្យបន្តខិតខំប្រឹងប្រែងអនុវត្តការងារ ឱ្យមានប្រសិទ្ធភាពខ្ពស់ បន្តយកចិត្តទុកដាក់អនុវត្តតួនាទីនិងភារកិច្ច សេចក្តីណែនាំរបស់រាជរដ្ឋាភិបាល ដែលបានដាក់ចេញកន្លងមកឱ្យទទួលបានប្រសិទ្ធភាព ដើម្បីសម្រេចឱ្យបានជោគជ័យលើគ្រប់ការងារ ដែលស្ថិតនៅក្រោមសមត្ថកិច្ចរបស់ខ្លួន ស្របតាមគោលដៅកំណត់ និងកម្មវិធីនយោបាយរបស់រាជរដ្ឋាភិបាល៕