(ភ្នំពេញ)៖ ផ្លូវយុទ្ធសាស្ត្រដឹកជញ្ជូន​ក្នុងក្រុង​កាត់ភូមិឋាន​ កាត់វាលស្រែ​ ផ្លូវក្រវាត់ក្រុងទី៣ សម្រេចប្រមាណ ៥០% (ប្រហាក់ប្រហែល)​ បើមិនមានអ្វីប្រែប្រួល នៅថ្ងៃទី៥ ខែកញ្ញា ឆ្នាំ២០២២ នឹងបញ្ចប់ការសាងសង់។ នេះបើតាមការឲ្យដឹងពីលោក ហ៊ាង សុទ្ធាយុត្តិ អ្នកនាំពាក្យក្រសួងសាធារណការ និងដឹកជញ្ជូន នៅថ្ងៃទី៩ ខែឧសភានេះ។ លោកបានបញ្ជាក់ថា ដំណើរការសាងសង់នៅតែបន្ត បើទោះបីមានការគំរាមកំហែងពីជំងឺកូវីដ-១៩ ក៏ដោយ។ ទាំងក្រុមហ៊ុនសាងសង់ និងក្រុមហ៊ុនទីប្រឹក្សាបច្ចេកទេសអនុវត្តយ៉ាងខ្ជាប់ខ្ជូននូវវិធានការណែនាំ របស់ក្រសួងសុខាភិបាល ដើម្បីប្រឆាំងនឹងជំងឺកូវីដ-១៩។ គម្រោងសាងសង់ផ្លូវក្រវាត់ក្រុងខ្សែទី៣ (NR4-NR1) នេះសាងសង់ដោយក្រុមហ៊ុនសំណង់សៀងហៃ ខូអិលធីឌី (Shanghai Construction Group Co., Ltd.) និងត្រួតពិនិត្យបច្ចេកទេសសាងសង់ដោយក្រុមហ៊ុន ទីប្រឹក្សាបច្ចេកទេសក្វាងចូវវ៉ានអាន Guangzhou Wanan Construction Supervision Co., Ltd.។ តើផ្លូវនេះនឹងរួមចំណែកបែបណាខ្លះក្នុងសេដ្ឋកិច្ច ? លោក ហ៊ាង សុទ្ធាយុត្តិ បានលើកឡើងថា គម្រោងសាងសង់ផ្លូវក្រវាត់ក្រុងខ្សែទី៣ នេះក៏តភ្ជាប់ទៅនឹងផ្លូវទំនប់កប់ស្រូវ ផ្លូវជាតិលេខ៥ និងភ្ជាប់ទៅនឹងស្ពានឈ្នះឈ្នះ និងមហាវិថីឈ្នះឈ្នះ និងផ្លូវជាតិលេខ៦ ដែលនឹងប្រែក្លាយទៅជាផ្លូវក្រវាត់ក្រុងដ៏ ធំនិងទំនើបមួយ បម្រើឲ្យជាផ្លូវដឹកជញ្ជូនវាងរាជធានីភ្នំពេញ តភ្ជាប់ពីផ្លូវជាតិលេខ៦ ផ្លូវជាតិលេខ៥ ផ្លូវជាតិលេខ៤ ផ្លូវជាតិលេខ៣ ផ្លូវជាតិលេខ២ និងផ្លូវជាតិលេខ២១ ឆ្លងកាត់ទន្លេបាសាក់ ព្រមទាំងកោះអន្លង់ចិន និងតភ្ជាប់ទៅនឹងផ្លូវជាតិលេខ១ ពិសេស តភ្ជាប់ទៅចំណតផែកុងតេន័រថ្មីរបស់កំពង់ផែស្វ័យតភ្នំពេញ នៅស្រុក កៀនស្វាយ ក៏ដូចជាការបំពេញឲ្យការតភ្ជាប់ផ្លូវអាស៊ានហាយវ៉េយ (AH1 និង AH11) និងផ្លូវរបៀងសំខាន់ៗ (របៀងកណ្តាល និងរបៀងសេដ្ឋកិច្ចភាគខាងត្បូង) របស់មហាអនុតំបន់មេគង្គ។ លោកបានបន្តថា នៅខណៈពេលដែលរាជធានីភ្នំពេញ កំពុងត្រូវបានពង្រីកកាន់តែធំទៅៗ ស្របតាមកំណើន ប្រជាជន និងការអភិវឌ្ឍ និងដោយពិនិត្យឃើញថា ការធ្វើចរាចរណ៍យានយន្តគ្រប់ប្រភេទនៅតាមដងផ្លូវ ក្នុងរាជធានីភ្នំពេញ ជួបប្រទះនូវការកកស្ទះចរាចរណ៍ជារឿយៗ ដូច្នេះ សម្តេចតេជោនាយករដ្ឋមន្រី តែង បានផ្តល់អនុសាសន៍ ណែនាំដ៏ខ្ពង់ខ្ពស់ដល់ក្រសួង/ស្ថាប័នពាក់ព័ន្ធ ធ្វើការសិក្សាលទ្ធភាពសាងសង់ ផ្លូវក្រវាត់ក្រុងខ្សែទី៣ ដើម្បីជួយកាត់បន្ថយការកកស្ទះ និងគ្រោះថ្នាក់ចរាចរណ៍ដែលធ្លាប់មានកន្លងមក និងដើម្បីសម្រួលដល់ការធ្វើចរាចរណ៍ក្នុងរាជធានីបន្ថែមទៀត។ អ្នកនាំពាក្យក្រសួងសាធារណការ បានបន្ថែមទៀតថា លើសពីនេះទៀតការសាងសង់ផ្លូវ ក្រវាត់ក្រុងទី៣នេះ គឺជាការតភ្ជាប់ផ្ទៃក្នុង និងសមាហរណកម្មតំបន់ ពិសេសតភ្ជាប់ផ្លូវអាស៊ានហាយវ៉េ និងផ្លូវរបៀងសេដ្ឋកិច្ចសំខាន់ៗរបស់មហាអនុតំបន់មេគង្គ រួមចំណែកក្នុងការសម្រួលការដឹកជញ្ជូនឆ្លងកាត់ព្រំដែន ជំរុញពាណិជ្ជកម្មអន្តរជាតិ និងភស្តុភារកម្ម តំបន់ និងប្រែក្លាយទឹកដីដែលនៅសងខាងផ្លូវខ្សែ ក្រវាត់ក្រុងនេះ ទៅជាតំបន់អភិវឌ្ឍបូរីលំនៅដ្ឋាន តំបន់ភស្តុភារកម្ម និងឧស្សាហកម្មដ៏មានសក្តានុពល និងប្រសិទ្ធភាពសេដ្ឋកិច្ចរបស់ព្រះរាជាណាចក្រកម្ពុជា៕