[BTV] - ការជួសជុលស្ពានព្រះមុនីវង្សចាស់ឡើងវិញ គ្រោងបញ្ចប់នៅអំឡុងខែមីនាខាងមុខ
2021-01-29
ទៅកាន់ទំព័រចុះផ្សាយក្នុង BTV
ភ្នំពេញ៖ ចាប់ពីថ្ងៃទី២៧ មករា ឆ្នាំ២០២១នេះ ក្រសួងសាធារណការរាជធានីភ្នំពេញ បានចាប់ផ្តើមជួសជុលស្ពានព្រះមុនីវង្សចាស់ឡើងវិញ ដែលនោះរួមមាន៖ ការជួសជុលបង្គាន់ដៃ ចាក់កៅស៊ូACឡើងវិញ ដូរបង្គោលភ្លើងថ្មី លាបគំនូសចរាចរណ៍ និងដាក់ស្លាកសញ្ញាចរាចរណ៍ថ្មីជាដើម។ហើយតាមគម្រោងការជួសជុលស្ពាននេះ គ្រោងនឹងបញ្ចប់នៅអំឡុងខែមីនា ឆ្នាំ២០២១ខាងមុខ។
មានប្រសាសន៍ប្រាប់ BTV នៅថ្ងៃទី២៩ ខែមករានេះលោកសាំ ពិសិទ្ធប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានឱ្យដឹងថា ការជួសជុលស្ពានមុនីវង្សចាស់ឡើងវិញ គឺប្រើប្រាស់រយៈពេល២ខែ ពោលចាប់ពីចុងខែមករា រហូតដល់អំឡុងខែមីនាខាងមុខនេះ។ ការជុលស្ពានមុនីវង្សចាស់ឡើងវិញនោះរួមមាន៖ការជួសជុលបង្គាន់ដៃ ចាក់កៅស៊ូ AC ឡើងវិញ ដូរបង្គោលភ្លើងថ្មី លាបគំនូសចរាចរណ៍ និងដាក់ស្លាកសញ្ញាចរាចរណ៍ថ្មីជាដើម។
បើទោះបី មានការជួសជុលស្ពានមុនីវង្សឡើងវិញ តែការធ្វើចរាចរណ៍នៅតែដំណើរការជាធម្មតា ខណៈទំហំតួផ្លូវព្រះមុនីវង្សចាស់សរុបប្រវែងទទឹង ១១ ម៉ែត្រ ហើយការហ៊ុព័ទ្ធការដ្ឋាន ដើម្បីជួសជុលអស់ប្រវែងប្រមាណ ៣ម៉ែត្រ នៃទំហំតួផ្លូវប្រវែង ១១ម៉ែត្រ។ ក្រៅពីនេះ អាជ្ញាធរខណ្ឌច្បារអំពៅ បានពង្រយនគរបាល និងប្រជាការពារភូមិជួយសម្រួលចរាចរណ៍ផងដែរ។
ជាការកត់សំគាល់ ស្ពានព្រះមុនីវង្សចាស់ គឺជាស្ពានមួយនៅរាជធានីភ្នំពេញ មានចរាចរណ៍មមាញឹក។ស្ពាននេះតភ្ជាប់ច្រាំងខាងលិច ដែលជាចុងបញ្ចប់នៃផ្លូវជាតិលេខ២ ឆ្លងកាត់ទន្លេបាសាក់ ទៅកាន់ច្រាំងខាងកើត ផ្លូវជាតិលេខ១ ឆ្ពោះទៅខេត្តមួយចំនួននៃភាគខាងកើតប្រទេស និងទៅកាន់ប្រទេសវៀតណាម៕
