(សៀមរាប)៖ មន្ត្រីជាន់ខ្ពស់ នៃរាជរដ្ឋាភិបាលកម្ពុជាជាច្រើនរូប ដែលស្ថិតក្នុងគណៈកម្មការអន្តរក្រសួង នៃគម្រោ​ងស្ថាបនាហេដ្ឋារចនាសម្ព័ន្ធផ្លូវ ៣៨ខ្សែក្នុងក្រុងសៀមរាប ខេត្តសៀមរាប បានចុះត្រួតពិនិត្យវឌ្ឍនភាព ការងារសាងសង់ផ្លូវទាំង​៣៨ខ្សែនេះ​ជា​បន្ត​បន្ទា​ប់ មិនអាក់ខាន១សប្ដាហ៍ណាឡើយ។ នៅពេលដែលផ្លូវទាំង៣៨ខ្សែនេះ ត្រូវបានសាងស​ង់ចប់រួចរាល់ គេ​ពឹង​ថា នឹងធ្វើឲ្យក្រុងសៀមរាប ដែលជាខេត្តទេសចរណ៍ដ៏សំខាន់​របស់ប្រទេស​កម្ពុជា នឹងអភិវឌ្ឍជាទីក្រុងទេសចរណ៍ទំនើប និងឆ្លាតវៃ ហើយនឹងទាក់ទាញភ្ញៀវទេសចរណ៍ជាតិ-អន្តរជាតិ មកដើរលេង​កម្សាន្តក្នុង​ទឹកដីអង្គរ ប៉ូលទេសច​រណ៍ អច្ឆរិយៈរបស់កម្ពុជាកាន់តែច្រើនថែមទៀត។ កាលពីថ្ងៃទី២៨ ខែមករា ឆ្នាំ២០២១ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មការអន្តរក្រសួង, ឯកឧត្តម ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងជាអនុប្រធានគណៈកម្មការអន្តរក្រសួង, ឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្រ្តី ក្រសួងអភិវឌ្ឍន៍ជនបទ និងជាអនុប្រធានគណៈកម្មការអន្តរក្រសួង, ឯកឧត្តម លឹម គានហោ រដ្ឋមន្ត្រីក្រសួងធនធានទឹក និងឧតុនិយម និងជាអនុប្រធានគណៈកម្មការអន្តរក្រសួង, លោកជំទាវ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ, ឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន, ឯកឧត្តម ថោង ខុន រដ្ឋមន្រ្តី ក្រសួងទេសចរណ៍, ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន, ក្រុមការងារគណៈកម្មការអន្តរក្រសួង ក្រុមការងារបច្ចេកទេសជំនាញ និងភាគីពាក់ព័ន្ធទាំងអស់ បានចុះត្រួតពិនិត្យវឌ្ឍនភាព ការងារសាងសង់ផ្លូវទាំង៣៨ខ្សែនេះ។ ការចុះត្រួតពិនិត្យការស្ថាបនាផ្លូវនេះ ធ្វើឡើងក្នុងគោលបំណងដើម្បីពិនិត្យគុណភាព នៃការសាងសង់ ជំរុញឲ្យអង្គភាពសាងសង់ អនុវត្តតាមលក្ខណៈបច្ចេកទេស សៀវភៅបន្ទុកឲ្យបានត្រឹមត្រូវ និងស្តង់ដារ ដែលអាចទទួលយកបាន ពោលគឺធ្វើផ្លូវឲ្យមានគុណភាពរឹងមាំ អាចប្រើប្រាស់ជាប់បានយូរអង្វែង និងបញ្ចប់តាមផែនការគ្រោងទុក។ គម្រោងស្ថាបនាហេដ្ឋារចនាសម្ព័ន្ធផ្លូវ៣៨ខ្សែ ក្នុងទីក្រុងសៀមរាប ខេត្តសៀមរាបនេះ មានប្រវែងសរុបជាង១០៨គីឡូម៉ែត្រ ដោយគ្រោងប្រើប្រាស់ថវិកាជាតិសរុបប្រមាណជាង១៤០លានដុល្លារអាមេរិក និងថវិកាប្រមាណជាង៩លានដុល្លារអាមេរិកទៀត សម្រាប់ការងារចាំបាច់ ក្នុងការរៀបចំស្ថាបនាប្រព័ន្ធបង្ហូរទឹកភ្លៀង និងទឹកកខ្វក់ដែលនៅក្រៅគម្រោងសាងសង់ខ្សែផ្លូវទាំង៣៨នេះ ដោយប្រើប្រាស់រយៈពេលសាងសង់ចំនួន១៣ខែ ហើយគ្រោងនឹងបញ្ចប់នៅចុងឆ្នាំ២០២១។ ការដ្ឋានសាងសង់ ផ្លូវ៣៨ខ្សែនៅក្នុងទីក្រុងសៀមរាបនេះ ត្រូវបានសម្ពោធកាលពីថ្ងៃទី៣០ ខែវិច្ឆិកា ឆ្នាំ២០២០ ក្រោមអធិបតីភាពដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។ គម្រោងនេះ អនុវត្តដោយអង្គភាពសាងសង់ចំនួន៨រួមមាន៖១) កងវិស្វកម្មលេខ១៧៨ស្ពាន-ថ្នល់នៃ នាយកដ្ឋានវិស្វកម្ម២) កងវិស្វកម្មសម្តេចតេជោ ខេត្តសៀមរាប៣) កងវិស្វកម្មតេជោ ហ៊ុន សែន សៀមរាប៤) អគ្គនាយកដ្ឋានសាធារណការ៥) អគ្គនាយកដ្ឋានប្រព័ន្ធចម្រោះទឹកកខ្វក់៦) នាយកដ្ឋានគ្រឿងចក្រ និងស្ថាបនាផ្លូវ៧) នាយកដ្ឋានជួសជុល និងថែទាំផ្លូវថ្នល់ និង៨) មន្ទីរសាធារណការ និងដឹកជញ្ជូនខេត្តសៀមរាប។ គម្រោងនេះមានការរៀបចំលើគ្រប់ទិដ្ឋភាព ក្នុងនោះរួមមាន៖ ប្រព័ន្ធលូទឹកកខ្វក់ លូទឹកភ្លៀង ចិញ្ចើមផ្លូវ ផ្លូវថ្មើរជើង ផ្លូវសម្រាប់ជនមានពិការភាព ផ្លូវជិះកង់ ចំណតរថយន្ត ប្រព័ន្ធបំភ្លឺផ្លូវសាធារណៈ ផ្លាកសញ្ញា និងគំនូសចរាចរណ៍ ប្រព័ន្ធកាមេរ៉ាសុវត្ថិភាព អាងចម្រោះទឹកកខ្វក់ និងការធ្វើសួននិងដាំដើមឈើ។ ជាមួយគ្នានេះផងដែរ គម្រោងសាងសង់ហេដ្ឋារចនាសម្ព័ន្ធផ្លូវ ៣៨ខ្សែនេះ មានការគិតគូរយកចិត្តទុកដាក់ខ្ពស់ ក្នុងការសាងសង់ស្រទាប់គ្រឹះផ្លូវប្រកបដោយគុណភាព ជាប់រឹងមាំ ដោយគោរពតាមបទដ្ឋានបច្ចេកទេសសាងសង់ ចៀសវាងការសាងសង់រួច ត្រូវគាស់កកាយ ជួសជុលឡើងវិញដែលនាំឲ្យខាតបង់ថវិកាបន្ថែមទៀត រួមជាមួយការរៀបចំប្រព័ន្ធលូបង្ហូរទឹក ស្របទៅតាមស្តង់ដាបច្ចេកទេស ដើម្បីការពារកុំឲ្យមានការលិចលង់ និងចៀសវាងនាំឱ្យផ្លូវឆាប់ខូច ដោយមានការត្រួតពិនិត្យលក្ខណៈបច្ចេកទេសឲ្យបានល្អិតល្អន់ ជាមួយក្រុមការងារត្រួតពិនិត្យបច្ចេកទេស ជាពិសេស គុណភាពនៃសម្ភារបរិក្ខារ ដែលត្រូវប្រើប្រាស់សម្រាប់ការសាងសង់ ធានាបាននូវការប្រើបាស់សម្ភារបរិក្ខារមានគុណភាព ដើម្បីធានាឲ្យគុណភាពសំណង់មានភាពរឹងមាំ អាចទទួលយកបានពីគ្រប់ភាគីពាក់ព័ន្ធទាំងអស់។ ក្រៅពីស្ថាបនាហេដ្ឋារចនាសម្ព័ន្ធផ្លូវ ៣៨ខ្សែហើយនោះ ក៏នៅមានការស្ដារ កែលម្អធ្វើឲ្យប្រសើរឡើងដងស្ទឹងសៀម​រាបប្រវែងជាង៨គីឡូម៉ែត្រ អនុវត្តដោយអគ្គនាយកដ្ឋានប្រព័ន្ធចម្រោះទឹកកខ្វក់ នៃក្រសួងសាធារណការ និងដឹកជញ្ជូន ដើម្បីលើកកម្ពស់សោភ័ណភាពបន្ថែមទៀត ឲ្យស័ក្កិសមជាទីក្រុងទេសចរណ៍ វប្បធម៌ ប្រវត្តិសាស្រ្ដ និងធម្មជាតិ ក៏ដូចជាដើម្បីជួយជំរុញដល់កំណើនសេដ្ឋកិច្ចជាតិផងដែរ។ យោងតាមរបាយការណ៍ ដែលទទួលបានពីអង្គភាពទទួលការងារសាងសង់ទាំងអស់ បានឲ្យដឹងថា វឌ្ឍនភាពនៃការសាងសង់គិតត្រឹមសប្ដាហ៍ទី៤ ខែមករា ឆ្នាំ២០២១ ការងារសម្រេចបានជាង១៧ភាគរយ ហើយបច្ចុប្បន្នអង្គភាពសាងសង់ទាំងអស់ កំពុងខិតខំប្រឹងប្រែងបំពេញការងារយ៉ាងសកម្ម ដើម្បីបញ្ចប់គម្រោងរបស់ខ្លួនតាមផែនការដែលបានកំណត់៕