យើងខ្ញុំទាំងអស់គ្នាជាថ្នាក់ដឹកនាំ និងបុគ្គលិក-មន្រ្តីរាជការនៃក្រសួងសាធារណការ និងដឹកជញ្ជូន មានសេចក្តីសោមនស្សរីករាយយ៉ាងក្រៃលែងឥតឧបមា សូមគោរពថ្លែងអំណរគុណ និងដឹងគុណយ៉ាងជ្រាលជ្រៅជាទីបំផុត ចំពោះវត្តមានដ៏ឧត្តុង្គឧត្តមរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងសម្តេច ឯកឧត្តម-លោកជំទាវសមាជិកសភា-ព្រឹទ្ធសភា ថ្នាក់ដឹកនាំរាជរដ្ឋាភិបាល ឯកអគ្គរដ្ឋទូតនិងតំណាងអង្គទូតប្រចាំនៅកម្ពុជា អ្នកឧកញ៉ា-លោកឧកញ៉ា និងដៃគូអភិវឌ្ឍន៍នានា ដែលបានផ្តល់មហាកិត្តិយសដ៏ធំធេងអញ្ជើញជាអធិបតីភាពដ៏ខ្ពង់ខ្ពស់ និងជាភ្ញៀវកិត្តិយស ក្នុងព្រឹត្តការណ៍ជាប្រវត្តិសាស្រ្តនៃពិធីសម្ពោធបើកឱ្យប្រើប្រាស់ជាផ្លូវការ “អគារទីស្តីការក្រសួងសាធារណការ និងដឹកជញ្ជូន និងវិទ្យាស្ថាន តេជោសែន សាធារណការ និងដឹកជញ្ជូន” នាព្រឹក ថ្ងៃសុក្រ ៩កើត ខែមាឃ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២២ ខែមករា ឆ្នាំ២០២១ នេះ។ ក្នុងឱកាសឆ្នាំថ្មី ឆ្នាំ២០២១ នេះ សូមគោរពជូនពរ និងប្រសិទ្ធិពរជ័យ សិរីមង្គល វិបុលសុខ មហាប្រសើរ ជូនចំពោះ សម្តេចតេជោ សម្តេចកិត្តិព្រឹទ្ធបណ្ឌិត ព្រមទាំង បុត្រា បុត្រី ចៅប្រុស ចៅស្រី សម្តេច ឯកឧត្តម លោកជំទាវ អ្នកឧកញ៉ា-លោកឧកញ៉ា លោក លោកស្រី និងបងប្អូន ញាតិមិត្តទាំងអស់ សូមប្រកបដោយពុទ្ធពរនិងពរប្រាំប្រការ អាយុ វណ្ណៈ សុខៈ ពលៈ និងបដិភាណ កុំបីឃ្លៀងឃ្លាតឡើយ។