រាជធានីភ្នំពេញ ៖ ដោយសារតែមួយរយៈពេលនេះ នៅក្នុងមូលដ្ឋានខណ្ឌដង្កោ ករណីគ្រោះថ្នាក់ចរាចរណ៍កើតឡើងជាបន្តបន្ទាប់ បណ្តាលអោយមានមនុស្សស្លាប់ និងរងរបួស ពិការជាហូរហែរ ដែលបង្កឡើងដោយរថយន្តដឹកដី ដឹកថ្ម ក៍ដូចជារថយន្តកុងទីន័រ ជាដើម ។ ជាក់ស្តែង កាលពីវេលាម៉ោង ១៨ និង ៣០នាទី ព្រលប់ថ្ងៃទី១៨ ខែមករា ឆ្នាំ២០១៨ កន្លងទៅ នៅចំណុចតាមបណ្តោយផ្លូវជាតិលេខ៣ ភូមិវត្តស្លែង សង្កាត់ពងទឹក ខណ្ឌដង្កោ រថយន្ដកុងទីន័រ ១គ្រឿង បើកបុក និងកិនម៉ូតូ ១គ្រឿង បណ្ដាលអោយមនុស្សប្រុសស្រី ៣នាក់ ស្លាប់ភ្លាមៗ នៅកន្លែងកើតហេតុ និងក្មេងតូចម្នាក់ទៀតរងរបួសធ្ងន់ ត្រូវបានដឹកយកទៅសង្គ្រោះបន្ទាន់នៅមន្ទីរពេទ្យគន្ធបុប្ផា៤ ។ ​សពជនរងគ្រោះទាំង ៣នាក់ ទី១.ឈ្មោះ សឹម រដ្ផា ភេទប្រុស អាយុ ២៦ឆ្នាំ មុខរបរ ជាងផ្សាដែក ស្នាក់នៅភូមិព្រៃប្រាសាទ ឃុំដើមឫស្ស ស្រុកកណ្តាលស្ទឹង ខេត្តកណ្តាល (ស្លាប់នៅកន្លែងកើតហេតុ) ទី២.ឈ្មោះ មុត សុខគា ភេទស្រី អាយុ ២២ឆ្នាំ មុុខរបរ កម្មរោងចក្រ ស្នាក់នៅភូមិព្រៃប្រាសាទ ឃុំដើមឫស្ស ស្រុកកណ្តាលស្ទឹង ខេត្តកណ្តាល (ស្លាប់នៅកន្លែងកើតហេតុ) និងទី៣.ឈ្មោះ ម៉ៅ មុត ភេទប្រុស អាយុ ៧៥ឆ្នាំ មុខរបរ កសិករ ស្នាក់នៅភូមិព្រៃប្រាសាទ ឃុំដើមឫស្ស ស្រុកកណ្តាលស្ទឹង ខេត្តកណ្តាល (ស្លាប់នៅកន្លែងកើតហេតុ) ។ ចំណែកក្មេងតូចដែលរងរបួសធ្ងន់ ឈ្មោះ មុត ផានី ភេទប្រុស អាយុ ១ឆ្នាំកន្លះ ស្នាក់នៅជាមួយគ្នា ត្រូវបានដឹកយកទៅព្យាបាលនៅមន្ទីរពេទ្យគន្ធបុប្ផា៤ ។ ​ជុំវិញករណីគ្រោះថ្នាក់ចរាចរណ៍នេះ សមត្ថកិច្ចប្រាប់អោយដឹងថា មូលហេតុមកពីភាគីរថយន្តបើកបរមិនប្រកាន់ចំណែកផ្លូវរបស់ខ្លួន ទើបបង្កទៅជាហេតុការណ៍គ្រោះថ្នាក់ចរាចរណ៍កើតឡើង ។ ក្រៅពីនេះ ក៍នៅមានហេតុការណ៍គ្រោះថ្នាក់ចរាចរណ៍កើតឡើងបន្តបន្ទាប់ទៀត ដូចជា នៅចំណុចរង្វង់មូលដីក្រហម ហៅរង្វង់មូលស្រីកងស្រូវ ស្ថិតនៅភូមិកណ្ដាល សង្កាត់រលួស ខណ្ឌដង្កោ បង្កឡើងដោយរថយន្ដបែនដឹកថ្ម ១គ្រឿង ពាក់ស្លាកលេខ ភ្នំពេញ 3C-9368 បើកបរក្នុងល្បឿនលឿនតាមបណ្ដោយផ្លូវលេខ៣១A ទិសដៅពីលិចទៅកើត ដល់ចំណុចរង្វង់មូលស្រីកងស្រូវ មិនបង្អង់ល្បឿនបានបួងចង្កូតយ៉ាងខ្លាំងក្រឡាប់សង្កត់ម៉ូតូសង់កូរ៉េ ១គ្រឿង បណ្ដាលអោយប្ដីប្រពន្ធ ២នាក់ ដែលកំពុងធ្វើដំណើរដូចគ្នា ទទួលរងរបួសធ្ងន់ ត្រូវបានដឹកបញ្ជូនយកទៅសង្គ្រោះបន្ទាន់នៅមន្ទីរពេទ្យភ្លាមៗ ។ ចំណែកអ្នកបើកបររថយន្តបង្ក ក៍ត្រូវឃាត់ខ្លួនផងដែរ ។ ​គួរបញ្ជាក់ថា សម្រាប់ខែមករា ឆ្នាំ២០១៨ នេះ ករណីគ្រោះថ្នាក់ចរាចរណ៍នៅខណ្ឌដង្កោ កើតឡើងមិនតិចពី ៥ ទៅ ៦ករណី នោះទេ ដែលភាគច្រើនបង្កឡើងដោយសារតែរថយន្តដឹកដី ដឹកថ្ម ក៍ដូចជា រថយន្តកុងទីន័រជាដើម ដែលបណ្តាលអោយមានមនុស្សស្លាប់ និងរងរបួស ពិការ ជាហូរហែរ ។ ដោយសារតែបញ្ហាទាំងនេះ ប្រជាពលរដ្ឋសំណូមពរដល់ក្រសួងសាធារណការ និងដឹកជញ្ជូន គួរបន្តប្រតិបត្តិការចុះចាប់រថយន្តធុនធ្ងន់គ្រប់ប្រភេទបន្តទៀតនៅក្នុងមូលដ្ឋានខណ្ឌដង្កោ ដើម្បីកាត់បន្ថយអាត្រាគ្រោះថ្នាក់ចរាចរណ៍ ។ សូមបញ្ជាក់ថា កាលពីរសៀលថ្ងៃទី២៥ ខែតុលា ឆ្នាំ២០១៧ លោក សេង ឈួន អនុរដ្ឋលេខាធិការក្រសួងសាធារណការ និងដឹកជញ្ជូន និងជាប្រធានក្រុមការងារត្រួតពិនិត្យយានយន្តដឹកលើសទម្ងន់កម្រិតកំណត់ បានដឹកនាំកម្លាំងឆ្មក់ចុះទៅចាប់ត្រួតពិនិត្យរថយន្តដឹកដី ២៩គ្រឿង ពេលកំពុងធ្វើចរាចរណ៍ដឹកដីនៅលើដងផ្លូវសាធារណៈ ក្នុងភូមិទ័ពបោះ សង្កាត់ព្រៃវែង ខណ្ឌដង្កោ ។ ជាលទ្ធផល រកឃើញរថយន្តដឹកដី ចំនួន ២៩គ្រឿង ដឹកលើសទម្ងន់ចន្លោះពី ៥តោន រហូតដល់ទៅ ៣៣តោន ។ រថយន្តទាំងអស់ត្រូវបានឃាត់ទុក រង់ចាំម្ចាស់រថយន្តចូលខ្លួនដោះស្រាយទៅតាមនីតិវិធី ជាពិសេសត្រូវបង់ការផាកពិន័យទៅតាមច្បាប់ដឹកជញ្ជូន ដែលមានជាធរមាន ។ ចំពោះរថយន្តដឹកលើសទម្ងន់ទាំង ២៩គ្រឿង ត្រូវរងការផាកពិន័យសរុប ចំនួន ២០០លានរៀល ។ ជាមួយនិងប្រតិបត្តិការក្តៅបង្រ្កាបរថយន្តដឹកលើសទម្ងន់ទាំងនេះ លោក សេង ឈួន បានថ្លែងថា ដោយគោរពតាមការចង្អុលបង្ហាញពី លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន ក្រុមការងារត្រួតពិនិត្យយានយន្តដឹកលើសទម្ងន់កម្រិតកំណត់ នឹងចុះត្រួតពិនិត្យយានយន្តដឹកជញ្ជូននៅគ្រប់កន្លែងទាំងអស់ នៃរាជធានី ខេត្ត ដើម្បីរារាំងការដឹក​លើស​ទម្ងន់ ដែលនាំឲ្យខូចផ្លូវធ្ងន់ធ្ងរ ។ លោក សេង ឈួន បានគូសបញ្ជាក់ផងដែរថា ប្រតិបត្តិការបង្រ្កាបរថយន្តដឹកលើសទម្ងន់នេះ នឹងធ្វើឡើងដោយតម្លាភាព ដោយមិនមានការអន្តរាគមន៍ជាដាច់ខាត ទោះបីរថយន្តដឹកលើសទម្ងន់នោះ ជារបស់អ្នកមានឥទ្ធិពល ឬមានអំណាចក៏ដោយ ។ កន្លងមក លោកទេសរដ្ឋមន្រ្តី​ ស៊ុន ចាន់ថុល ធ្លាប់បានបញ្ជាក់ជារឿយៗថា ប្រតិបត្តិការទប់ស្កាត់រថយន្តដឹកជញ្ជូនលើសទម្ងន់នេះ គឺមិនរាថយនោះឡើយ ហើយធ្វើជាប់ជាប្រចាំថែមទៀតផង ។ លោកទេសរដ្ឋមន្រ្តី បានបញ្ជាក់ទៀតថា ប្រតិបត្តិការទប់ស្កាត់រថយន្តដឹកលើសទម្ងន់នេះ ធ្វើគ្រប់រថយន្ត និងស្មើភាព ដោយមិនមានការអន្តរាគមន៍នោះឡើយ បើទោះបីម្ចាស់រថយន្តដឹកជញ្ជូនទាំងនោះ ជាអ្នកមានអំណាច មានឥទ្ធិពល ឬក៏មានលុយក៏ដោយ ។ លោកទេសរដ្ឋមន្រ្តី ក៏បានអំពាវនាវដល់ម្ចាស់រថយន្តដឹកជញ្ជូន ឲ្យគោរពច្បាប់ដឹកជញ្ជូន និងកម្រិតទម្ងន់ ដែលកំណត់ដោយច្បាប់ ចៀសវាងការធ្វើឲ្យខូចខាតផ្លូវ ដែលរាជរដ្ឋាភិបាលខិតខំសាងសង់ឡើង ។ លោកទេសរដ្ឋមន្រ្តី បានបញ្ជាក់ផងដែរថា រាជរដ្ឋាភិបាល ក៏ដូចជាក្រសួង មិនចង់បានលុយផាកពិន័យពីការដឹកលើសទម្ងន់នោះទេ ព្រោះលុយយកពីការផាកពិន័យ មិនអាចយកមកទូទាត់ជាមួយទំហំនៃការខូចខាតផ្លូវ ហើយក៏មិនអាចយកជួសជុលផ្លូវឡើងវិញបាននោះឡើយ ៕