[Kampuchea Thmey] - អភិបាលរងស្រុកកំពង់ត្រាច ចុះពិនិត្យការជួសជុលស្ពានឆ្លងប្រឡាយកំពុងទ្រុឌទ្រោម - Kampuchea Thmey
2020-05-18
ទៅកាន់ទំព័រចុះផ្សាយក្នុង Kampuchea Thmey
កំពត ៖ កាលពីរសៀលថ្ងៃទី១៧ ខែឧសភា ឆ្នាំ២០២០ អភិបាលរងស្រុកកំពង់ត្រាច រួមជាមួយលោកមេឃុំ លោកមេភូមិ កោះទ្រមូង ឃុំបឹងសាលាខាងជើង បានពិនិត្យដំណើរការជួសជុលស្ពានឆ្លងកាត់ប្រឡាយដែលកំពុងទ្រុឌទ្រោម ហើយបាក់ស្រុតកន្លងមក។
ក្នុងដំណើរចុះពិនិត្យការជួសជុលនេះ លោក ជួន សុភា អភិបាលរងស្រុកកំពង់ត្រាច បានឲ្យដឹងថា ស្ពាននេះ ជួសជុលឡើងវិញ ដោយការដឹកនាំរបស់លោកមេឃុំ លោកមេភូមិ និងកម្លាំងសាមគ្គីរបស់បងប្អូនប្រជាពលរដ្ឋក្នុងសហគមន៍ ព្រមទាំងសប្បុរសជន ដែលបានជួយជ្រោមជ្រែងផ្តល់ជាសម្ភារៈនិងថវិកាសម្រាប់ធ្វើការជួសជុល។
ជាងនេះទៅទៀត ចំពោះសមិទ្ធផលនេះ គឺបានកើតឡើងដោយសារកម្លាំងសាមគ្គីរបស់បងប្អូនក្រុមជាងសំណង់យើងនៅក្នុងភូមិ ដែលរួមគ្នាជាកម្លាំងពលកម្ម និងពេលវេលាជួយការងារនេះ ហើយមិនបានគិតកម្រៃថ្លៃឈ្នួលអ្វីឡើយ។
ក្នុងឱកាសនោះ លោកអភិបាលរងស្រុក ក៏សូមថ្លែងអំណរគុណដល់បងប្អូនសប្បុរសជន និងបងប្អូនក្នុងសហគមន៍យើង ដែលបានចូលរួមគ្រប់សកម្មភាព នៃការអភិវឌ្ឍក្នុងមូលដ្ឋាន សំដៅការឆ្លើយតបនូវតម្រូវការជាក់ស្ដែងរបស់ប្រជាពលរដ្ឋ។
សូមបញ្ជាក់ផងដែរថា ស្ពានមួយនេះ បើបានជួសជុលរួចរាល់ហើយកាលណា នឹងផ្តល់ភាពងាយស្រួលសម្រាប់ការធ្វើដំណើរឆ្លងកាត់របស់បងប្អូនប្រជាពលរដ្ឋ ពិសេសសិស្សានុសិស្ស។ សង្ឃឹមថា បើបងប្អូនទទួលបានសមិទ្ធផលនេះហើយពិតជាជួយថែរក្សាឲ្យបានគង់វង្សយូរអង្វែងសម្រាប់បន្តដល់កូនចៅជំនាន់ក្រោយ៕
អត្ថបទ ៖ សេង ណារិទ្ធ
