ភ្នំពេញ៖ ប្រធានមន្ទីរសាធារណការនិងដឹកជញ្ជូនរាជធានីភ្នំពេញ លោកសាំ ពិសិដ្ឋ បានឱ្យដឹងនៅយប់ថ្ងៃ៣០មេសានេះថា ស្ពានអាកាសក្បាលថ្នល់ បត់ឆ្វេងឡើងកំណោងពីទិសមហាវិថី ព្រះមុនីវង្ស ឆ្ពោះចុះទៅមហាវិថី ព្រះនរោត្តម នឹងដាក់អោយប្រើប្រាស់ចាប់ពីថ្ងៃទី១ ខែឧសភាឆ្នាំ២០២០ វេលាម៉ោង ៨:០០ព្រឹកតទៅ ពោលគឺចំថ្ងៃខួបអនុស្សារវរីយ៍ ពលកម្មអន្តរជាតិ០១ឧសភា។ លោកម៉េត មាសភ័ក្ដី អ្នកនាំពាក្យសាលារាជធានីភ្នំពេញបានឱ្យដឹងនាយប់ថ្ងៃទី៣០ ខែមេសានេះដែរថា ការបើកអោយដំណើរការស្ពានអាកាសបត់ឆ្វេងខាងលើនេះដើម្បីសម្រួលដល់ការកកស្ទះចរាចរណ៍ដោយកំណើនប្រជាជន ក៏ដូចជាកំណើនមធ្យោបាយធ្វើដំណើរ។​ គួររំលឹកថា ស្ពានអាកាសក្បាលថ្នល់ពីមហាវិថីព្រះមុនីវង្សទៅវិថីព្រះនរោត្តមមានប្រវែង៧៧ ម៉ែត្រពីផ្លូវដីដល់គល់ស្ពានក្បាលថ្នល់និងពីគល់ស្ពានដល់ស្ពានអាកាសចាស់១២៣ម៉ែត្រ សរុប២០០ម៉ែត្រ ។ ស្ពាននេះមានទទឹង ៧,៥ម៉ែត្រពីមហាវិថីព្រះមុនីវង្ស បត់ឆ្វេងឡើងស្ពានឆ្ពោះទៅមហាវិថីព្រះនរោត្តម។ បច្ចុប្បន្ននេះនៅក្នុងរាជធានីភ្នំពេញមានស្ពានអាកាសចំនួន៦ កន្លែងហើយ គឺ ស្ពានអា កកាសក្បាលថ្នល់ ស្ពានអាកាសស្ទឹងមានជ័យ ស្ពានអាកាស៧ មករា ស្ពានអាកាស៥មករា ស្ពានអាកាសស្តុបផ្សារដីហុយ និងស្ពានអាកាសចោមចៅ ដែលស្ពាននេះក្រុមការងារបាននឹងកំពុងបើកការដ្ឋានស្ថាបនាយ៉ាងញាប់ដៃញាប់ជើង ដូចស្ពានអាកកាសក្បាលថ្នល់នេះដែរ ៕ អត្ថបទ៖ ស្រីរ័ត្ន​