ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានបានបញ្ជាក់ពីគម្រោងស្ពានមិត្តភាព កម្ពុជា-កូរ៉េ ឆ្លងកាត់ទន្លេមេគង្គទៅកាន់តំបន់អរិយក្សត្រសម្រេចជាផ្លូវការនៅឆ្នាំ ២០២០នេះ ខណៈដែលសម្តេចតេជោ បានស្នើរួចហើយទៅកាន់លោកប្រធានាធិបតីកូរ៉េកាលពីកន្លងមកនេះ។ សម្តេចតេជោ ហ៊ុន សែន នាយករដ្ឋមន្ត្រី ហ៊ុន សែន នៅក្នុងពេលអញ្ជើញសម្ពោធបើកការដ្ឋានស្តារ និង សាងសង់ផ្លូវជាតិលេខ២ និង លេខ២២ នៅព្រឹកថ្ងៃទី ១១ ខែ កុម្ភះ ឆ្នាំ ២០២០ នេះ បានស្នើមិត្តរដ្ឋាភិបាលកូរ៉េខាងត្បូង ដើម្បីជួយកសាងស្ពានឆ្លងកាត់ទន្លេមេគង្គពីតំបន់ជ្រោយចង្វារឆ្ពោះទៅកាន់ស្វាយជ្រំនៅតំបន់អរិយក្សត្រ ។ សម្តេចតេជោថា កន្លងមកនេះកម្ពុជាយើងក៏បានទទួលនូវជំនួយក្នុងការកសាងស្ពានមិត្តភាពធំៗមួយចំនួន ដូចជាស្ពានមិត្តភាពកម្ពុជា-ចិន និងស្ពានមិត្តភាពកម្ពុជា-ជប៉ុនជាដើម។សម្តេចតេជោ បន្ថែមថា នៅឆ្នាំ ២០២០ នេះ កម្ពុជាចង់បានស្ពាននិមិត្តរូបនៃមិត្តភាពរវាងកម្ពុជានិងកូរ៉េ ដែលជាស្ពានតម្រូវការចាំបាច់បំផុតមួយសម្រាប់ជួយសម្រួលដល់ការធ្វើដំណើររបស់បងប្អូនប្រជាពលរដ្ឋនិងអាជីវករពីរាជធានីភ្នំពេញឆ្ពោះទៅកាន់តំបន់អរិយក្សត្រនិងឆ្ពោះទៅតាមបណ្តាតំបន់និងខេត្តផ្សេងៗមួយចំនួនទៀតនៅត្រើយម្ខាងនៃទន្លេមេគង្គ។ បើតាមសម្តេចតេជោ ស្ពានមិត្តភាពកម្ពុជា-កូរ៉េ ឆ្លងកាត់ទន្លេមេគង្គទៅកាន់តំបន់អរិយក្សត្រ គ្រោងចំណាយលើការសាងសង់ក្នុងតម្លៃប្រមាណ ៤០ ទៅ ៥០លានដុល្លារអាមេរិក។ ទន្ទឹមនឹងនេះដែរ កម្ពុជាសូមអរគុណមិត្តកូរ៉េចំពោះជំនួយហិរញ្ញប្បទានប្រមាណ៧០០ លានដុល្លារអាមេរិក ដើម្បីចូលរួមជួយកសាងហេដ្ឋារចនាសម្ព័ន្ធផ្សេងៗនៅកម្ពុជាចាប់ពីឆ្នាំ ២០១៩ ដល់ ២០២៣។ សម្ដេចតេជោ ហ៊ុន សែន បានមានប្រសាសន៍ថា “តំបន់ត្រើយម្ខាងនៅអរិយក្សត្រ វាជាតំបន់អភិវឌ្ឍន៍ទៅជាទីក្រុងរណបដ៏ធំមួយ យើងត្រូវកសាងស្ពានតភ្ជាប់ជាមួយតំបន់ជ្រោយចង្វារដើម្បីងាយស្រួលក្នុងការធ្វើដំណើរ។ យើងមានស្ពានរួចហើយ នៅខាងលើគឺស្ពានព្រែកតាម៉ាក់ ប៉ុន្តែវាឆ្ងាយ បើចំណេញពេលគឺឆ្លងស្ពានជ្រោយចង្វារ ហើយឆ្លងស្ពានទៅស្វាយជ្រុំ- អរិយក្សត្រ គឺលឿន។ យើងចាំបាច់ត្រូវមានការសិក្សា និងលើកគម្រោង យើងនឹងមានស្ពានមួយខ្សែទៀតពីក្ដីតាកុយ ផ្លូវជាតិលេខ១ ទៅខាងត្រើយម្ខាងទៀត”។ សម្ដេចតេជោបានបន្តទៀតថា “សព្វថ្ងៃនេះប្រជាពលរដ្ឋរបស់យើងមួយចំនួននៅឆ្លងទូកដរ រវាងភ្នំពេញ-អរិយក្សត្រ ចឹងទេ យើងចង់បញ្ចប់ស្ថានភាពនៃការឆ្លងនៅក្បែរៗក្រុង ដោយមិនចាំបាច់វៀង ឬចាំឆ្លងទូកដរ។ បើយោងទៅលើការសិក្សា តម្លៃស្ពាននេះត្រឹម ៤០-៥០ដុល្លារតែប៉ុណ្ណោះ”៕