កាលពីថ្ងៃទី២៩ ខែមីនា ឆ្នាំ២០២២នេះ អាជ្ញាធរខេត្ដសៀមរាប បានចុះពិនិត្យមើលស្ថានភាពហេដ្ឋាចរនាសម្ព័ន្ធផ្លូវ៣៨ខ្សែ នាក្រុងសៀមរាប ដើម្បីណែនាំឱ្យអង្គភាពពាក់ព័ន្ធ កែសម្រួលបរិស្ថាន អនាម័យ និងសណ្ដាប់ធ្នាប់ មុនមុនបើកសម្ភោធដាក់ឱ្យប្រើប្រាស់ជាផ្លូវការ នៅដើមខែមេសា ឆ្នាំ២០២២ខាងមុខនេះ ។ ឯកឧត្ដម ទៀ សីហា អភិបាលខេត្ដសៀមរាប មានប្រសាសន៍ថា គម្រោងហេដ្ឋាចរនាសម័ន្ធផ្លូវ ៣៨ខ្សែនៅក្រុងសៀមរាបនេះ គឺជាកាដូរពិសេសមួយដែលសម្ដេចតេជោនាយករដ្ឋមន្ដ្រី ផ្តល់សម្រាប់ជាចំណដៃជូនប្រជាពលរដ្ឋខ្មែរនៅខេត្តសៀមរាប ដើម្បីបំរើដល់ធ្វើដំណើរឱ្យមានភាពងាយស្រួលដល់ពួកគាត់ ជាពិសេសងាយស្រួលដល់ប្រតិបត្ដិករទេសចរណ៍ ភ្ញៀវជាតិ និងអន្តរជាតិ ដែលមកទស្សនាកំសាន្តនៅក្នុងខេត្តវប្បធម៌ប្រវត្តិសាស្ត្រមួយនេះ។ ឯកឧត្ដម បានបន្ដថា នាពេលបច្ចុប្បន្ននេះ ផ្លូវ៣៨ខ្សែក្នុងក្រុងសៀមរាប បានបង្ហាញសម្រស់ដ៍ស្រស់បំព្រង ដោយមានការទាក់ទាញអ្នកទេសចរគ្រប់ជាតិសាសន៍បានយ៉ាងច្រើន។ ប៉ុន្ដែអ្វីដែលធ្វើឱ្យកាន់តែប្រសើរ និងមានភាពស្រស់ស្អាតបន្ដទៀត អាជ្ញាធរគ្រប់លំដាប់ថ្នាក់ ឬក្រុមការងារពាក់ព័ន្ធ ត្រូវមើលថែរក្សាឱ្យបានល្អទំាងបរិស្ថាន សណ្ដាប់ធ្នាប់ ជាពិសេសប្រជាពលរដ្ឋ ត្រូវចូលរួមថែរក្សានៅខាងមុខផ្ទះរបស់ខ្លួនឱ្យបានជាប់ជាប្រចាំ ដើម្បីជាសោភណ្ឌភាពតាមដងផ្លូវ។ ឯកឧត្ដម បានបន្ដថា ស្ថាប័នពាក់ព័ន្ធចុះត្រួតពិនិត្យមើលបន្ថែមទៀតនូវចំណុចខ្វះខាត និងនៅសេសសល់ ដើម្បីឱ្យក្រុមការងារបំពេញបន្ថែមនៅចំណុចខ្វះចន្លោះ។ ការចុះត្រួតពិនិត្យនេះ រួមមានអនាម័យ ការទឹកដក់លើផ្លូវ សំរាម និងស្លាកសញ្ញាចរាចរណ៍ផ្សេងៗ ខណ: ដែលផ្លូវ៣៨ខ្សែនេះ មានគម្រោងសម្ភោធដាក់ឱ្យប្រើប្រាស់ជាផ្លូវការនៅថ្ងៃទី០៤ ខែមេសា ឆ្នាំ២០២២ខាងមុខនេះ។ សូមជម្រាបថា បើទោះជាស្ថិតក្នុងដំណាក់កាល នៃផលប៉ះពាល់ដោយសារជំងឺកូវីដ-១៩ ដ៏ធ្ងន់ធ្ងរក៏ដោយ ក៏រដ្ឋបាលខេត្ត និងមានការគាំទ្រពីរាជរដ្ឋាភិបាល បាននឹងកំពុងជំរុញ និងយកចិត្តទុកដាក់លើការកែលម្អសោភ័ណភាពក្រុងឱ្យបានកាន់តែល្អប្រសើរថែមទៀត។ សក្ខីភាពហេដ្ឋារចនាសម្ព័ន្ធផ្លូវថ្នល់ ៣៨ខ្សែ ប្រព័ន្ធលូ ភ្លើងបំភ្លឺសាធារណ: និងកែលម្អស្ទឹងសៀមរាប ក្នុងក្រុងសៀមរាបគឺជាសមិទ្ធផលប្រវត្តិសាស្រ្តថ្មីមួយមិនអាចកាត់ថ្លៃបានរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ដែលមកដល់ពេលនេះ យើងបានសម្រេច នៃការសាងសង់ផ្លូវបាន១០០% ហើយគ្រោងនឹងធ្វើពិធីសម្ពោធដាក់ឱ្យប្រើប្រាស់ជាផ្លូវការនាថ្ងៃទី០៤ ខែមេសា ឆ្នាំ២០២២ខាងមុខ ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ នាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត៕ អត្ថបទ និងរូបភាព: លោកបូ សាវី កែសម្រួលដោយ លីវ សុខុន