រាជធានីភ្នំពេញ៖ គិតត្រឹមដើមខែឧសភា ឆ្នាំ២០២៥ គម្រោងសាងសង់ស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) សម្រេចបានប្រមាណ៣៣,៥០ភាគរយ។ នេះបើតាមការបញ្ជាក់របស់ក្រសួងសាធារណការ និងដឹកជញ្ជូន...។ក្រសួងគូសបញ្ជាក់ថា គម្រោងនេះ ត្រូវបានបើកការដ្ឋានសាងសង់កាលពីថ្ងៃទី១៩ ខែកុម្ភៈ ឆ្នាំ២០២៤ ក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោក វ៉ាង វិនធៀន ឯកអគ្គរដ្ឋទូតសាធារណរដ្ឋប្រជាមានិតចិនប្រចាំកម្ពុជា។ បច្ចុប្បន្ន ការងារសាងសង់ស្ពានផ្នែកខាងកើត សម្រេចបានរួមមាន៖ ទី១.ផ្នែកគ្រឹះស្ពាន សម្រេចបានប្រមាណ៥៥ភាគរយ ក្នុងនោះចាក់បេតុងសសរគ្រឹះបានចំនួន១០៧ដើម (ក្នុងចំណោម១៥៦ដើម) សាងសង់ជើងតាងបាន៦ជើងតាង (ក្នុងចំណោម២០ជើងតាង) និងធ្នឹមភ្ជាប់ក្រោមបានចំនួន ៨ធ្នឹម (ក្នុងចំណោម១២ធ្នឹម)។ចំណែកទី២.ផ្នែករចនាសម្ព័ន្ធក្រោមស្ពាន សម្រេចបាន៣១,៥ភាគរយដែលរួមមាន៖ ការសាងសង់តួសរសរស្ពានបាន៦តួសរសរ(ក្នុងចំណោម១២តួសរសរ) សាងសង់សរសេរស្ពានបាន១៦សរសរស្ពាន (ក្នុងចំណោម៥២សរសេរស្ពាន) និងសាងសង់ធ្នឹមភ្ជាប់ក្បាលសរសរទទឹងស្ពានបាន១០ធ្នឹម(ក្នុងចំណោម៣៤ធ្នឹម) ព្រមទាំងការងារសំខាន់ៗមួយចំនួនទៀត។ រយៈពេលនៃសាងសង់គិតត្រឹមខែកុម្ភៈ ឆ្នាំ២០២៥ សម្រេចបាន១៣ខែហើយ ស្មើ៣១ភាគរយនៃផែនការសាងសង់៤២ខែ ដោយមិនមានការយឺតយ៉ាវជាងកម្មវិធីការងារដែលគ្រោងទុកឡើយ៕