ភ្នំពេញៈ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានស្នើឲ្យ ធនាគារអភិវឌ្ឍន៍ចិន (CDB) ពិនិត្យកិច្ចសហប្រតិបត្តិការបន្ថែមទៀត លើគម្រោងវិនិយោគចិននៅកម្ពុជាទាក់ទងហេដ្ឋារចនាសម្ព័ន្ធផ្លូវថ្នល់ ។ ក្នុងជំនួបពិភាក្សាការងារជាមួយលោក Mei Shiwen នាយកចាត់ការទូទៅរបស់ CDB សាខាខេត្តក្វាងស៊ី ប្រទេសចិន កាលពីថ្ងៃទី២៤ ខែតុលា ឆ្នាំ២០១៩ លោក ស៊ុន ចាន់ថុល ថ្លែងអំណរគុណCDB ផ្តល់ ហិរញ្ញប្បទានដល់គម្រោងសាងសង់ផ្លូវល្បឿនលឿនពីភ្នំពេញ-ព្រះសីហនុ និងគម្រោងដទៃទៀតនៅកម្ពុជាឲ្យដំណើរការបានដោយរលូន។ លោកមានប្រសាសន៍ថា “ស្នើឲ្យធនាគារ CDB ពិនិត្យមើលកិច្ចសហប្រតិបត្តិការបន្ថែមទៀត លើគម្រោងវិនិយោគចិននៅកម្ពុជា ដែលទាក់ទងនឹងហេដ្ឋារចនាសម្ព័ន្ធផ្លូវថ្នល់ ផ្លូវល្បឿនលឿន ការអភិវឌ្ឍកំពង់ផែ ការដឹកជញ្ជូនផ្លូវដែក និងប្រព័ន្ធដឹកជញ្ជូនក្នុងទីក្រុង ជាពិសេសការដឹកជញ្ជូនតាមផ្លូវទឹក”។ ឆ្លៀតឱកាសនោះ រដ្ឋមន្ដ្រីសាធារណការក៏ស្នើឲ្យ CDB ពិនិត្យលទ្ធភាពផ្តល់ការគំាទ្រផ្នែកហិរញ្ញវត្ថុលើយុទ្ធនាការផ្សព្វផ្សាយសាធារណៈពីគ្រោះថ្នាក់ចរាចរណ៍ ការផ្សព្វផ្សាយតាមទូរទស្សន៍ពី ផលលំបាកនិងការខាតបង់ដោយសារគ្រោះថ្នាក់ចរាចរណ៍ យុទ្ធនាការចែកមួកសុវត្ថិភាពចរាចរណ៍ និងយុទ្ធនាការផ្សេងៗថែមទៀត ដើម្បីកាត់បន្ថយគ្រោះថ្នាក់ចរាចរណ៍នៅកម្ពុជា។ សូមបញ្ជាក់ថា ធនាគារអភិវឌ្ឍន៍ចិន (CDB) ជាធនាគារឯកជនរបស់រដ្ឋ ក្រោមការដឹកនាំផ្ទាល់ពី ក្រុមប្រឹក្សារដ្ឋចិន ។ បច្ចុប្បន្ន CDB បានផ្តល់ហិរញ្ញប្បទានដល់គម្រោងធំៗ ចំនួន២នៅកម្ពុជា រួមមាន ៖គម្រោងផ្លូវល្បឿនលឿន ភ្នំពេញ-ព្រះសីហនុ និងគម្រោងព្រលានយន្តហោះសៀមរាបថ្មី ។ លើសពីនេះទៀត CDB ចាប់អារម្មណ៍ក្នុងការវិនិយោគលើអាកាសយានដ្ឋានភ្នំពេញថ្មី និងការអភិវឌ្ឍមជ្ឈមណ្ឌលភស្តុភារកម្ម និងកំពង់ផែក្រុងព្រះសីហនុផងដែរ៕