ក្រសួងសាធារណការ និងដឹកជញ្ជូន រៀបចំសិក្ខាសាលាផ្សព្វផ្សាយគម្រោងកម្មវិធីវិនិយោគសាធារណៈ ៣ឆ្នាំរំកិល ២០២៦-២០២៨ និងការបណ្តុះបណ្តាលមន្ត្រីបង្គោលលើការរៀបចំគម្រោងកម្មវិធីវិនិយោគសាធារណៈ ៣ឆ្នាំរំកិល ២០២៧-២០២៩ រាជធានីភ្នំពេញ៖ នាថ្ងៃចន្ទ ទី១៥ ខែធ្នូ ឆ្នាំ២០២៥ លោកជំទាវ កុយ សុដានី រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន បានអញ្ជើញជាអធិបតីបើកសិក្ខាសាលាផ្សព្វផ្សាយគម្រោងកម្មវិធីវិនិយោគសាធារណៈ ៣ឆ្នាំរំកិល ២០២៦-២០២៨ និងការបណ្តុះបណ្តាលមន្ត្រីបង្គោលលើការរៀបចំគម្រោងកម្មវិធីវិនិយោគសាធារណៈ ៣ឆ្នាំរំកិល ២០២៧-២០២៩ ដោយមានការអញ្ជើញចូលរួមពី ឯកឧត្តម លោកជំទាវ ជាគណៈអធិបតី វាគ្មិនកិត្តិយសមកពីក្រសួងផែនការ និងសិក្ខាកាមចូលរួមសរុប ប្រមាណ១៦០រូប មកពីអគ្គនាយកដ្ឋាន និងនាយកដ្ឋានជំនាញពាក់ព័ន្ធ ព្រមទាំងមន្ទីរសាធារណការ និងដឹកជញ្ជូនទាំង២៥រាជធានី-ខេត្ត។ សិក្ខាសាលានេះត្រូវបានរៀបចំឡើងក្នុងគោលបំណង ១). ផ្សព្វផ្សាយគម្រោងកម្មវិធីវិនិយោគសាធារណៈ ៣ឆ្នាំរំកិល ២០២៦-២០២៨ ជូនដល់ថ្នាក់ដឹកនាំទទួលបន្ទុកលើការងារទំនាក់ទំនងជាមួយដៃគូអភិវឌ្ឍន៍ អង្គភាពគ្រប់គ្រងគម្រោង និងអង្គភាពក្រោមឱវាទក្រសួង ដើម្បីឱ្យបានជ្រាបច្បាស់ពីបញ្ជីអាទិភាពគម្រោងក្នុងវិស័យសាធារណការ និងដឹកជញ្ជូន និង ២). បណ្តុះបណ្តាលមន្ត្រីបង្គោលរបស់ក្រសួងទាំងថ្នាក់ជាតិ និងថ្នាក់ក្រោមជាតិ ដើម្បីពង្រឹងសមត្ថភាពឱ្យកាន់តែប្រសើរបន្ថែមទៀតលើការរៀបចំកម្មវិធីវិនិយោគសាធារណៈ ៣ឆ្នាំរំកិល នាឆ្នាំបន្តបន្ទាប់ ឱ្យបានគ្រប់ជ្រុងជ្រោយ មានសង្គតិភាព និងមានប្រសិទ្ធភាពខ្ពស់នៅតាមអង្គភាពរបស់ខ្លួនក្នុងស្មារតីបុរេសកម្ម សកម្ម និងអន្តរសកម្មបំផុត ស្របតាមអភិក្រម “ជវភាពនៃប្រព័ន្ធតួអង្គតែមួយ”។ ឆ្លៀតក្នុងឱកាសនោះ លោកជំទាវរដ្ឋលេខាធិការប្រចាំការ បានថ្លែងនូវការកោតសរសើរ និងវាយតម្លៃខ្ពស់ចំពោះក្រុមការងារសម្របសម្រួលកម្មវិធីវិនិយោគសាធារណៈនៃអគ្គនាយកដ្ឋានផែនការ និងគោលនយោបាយ និងអង្គភាពក្រោមឱវាទក្រសួងពាក់ព័ន្ធដែលបានផ្តល់កិច្ចសហការ និងខិតខំប្រឹងប្រែងជាមួយគ្នាយ៉ាងសកម្មក្នុងការសម្រេចបាននូវលទ្ធផលការងារលើការរៀបចំសៀវភៅគម្រោងកម្មវិធីវិនិយោគសាធារណៈ ៣ឆ្នាំរំកិល ២០២៦-២០២៨ ក្នុងវិស័យសាធារណការ និងដឹកជញ្ជូន ស្របតាមការចង្អុលបង្ហាញ និងការកំណត់ទិសដៅគោលនយោបាយរបស់រាជរដ្ឋាភិបាល ប្រកបដោយប្រសិទ្ធភាព និងទទួលបានជោគជ័យ៕