ភ្នំពេញ ៖ លោក ស៊ុន ចាន់ថុល ទេសរដ្ឋមន្រ្តី រដ្ឋមន្ត្រីក្រសួងសាធារណការ និងជាប្រធានសហព័ន្ធខ្មែរកីឡាហែលទឹក បានលើកឡើងថា កម្ពុជានឹងធ្វើជាម្ចាស់ផ្ទះ នៃការប្រកួតកីឡាហែលទឹកយុវជនអាស៊ីអាគ្នេយ៍ លើកទី៤៣ ចាប់ពីថ្ងៃទី២៨ ដល់ថ្ងៃទី៣០ ខែមិថុនា ឆ្នាំ២០១៩។ នេះបើយោងតាមហ្វេសប៊ុក របស់ក្រសួង សាធារណការ។ ក្នុងនោះ គណៈកម្មាធិការប្រតិបត្តិសហព័ន្ធខ្មែរ កីឡាហែលទឹក ក៏នឹងរៀបចំទទួលកីឡាករ-កីឡាការិនីហែលទឹក ជាង២០០នាក់ មកពីបណ្តាប្រទេសអាស៊ាន ដើម្បីចូលរួមប្រកួតផងដែរ ។ កិច្ចប្រជុំពិភាក្សាការងារ របស់គណៈកម្មាធិការប្រតិបត្តិសហព័ន្ធខ្មែរកីឡាហែលទឹក មានការចូលរួមពីមន្ត្រីជាន់ខ្ពស់ក្រសួង និងសមាជិកសហព័ន្ធខ្មែរកីឡាហែលទឹក កាលពីថ្ងៃទី២៣ ខែឧសភា ឆ្នាំ២០១៩ លោកទេសរដ្ឋមន្រ្តី បានគូសបញ្ជាក់ពីការខិតខំប្រឹងប្រែង ក្នុងការស្វែងរកប្រភពថវិកាពីសប្បុរសជន និងក្រុមហ៊ុនឯកជននានា ដើម្បីអភិវឌ្ឍន៍វិស័យកីឡាហែលទឹក នៅកម្ពុជាឲ្យរីកចម្រើន និងស្វែងរកមេដាយជូនជាតិ បានច្រើន ក្នុងព្រឹត្តិការណ៍កីឡាស៊ីហ្គេម ដែលកម្ពុជានឹងធ្វើម្ចាស់ផ្ទះឆ្នាំ២០២៣ ខាងមុខ ។ ក្នុងឱកាសនោះដែរ លោក ស៊ុន ចាន់ថុលក៏ បានផ្តាំផ្ញើ និងជំរុញលើកទឹកចិត្តកីឡាករ-កីឡាការិនី ទាំងអស់ខិតខំប្រឹងប្រែងហ្វឹកហាត់ ដើម្បីត្រៀមយកមេដាយជូនជាតិ ក្នុងព្រឹត្តិការណ៍ស៊ីហ្គេម ដែលកម្ពុជាគ្រោងធ្វើជាម្ចាស់ផ្ទះនៅ២០២៣ខាងមុខ ៕