រដ្ឋបាលខេត្តក្រចេះបានបង្ហាញពីវឌ្ឍនភាពនៃការអភិវឌ្ឍក្នុងខេត្ត ខណៈមានសមិទ្ធផលថ្មីៗជាច្រើនបានលេចរូបរាងជាបន្តបន្ទាប់ ស្របពេលដែលខេត្តជាប់ដងទន្លេនេះ ត្រូវបានរដ្ឋាភិបាលដាក់ផែនការជំរុញលើកទឹកចិត្តការវិនិយោគក្នុងចំណោមខេត្តទាំង ៤ នៅតំបន់ភូមិភាគឦសាន។សមិទ្ធផលសំខាន់ៗនៃការអភិវឌ្ឍដែលខេត្តសម្រេចបានមានដូចជា៖ “ស្ពានមិត្តភាពកម្ពុជា-ចិន មេគង្គក្រចេះ” ប្រវែង ១.៧៦១ ម៉ែត្រ សម្រេចបាន ៩៨,៣៩% ដែលនឹងបើកឱ្យប្រជាពលរដ្ឋធ្វើ ដំណើរឆ្លងកាត់ចាប់ពីថ្ងៃទី១ ខែមេសា ឆ្នាំ២០២៦ ខាងមុខនេះ និងផ្លូវតភ្ជាប់ប្រវែង ៣១,៦៩ គីឡូម៉ែត្រ សម្រេចបាន ៩៧,១១%, គម្រោងសាងសង់បណ្តាញលូ និងស្ថានីយបូមទឹកភ្លៀងក្រុង ក្រចេះសម្រេចបាន ៣៩,៩៨%, គម្រោងកែលម្អសោភ័ណភាពក្នុងទីរួមខេត្ត៖ រង្វង់មូលព្រាបស រង្វង់មូលនាគបាញ់ទឹក (វិមានឯករាជ្យ) កន្លែងហាត់ប្រាណ និងកន្លែងក្មេងលេង ដាក់បង់អង្គុយ និង ដាក់អំពូលភ្លើងបំភ្លឺនៅតាមមាត់ទន្លេសម្រេចបាន ៤០,៧៥%, និងគម្រោងកែលម្អទីលានកប់សំរាមចាស់ឱ្យទៅជាតំបន់បៃតងសម្រេចបាន ១៥,៣៦%។ វិស័យកសិកម្ម ខេត្តមានក្រុមហ៊ុនវិនិយោគសរុប ៤៨ ក្រុមហ៊ុន វិនិយោគដោយក្រុមហ៊ុនមកពីប្រទេសវៀតណាម,ចិន, ឥណ្ឌា,អង់គ្លេស, កូរ៉េ,អូស្ត្រាលី,និងក្រុមហ៊ុនក្នុងស្រុក។ ដំណាំដាំដុះសំខាន់ៗមាន៖ ដំណាំកៅស៊ូនៅលើផ្ទៃដីទំហំ ៩៣.៤៧៧,៨២ ហិកតា, ស្វាយចន្ទីចំនួន ១០២.៥២០ ហិកតា, ដំឡូងមី ៧៧.៥១៤ហិកតា, ៧៧.៥១៤ហិកតា, ចេកអំបូងលឿង ៣.១៤៥ហិកតា, អំពៅ ៦.៧០០ហិកតា, និង មានដំណាំឈើហូបផ្លែជាច្រើនពាន់ហិកតាថែមទៀត ខណៈក្នុងខេត្តមានក្រុមហ៊ុនចិញ្ចឹមសត្វគោ ១កន្លែង មានគោ ២២ ៧២៤ ក្បាល និងកំពុងធ្វើការពង្រីកការចិញ្ចឹមបន្ថែម។ខេត្តក្រចេះមានតំបន់សេដ្ឋកិច្ចពិសេស ១ កន្លែង អភិវឌ្ឍនៅលើផ្ទៃដីចំនួន ៨១៨ ហិកតា និងមានក្រុមហ៊ុនចំនួន ១២ កំពុងវិនិយោគ និងកំពុងដំណើរការសាងសង់បន្តបន្ទាប់ ខណៈក្រុមហ៊ុនចំនួន ៧ កំពុងដំណើរការខ្សែសង្វាក់ផលិតកម្ម។វិស័យឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងខេត្តមានរោងចក្រ សហគ្រាសចំនួន ១១ ក្នុងនោះរោងចក្រកែច្នៃជ័រកៅស៊ូ ៤ កន្លែង, រោងចក្រកែច្នៃស្ករអំពៅ ១ កន្លែង, រោងចក្រវេចខ្ចប់ចេកអំបូងលឿង ២ កន្លែង រោងចក្រកែច្នៃដំឡូងមី ១ កន្លែង និងសិប្បកម្មកែច្នៃគ្រាប់ស្វាយចន្ទី ៣ កន្លែង មានកម្មករនិយោជិតសរុប ៩៥៧ នាក់។ វិស័យសុខាភិបាល ខេត្តមានមន្ទីរពេទ្យបង្អែក ៥ កន្លែង មណ្ឌលសុខភាព ៤២ កន្លែង និងប៉ុស្តិ៍សុខភាពចំនួន ១៣ កន្លែង។ វិស័យទេសចរណ៍ ខេត្តមានរមណីយដ្ឋានធម្មជាតិ និងវប្បធម៌ចំនួន ២៤ កន្លែង និងមានសត្វផ្សោតទឹកសាបទន្លេមេគង្គរស់នៅប្រមាណ ១១១ក្បាល ដែលកំពុងទាក់ទាញភ្ញៀវទេសចរជាតិ អន្តរជាតិចូលមកទស្សនានិងមានកំណើនជារៀងរាល់ឆ្នាំ។ជាមួយគ្នានេះ ដើម្បីបង្កើនការចាប់អារម្មណ៍ពីភ្ញៀវទេចរណ៍ រដ្ឋបាលខេត្តបានរៀបចំក្រាលម៉ាបតាមមាត់ទន្លេនៅទីរួមខេត្ត ដាំកូនឈើចម្រុះនៅតាមទីសាធារណៈ តុបតែងលម្អភ្លើង និងបានបំពាក់បន្ថែមបង្គោលភ្លើងបំភ្លឺនៅតាមដងផ្លូវក្នុងកាន់តែលើកកម្ពស់សោភ័ណភាព និងសុវត្ថិភាពនៅពេលរាត្រី។ វិស័យរ៉ែ ខេត្តមានក្រុមហ៊ុនសហគ្រាសធ្វើអាជីវកម្មរ៉ែមាស រ៉ែថ្មក្រានីត គ្រួស ខ្សាច់ និងថ្ម សំណង់សរុបចំនួន ៦៩ ក្រុមហ៊ុន/សហគ្រាស និងក្រុមហ៊ុនធ្វើអាជីវកម្មរ៉ែមាសចំនួន ២ក្រុមហ៊ុន។ វិស័យការងារ និងបណ្តុះបណ្តាលវិជ្ជាជីវៈ ខេត្តមានសហគ្រាស គ្រឹះស្ថានសរុប ២៤៣ សហគ្រាស មានកម្មករនិយោជិត ១៩.៤១៦នាក់ ស្រី ៧.៥១៤នាក់ ក្នុងនោះកម្មករមកពីបរទេស ១.០៤២នាក់ ស្រី ១៨៩នាក់៕