ផ្លូវលំមួយខ្សែដែលរងការខូចខាតជាយូរមកហើយ ពិបាកក្នុងការធ្វើដំណើរ ដល់ប្រជាពលរដ្ឋ ពេលនេះអាជ្ញាធរបានស្ថាបនាប្រែក្លាយជាផ្លូវបេតុងឆ្អឹងដែក រួចរាល់ហើយដើម្បីសម្រួលដល់ការធើ្វដំណើរប្រជាពលរដ្ឋក្នុងមូលដ្ឋានប្រកបរបរផ្សេងៗ។លោក កង វង ចៅសង្កាត់ចោមចៅទី១ បានឲ្យដឹងថា ដោយមានការចង្អុលបង្ហាញពីលោក សក់ ច័ន្ធកាញ្ញារិទ្ធ អភិបាលនៃគណៈអភិបាលខណ្ឌពោធិ៍សែនជ័យ ដោយឃើញថាផ្លូវមួយខ្សែដែលស្ថិតនៅក្នុងភូមិទួលពង្រ សង្កាត់ចោមចៅទី១ រងការខូចខាតពិបាកក្នុងការធ្វើដំណើរក៏ដូចជាប្រកបរបរផ្សេងៗ ទើបលោក ដាក់គ្រឿងចក្រឈូសឆាយ ប្រែក្លាយផ្លូវខាងលើជាផ្លូវបេតុងឆ្អឹងដែក ពេលនេះស្ថាបនារួចរាល់ហើយ និង ដាក់ឲ្យពលរដ្ឋធ្វើដំណើរ តែហាមឃាត់រថយន្តធុនធំ ដឹកធ្ងន់ចូលដោយសារតែបេតុងមិនទាន់រឹងមាំល្អ។លោក កង វង បានបន្តថា ផ្លូវខាងលើមានប្រវែង៩០០ម៉ែត្រ ទទឹង៦ម៉ែត្រ ដោយប្រើប្រាស់ថវិការមូលនិធិអភិវឌ្ឍន៍សង្កាត់ឆ្នាំ២០២៥។ ជាមួយគ្នានេះផងដែរ លោកក៏បានដាក់គ្រឿងចក្រឈូសឆាយនិងស្ថាបនាផ្លូវបេតុងមួយខ្សែទៀតដោយចាប់ ពីទីបញ្ជាការកងរាជអាវុធហត្ថ រហូតទៅដល់ផ្លូវ៥០ម៉ែត្រ ស្ថិតក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ ខណៈកំពុងស្ថាបនា៕