ប្រតិភូកម្ពុជាមកពីក្រសួងសាធារណការនិងដឹកជញ្ជូន និងសាលារាជធានីភ្នំពេញ ដឹកនាំដោយឯកឧត្តម ឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោក បានធ្វើទស្សនកិច្ចនៅប្រទេសកូរ៉េតបតាមការអញ្ជើញរបស់ក្រសួងដែនដី ហេដ្ឋារចនាសម្ព័ន្ធនិងដឹកជញ្ជូនកូរ៉េ ដើម្បីសិក្សាស្វែងយល់អំពីប្រព័ន្ធដឹកជញ្ជូនឆ្លាតវៃ (ITS) ចាប់ពីថ្ងៃទី២១ ដល់២៧ ខែតុលា ឆ្នាំ២០១៨ នៅសាធារណរដ្ឋកូរ៉េ។ ក្នុងឱកាសបំពេញទស្សនកិច្ចនេះប្រតិភូបានជួបពិភាក្សាការងារជាមួយតំណាងក្រសួង MOLIT កូរ៉េ លើវិស័យដឹកជញ្ជូននៃប្រទេសទាំងពីរ និងបានជួបជាមួយបណ្ដាក្រុមហ៊ុនផ្តល់សេវាដឹកជញ្ជូនមួយចំនួន និងបានសិក្សាស្វែងយល់ នៅមជ្ឈមណ្ឌលត្រួតពិនិត្យលំហូរចរាចរាណ៍ និងសន្តិសុខ សុវត្ថិភាព(TOPIC) នៃសាលាក្រុងសេអ៊ូល មជ្ឈមណ្ឌលផ្តល់ព័ត៌មានអំពីចរាចរណ៍នៃក្រុមហ៊ុន KEC ក្រុមហ៊ុនកូរ៉េ Smart Card សាលាក្រុង Anyang (Anyang U-Integrated Center) ទស្សនកិច្ចនៅស្ថានីយ៍រថភ្លើងក្រុងសេអ៊ូលដែលជាកន្លែងប្រមូលផ្តុំប្រព័ន្ធដឹកជញ្ជូនពហុបែប (Multi-modal transport) ទស្សនកិច្ចក្រុមហ៊ុន SK Telecom ដែលជាក្រុមហ៊ុនសិក្សាអំពីប្រព័ន្ធដឹកជញ្ជូនក្នុងពេលអនាគត (ឆ្នាំ២០៤៨) និងបានសិក្សាអំពីវប្បធម៍ប្រពៃណីរបស់ជនជាតិកូរ៉េផងដែរ។ ភាគីទាំងពីរក៏បានពិភាក្សាគ្នាអំពីលទ្ធភាពនៃកិច្ចសហប្រតិបត្តិការលើការអភិវឌ្ឍន៍វិស័យបច្ចេកវិទ្យាដឹកជញ្ជូនឆ្លាតវៃនៅក្នុងព្រះរាជាណាចក្រកម្ពុជានាពេលអនាគត។