លោក ប៊ុត បូវណ្ណារ័ត្ន អភិបាលរងខណ្ឌឬស្សីកែវ បានជំរុញដល់អ្នកទទួលការងារដាក់ប្រព័ន្ធថ្មីមួយខ្សែនៅលើផ្លូវអតីតផ្លូវរថភ្លើង ឲ្យយកចិត្តទុកដាក់ខ្ពស់ក្នុងការអនុវត្តការងារ ដោយយកតាមស្តង់ដាបច្ចេកទេស និងជ្រើសរើសសម្ភារៈលូដែលមានគុណភាពល្អ។ការលើឡើងបែបនេះ ធ្វើឡើងនៅពេលលោកដឹកនាំក្រុមការងាររួមជាមួយប្រធាន និងមន្ត្រីនៃការិយាល័យផែនការ និងហិរញ្ញវត្ថុ ចុះត្រួតពិនិត្យវឌ្ឍនភាពគម្រោងដាក់ប្រព័ន្ធលូជាបន្តបន្ទាប់ ក្នុងសង្កាត់គីឡូម៉ែត្រលេខ៦ កាលពីថ្ងៃទី០៨ ខែកក្តដា ឆ្នាំ២០២៥។លោក ប៊ុត បូវណ្ណារ័ត្ន បានប្រាប់ឱ្យដឹងថា ការដាក់ប្រព័ន្ធនេះមាន២គម្រោង គម្រោងទី១ លូមូលនិធិខណ្ឌ មានមុខកាត់ ០.៨ ម៉ែត្រ សរុបប្រវែង ៨៤០ ម៉ែត្រ។ គម្រោងនេះបានអនុវត្តរួចទៅរួច ៦០% ដែលបង្ហាញពីជំហានមួយដ៏សំខាន់ក្នុងការកែលម្អបរិស្ថាន និងអភិវឌ្ឍហេដ្ឋារចនាសម្ព័ន្ធក្នុងតំបន់។គម្រោងទី២ដែលជាគម្រោងធំជាងគេ គឺគម្រោងដាក់លូមូលនិធិរដ្ឋបាលរាជធានីភ្នំពេញ ដែលមានមុខកាត់ ០.៨ ម៉ែត្រដូចគ្នា ប៉ុន្តែប្រវែងសរុបឡើងដល់ ១,៦០០ ម៉ែត្រ។ គម្រោងនេះបានអនុវត្តបាន ៥០% ហើយក្រុមការងារបានបន្តពិនិត្យបច្ចុប្បន្នភាព និងដំណើរការសំណង់យ៉ាងប្រុងប្រយ័ត្ន។លោកអភិបាលរងបានផ្តល់ការណែនាំដល់ក្រុមអ្នកទទួលការងារ និងអ្នកអនុវត្តគម្រោងឲ្យយកចិត្តទុកដាក់ខ្ពស់ក្នុងការអនុវត្តការងារ ដោយយកតាមស្តង់ដារបច្ចេកទេស និងជ្រើសរើសប្រើសម្ភារៈលូដែលមានគុណភាពល្អ។ ពលរដ្ឋក្នុងតំបន់សង្កាត់គីឡូម៉ែត្រលេខ៦បានសម្ដែងការគាំទ្រយ៉ាងខ្លាំងដែលអាជ្ញាធរយកចិត្តទុកដាក់ក្នុងការអភិវឌ្ឍន៍ ហេដ្ឋារចនាសម្ព័ន្ធក្នុងមូលដ្ឋាន និងជាពិសេស ការដែលអាជ្ញាធរបានចុះត្រួតពិនិត្យស្ថានភាពជាក់ស្តែង ដោយសង្ឃឹមថា គម្រោងនឹងអនុវត្តបានជោគជ័យ និងបញ្ចប់ដោយទាន់ពេលកំណត់៕