សិក្ខាសាលាពិគ្រោះយោបល់ស្តីពី ផែនការសកម្មភាពជាតិស្តីពីការគ្រប់គ្រងទឹកកខ្វក់នៅប្រទេសកម្ពុជា ឆ្នាំ២០២៥-២០៣៥ រាជធានីភ្នំពេញ៖ នាថ្ងៃសុក្រ ទី៦ ខែមិថុនា ឆ្នាំ២០២៥ ឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងកម្មវិធីបើក និងបិទសិក្ខាសាលាពិគ្រោះយោបល់ស្តីពី ផែនការសកម្មភាពជាតិស្តីពីការគ្រប់គ្រងទឹកកខ្វក់ នៅប្រទេសកម្ពុជា ឆ្នាំ២០២៥-២០៣៥ ដោយមានការអញ្ជើញចូលរួមពី ឯកឧត្តមអនុរដ្ឋលេខាធិការ ឯកឧត្តមអគ្គនាយក លោកអគ្គនាយករង ប្រធាន-អនុប្រធាននាយកដ្ឋាន និងមន្ត្រីជំនាញនៃអគ្គនាយកដ្ឋានប្រព័ន្ធចម្រោះទឹកកខ្វក់ តំណាងទីភ្នាក់ងារអភិវឌ្ឍន៍បារាំង (AFD) តំណាងអង្គការ GRET និងតំណាងក្រសួង-ស្ថាប័នពាក់ព័ន្ធផងដែរ។ សិក្ខាសាលានេះត្រូវបានរៀបចំឡើងក្រោមកម្មវិធីអភិវឌ្ឍសមត្ថភាពក្នុងក្របខ័ណ្ឌគម្រោងផ្គត់ផ្គង់ទឹកស្អាត និងអនាម័យខេត្ត (PWSSP) ដែលកំពុងអនុវត្តដោយអង្គការ GRET ជាអ្នកអភិវឌ្ឍន៍គម្រោង និងសហការសម្របសម្រួលដោយអគ្គនាយកដ្ឋានប្រព័ន្ធចម្រោះទឹកកខ្វក់ នៃក្រសួងសាធារណការ និងដឹកជញ្ជូន។ គម្រោងនេះទទួលបានមូលនិធិគាំទ្រពីសហភាពអ៊ឺរ៉ុប (EU) តាមរយ:ទីភ្នាក់ងារអភិវឌ្ឍន៍បារាំង (AFD)។ គោលបំណងនៃផែនការសកម្មភាពឆ្នាំ ២០២៥-២០៣៥ គឺដើម្បីលើកកម្ពស់ការគ្រប់គ្រង ទឹកកខ្វក់ និងសំណល់ភក់បង្គន់ប្រកបដោយសុវត្ថិភាព សម្រាប់ប្រជាជនចំនួន ៦០% ដែលរស់នៅតំបន់ទីក្រុងនៃប្រទេសកម្ពុជា ដើម្បីឆ្លើយតបទៅនឹងគោលដៅអភិវឌ្ឍន៍ដោយចីរភាពរបស់កម្ពុជា (CSDGs) នៅឆ្នាំ២០៣០ និងបន្តរហូតដល់ឆ្នាំ២០៣៥។ ផែនការសកម្មភាពនេះ ត្រូវបានរៀបចំឡើង ដោយប្រើប្រាស់ព័ត៌មានពីប្រភពផ្សេងៗ ដូចជាការសិក្សាពីការសិក្សាវាយតម្លៃវិស័យទឹកកខ្វក់ ច្បាប់ស្តីពីប្រព័ន្ធទឹកកខ្វក់ ផែនការយុទ្ធសាស្ត្ររបស់អគ្គនាយកដ្ឋានប្រព័ន្ធចម្រោះទឹកកខ្វក់ (GDSWM) និងការពិគ្រោះយោបល់ជាមួយអគ្គនាយកដ្ឋានប្រព័ន្ធចម្រោះទឹកកខ្វក់។ ដើម្បីសម្រេចបាននូវគោលដៅដែលបានបង្កើតឡើងនេះ ផែនការសកម្មភាពបានកំណត់នូវសសរស្តម្ភជាយុទ្ធសាស្ត្រចំនួនបួន រួមមាន ៖ ១). ការដាក់ការប្រើប្រាស់ប្រព័ន្ធលូ និងការគ្រប់គ្រងទឹកកខ្វក់ជាសេវាសាធារណៈ នៅក្នុងតំបន់ទីក្រុងសំខាន់ៗទាំងអស់នៅក្នុងប្រទេស ២). ការបញ្ជាបការគ្រប់គ្រងសំណល់ភក់បង្គន់ (FSM) និងបច្ចេកទេសគ្រប់គ្រងទឹកកខ្វក់តាមបែបវិមជ្ឈការ ៣). ការបង្កើតបញ្ជីថ្លៃលក់ និងយន្តការផ្សេងទៀត និង ៤). ការបង្កើតកិច្ចសហការ និងភាពជាដៃគូ ដើម្បីធានាឱ្យមានការចូលរួមពីវិស័យឯកជន ក្នុងសេវាកម្មអនាម័យ៕ :: ភ្ជាប់ទំនាក់ទំនងជាមួយក្រសួងសាធារណការ និងដឹកជញ្ជូន(MPWT) - Facebook: https://www.facebook.com/mpwt.gov.kh - Telegram: https://t.me/mpwtnews - TikTok: https://www.tiktok.com/@mpwt.tiktok - YouTube: https://www.youtube.com/@mpwt.youtube