បាត់ដំបង៖ ប្រធានគ្រប់គ្រងការដ្ឋាននៃគម្រោងទឹកកខ្វក់ក្នុងក្រុងបាត់ដំបង លោក ហ៊ាន លីហុង បានពន្យល់ពីបញ្ហាផ្លូវជាតិលេខ៥ ចាប់ពីចំណុចរង្វង់មូលព្រាបសរហូតមកដល់លោកតាដំបងគ្រញូង ដែលរងការខូចខាតដោយសារការជីកគាស់កាយ ដើម្បីអនុវត្តគម្រោងសាងសង់ប្រព័ន្ធលូរំដោះទឹកកខ្វក់ ហើយសូមអំពាវនាវប្រជាពលរដ្ឋ និងអ្នកដំណើរទាំងអស់មានការយោគយល់អធ្យាស្រ័យខ្ពស់ ខណៈផ្លូវដែលរងការខូចខាតទាំងអស់នោះ នឹងត្រូវសាងសង់ឡើងវិញក្រោយបញ្ចប់គម្រោងសាងសង់ប្រព័ន្ធលូរំដោះទឹកកខ្វក់រួចរាល់ ។ លោក ហ៊ាន លីហុង បានបញ្ជាក់ថា ការអនុវត្តគម្រោងសាងសង់ប្រព័ន្ធលូរំដោះទឹកកខ្វក់នៅប៉ែកខាងកើតស្ទឹងសង្កែ រហូតមកដល់ពេកនេះ សម្រេចបាន១០០% ហើយ ហើយផ្លូវដែលរងការខូចខាតកន្លងមកត្រូវបានជួសជុលកែលម្អឡើងវិញជាបន្តបន្ទាប់ ខណៈកំណាត់ផ្លូវជាតិលេខ៥ ចាប់ពីចំណុចរង្វង់មូលព្រាបស ស្ថិតនៅព្រំប្រទល់ស្រុកសង្កែ រហូតមកដល់លោកតាដំបងគ្រញូង ក្រុងបាត់ដំបងនឹងត្រូវសាងសង់ឡើងវិញនៅខែមករា ឆ្នាំ២០២៥ នេះ ។ សូមបញ្ជាក់ថា ក្រុងបាត់ដំបងបច្ចុប្បន្ន បាននិងកំពុងអនុវត្តគម្រោងស្តារប្រព័ន្ធលូរំដោះទឹកកខ្វក់ និងអាងប្រព្រឹត្តកម្មទឹកកខ្វក់ចេញក្រៅក្រុង ដែលគាំទ្រដោយថវិកាហិរញ្ញប្បទានពីធនាគារអភិវឌ្ឍន៍អាស៊ី ADB អនុវត្គម្រោង ដោយក្រសួងសាធារណការ និងដឹកជញ្ជូន ។ ក្នុងដំណាក់កាលសាងសង់នេះពិតជាជួបនូវការលំបាកដែលចៀសមិនផុត ប៉ុន្តែរដ្ឋបាលខេត្ត រដ្ឋបាលក្រុងបាត់ដំបង និងប្រតិបត្តិករគម្រោងបាននិងកំពុងខិតខំជួសជុល និងសាងសង់ផ្លូវ ដែលខូចខាតឡើងវិញយ៉ាងយកចិត្តទុកដាក់បំផុត ។ នៅពេលគម្រោងប្រព័ន្ធលូរំដោះទឹកកខ្វក់ត្រូវបានបញ្ចប់ និងធ្វើតេស្តតាមបច្ចេកទេសរបស់គម្រោងរួចរាល់ រដ្ឋបាលខេត្តនឹងជំរុញឱ្យក្រុមហ៊ុនជួសជុលផ្លូវ ដែលខូចខាតឡើងវិញជាបន្តបន្ទាប់ឱ្យបានឆាប់រហ័ស ៕