[oknha news] - ក្រុមហ៊ុនអ្នកឧកញ៉ា សុខ គង់ ប្រកាសអនុញ្ញាតឱ្យឡាន Off-Road និងម៉ូតូធំ អាចធ្វើដំណើរកម្សាន្តលើផ្លូវថ្មីបាន
2023-05-01
Go to the website published oknha news
ក្រុមហ៊ុន សុខា អូតែល របស់អ្នកឧកញ៉ាបណ្ឌិត សុខ គង់ បានប្រកាសអនុញ្ញាតឱ្យរថយន្ត Off-Road ប្រភេទខ្ពស់ (4 Wheel Drive) និងប្រភេទម៉ូតូធំៗ អាចធ្វើដំណើរកម្សាន្តឆ្លងកាត់ផ្លូវថ្មី ពីផ្លូវជាតិលេខ៤ ទៅកាន់ភ្នំបូកគោ ដោយឆ្លងកាត់ជ្រលងភ្នំ និងធម្មជាតិស្រស់ស្អាតបាន។
ជាមួយគ្នានេះ ក្រុមហ៊ុនបានបញ្ជាក់ថា សម្រាប់ពេលបច្ចុប្បន្ន ផ្លូវនេះអាចធ្វើដំណើរបាន សម្រាប់រថយន្តប្រភេទខ្ពស់ និងប្រភេទម៉ូតូធំ។ ប្រសិនបើបងប្អូនចាប់អារម្មណ៍ធ្វើដំណើរលើផ្លូវនេះ អាចទំនាក់ទំនងលេខទូរសព្ទ 0883355608 | 088 335 5535 សម្រាប់ការជិះជាក្រុមកម្សាន្តជាមួយគ្នា។
គួររំឭកថា កាលថ្ងៃទី០៨ ខែមេសា ឆ្នាំ២០២៣ អ្នកឧកញ៉ា សុខ គង់ ប្រធានក្រុមហ៊ុន សូគីម៉ិច អ៊ិនវេសមេន គ្រុប និងអ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុង ឫទ្ធី គ្រុប បានអញ្ជើញចូលរួមអមដំណើរលោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ចុះពិនិត្យវឌ្ឍនភាពនៃការស្ថាបនាផ្លូវមេ តភ្ជាប់ពីផ្លូវជាតិលេខ៤ ត្រង់ចំណុចគីឡូម៉ែត្រលេខ១៥៨+២៩១ ឆ្ពោះទៅលើភ្នំបូកគោ ស្ថិតនៅស្រុកព្រៃនប់ ខេត្តព្រះសីហនុ។
តាមគម្រោងប្លង់ ផ្លូវធ្វើដំណើរឡើងភ្នំបូកគោ ប្រវែង ៦១គីឡូម៉ែត្រ ដែលឆ្លងកាត់ចំការដូងប្រេងរបស់អ្នកឧកញ៉ា ម៉ុង ឫទ្ធី ប្រវែង ១៥គីឡូម៉ែត្រនេះ មានទទឹងផ្លូវសរុបប្រមាណ ២០ម៉ែត្រ ក្នុងនោះមានផ្លូវរថយន្តទៅមក ៧ម៉ែត្រ ផ្លូវម៉ូតូទៅមក ៦ម៉ែត្រ និងចិញ្ចើមផ្លូវប្រវែង ៣,៥ម៉ែត្រទាំងសងខាង។
គិតត្រឹមថ្ងៃទី០១ ខែមេសា ឆ្នាំ២០២៣ ផ្លូវថ្មីនេះ បានបញ្ចប់ការឈូសឆាយ ១០០% ជាផ្លូវការ និងនៅតែបន្តស្ថាបនាទៅតាមគម្រោងបន្តបន្ទាប់ រហូតដល់ការចាក់កៅស៊ូ។
សូមជម្រាបថា គម្រោងស្ថាបនាផ្លូវតភ្ជាប់ឧទ្យានជាតិព្រះមុនីវង្សបូកគោ មកផ្លូវជាតិលេខ៤ ត្រង់ចំណុច គីឡូម៉ែត្រលេខ១៥៨+២៩១ នេះ ត្រូវបានរាជរដ្ឋាភិបាលកម្ពុជា សម្រេចកាលពីដើមឆ្នាំ២០២២ ឱ្យក្រសួងរៀបចំដែនដី នគរូបនីយកម្ម និងសំណង់ សហការជាមួយអ្នកជំនួញជើងចាស់ពីររូបគឺ អ្នកឧកញ៉ាបណ្ឌិត សុខ គង់ និងអ្នកឧកញ៉ាបណ្ឌិត ម៉ុង ឬទ្ធី បើកការឈូសឆាយធ្វើផ្លូវថ្មីនេះឡើង ដើម្បីមានភាពងាយស្រួលសម្រាប់ប្រជាពលរដ្ឋក្នុងការធ្វើដំណើរ ចំណេញពេលវេលា ជួយលើកកម្ពស់សេដ្ឋកិច្ច គាំទ្រដល់ការវិនិយោគ និងទាក់ទាញផ្នែកទេសចរណ៍៕
