[Khmer times] - ក្រសួងសាធារណការបង្កើនការណែនាំពីការប្រើប្រាស់ផ្លូវល្បឿនលឿនដើម្បីបញ្ចៀសគ្រោះថ្នាក់
2022-10-12
Go to the website published Khmer times
ក្រសួងសាធារណការ និងដឹកជញ្ជូនបានបន្តចេញសេចក្តីណែនាំស្តីពីការប្រើប្រាស់ផ្លូវល្បឿនលឿនភ្នំពេញ-ក្រុងព្រះសីហនុ ដើម្បីឲ្យការបើកបរមានសណ្តាប់ធ្នាប់និងសុវត្ថិភាព ខណៈបញ្ហាបច្ចេកទេសបើកបររបស់អ្នកប្រើប្រាស់ផ្លូវមួយចំនួននៅមិនទាន់យល់ដឹងអំពីករណីនេះ។សេចក្ដីការណែនាំដែលចេញផ្សាយជាសាធារណៈដោយក្រសួងសាធារណការនិងដឹកជញ្ជូនដែលខ្មែរថាមស៍ទើបទទួលបានពីម្សិលមិញ បានឱ្យដឹងថា ការត្រៀមមុនពេលបើកបរលើផ្លូវល្បឿនលឿនត្រូវពិនិត្យកង់រថយន្ត ភ្លើងសញ្ញាប្ដូរទិសដី ភ្លើងហ្វ្រាំង
ភ្លើងហ្វាយ-កូត និងខ្សែក្រវ៉ាត់សុវត្ថិភាព ព្រមទាំងត្រូវមានបំពង់ពន្លត់អគ្គិភ័យជាដើម។
បន្ទាប់មកត្រូវពិនិត្យផ្លាកសញ្ញាប្រាប់ដំណឹងមុននឹងចូលដល់ផ្លូវល្បឿនលឿន ការបើកបរចូលបញ្ជរបង់ប្រាក់ ផ្លាកសញ្ញាប្រាប់ដំណឹងពីការចាប់ផ្តើមចូលផ្លូវល្បឿនលឿន ការបើកបរយានយន្តចូលក្នុងផ្លូវល្បឿនលឿន។
បន្ថែមពីលើនេះ ក្រសួងបានលម្អិតលើការប្រើប្រាស់គន្លងផ្លូវល្បឿនលឿន ដោយក្នុងនោះមានគម្លងផ្លូវសម្រាប់ទេសចរណ៍ធម្មតា ផ្លូវសម្រាប់ជែង និងគម្លងផ្លូវសម្រាប់ឈប់បន្ទាន់ រួមទាំងការកំណត់ល្បឿនបើកបរក្នុងល្បឿនអប្បបរមា និងអតិបរិមា។
ជាមួយគ្នានេះផងដែរ ក្រសួងក៏បានណែនាំដល់អ្នកប្រើប្រាស់ផ្លូវអំពីលក្ខខណ្ឌប្រើប្រាស់ផ្លូវល្បឿនលឿនជាមុនដូចជាទីតាំងច្រកចេញ-ចូល គន្លងផ្លូវ ការកំណត់ល្បឿនបើកបរ កន្លែងឈប់សម្រាកនិងផ្តល់សេវាកម្ម ការស្វែងរកជំនួយសង្គ្រោះ និងមធ្យោបាយត្រូវបានហាមឃាត់។
អ្នកនាំពាក្យក្រសួងសាធារណការនិងដឹកជញ្ជូន លោក គង់ វិមាន បានប្រាប់ខ្មែរថាមស៍ពីម្សិលមិញថា ក្រសួងណែនាំក្នុងកម្រិតបច្ចេកទេសសម្រាប់អ្នកប្រើប្រាស់ផ្លូវល្បឿនលឿន ហើយប្រសិនបើពួកគាត់មិនអនុវត្តតាមមានន័យថា ពួកគេបានធ្វើខុស ហើយក្រសួងអនុវត្តតាមច្បាប់ ព្រោះក្នុងកំឡុងពេលដាក់ឱ្យប្រើប្រាស់ល្បឿនលឿនបណ្ដោះអាសន្នមានបញ្ហាផ្ទុះកង់រថយន្តជាដើម។
លោកថា ដោយសារតែបញ្ហានេះហើយទើបបានជាក្រសួងចេញសេចក្ដីណែនាំដល់អ្នកបើកបរទាំង ដើម្បីបញ្ចៀសគ្រោះថ្នាក់ផ្សេងៗដែលបង្កឡើងដោយការខុសបច្ចេកទេស ព្រោះមានអ្នកប្រើប្រាស់លើផ្លូវល្បឿនលឿនមួយចំនួននៅមិនទាន់មានការយល់ដឹងនៅឡើយ។
លោកបាននិយាយថា៖ «បច្ចុប្បន្នយើងកំពុងតែតាមដានមើលផ្លូវល្បឿនលឿនដើម្បីស្វែងរកមើលបញ្ហាក្នុងកំឡុងពេលដាក់ឱ្យប្រើប្រាស់សាកល្បងផ្លូវល្បឿនលឿន ហើយប្រសិនបើយើងជួបបញ្ហា ក្រសួងនិងក្រុមហ៊ុនធ្វើផ្លូវនឹងត្រូវដោះស្រាយនូវបញ្ហានោះ»។
លោកបន្តថា៖ «យើងបានដឹងទាំងអស់គ្នាហើយថាកម្ពុជាយើងទើបតែមានផ្លូវល្បឿនលឿនជាលើកដំបូង ដូច្នេះទាក់ទងនឹងច្បាប់ប្រើប្រាស់ផ្លូវល្បឿនលឿន គឺយើងមានការកំណត់ដោយឡែកពីការប្រើប្រាស់ផ្លូវទូទាំង។ ច្បាប់ប្រើប្រាស់ផ្លូវល្បឿនលឿនបានកំណត់ថា ល្បឿនដែលយឺតបំផុតត្រឹម៦០គីឡូម៉ែត្រក្នុងមួយ និងល្បឿនលឿនបំផុត១២០គីឡូម៉ែត្រក្នុងមួយម៉ោង»៕
