ដោយៈសុផល/ភ្នំពេញៈក្រសួងសាធារណការនិងដឹកជញ្ជូន ថ្មីៗនេះបានបើកកិច្ចប្រជុំគណៈកម្មការត្រៀមរៀបចំពិធីសម្ពោធបើកឱ្យប្រើប្រាស់ជាផ្លូវការហេដ្ឋារចនាសម្ព័ន្ធផ្លូវចំនួន ៣៨ខ្សែ នៅក្រុងសៀមរាប ខេត្តសៀមរាប ដោយមានការចូលរួមពីថ្នាក់ដឹកនាំក្រសួងទទួលបន្ទុក សមាជិកសមាជិកានៃអនុគណៈកម្មការត្រៀមរៀបចំ និងក្រុមកាងារបច្ចេកទេសពាក់ព័ន្ធ។ កិច្ចប្រជុំនេះធ្វើឡើងក្នុងគោលបំណងដើម្បីប្រកាសសមាសភាពសមាជិក​ សមាជិកាគណៈកម្មការ និងអនុគណៈកម្មការសម្រាប់ដឹកនាំ គ្រប់គ្រង ចាត់ចែង និងសម្របសម្រួលដំណើរការប្រព្រឹត្តទៅនៃពិធីសម្ពោធបើកឱ្យប្រើប្រាស់ជាផ្លូវការហេដ្ឋារចនាសម្ព័ន្ធផ្លូវ៣៨ខ្សែ ដែលគ្រោងនឹងប្រព្រឹត្តនៅថ្ងៃទី០៤ ខែមេសា ឆ្នាំ២០២២ ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ លោក សួង ហេង រដ្ឋលេខាធិការក្រសួងសាធារណការ និងដឹកជញ្ជូន ដែលជាប្រធានអង្គប្រជុំ បានណែនាំឱ្យសមាជិកសមាជិកានៃគណៈកម្មការ និងអនុគណៈកម្មការត្រៀមរៀបចំពិធីសហការគ្នាឱ្យបានជិតស្និទ្ធជាមួយភាគីពាក់ព័ន្ធ អនុវត្តតាមតួនាទី និងភារកិច្ចរៀងៗខ្លួនឱ្យបានល្អ សំដៅធានាឱ្យពិធីសម្ពោធបើកឱ្យប្រើប្រាស់ជាផ្លូវការហេដ្ឋារចនាសម្ព័ន្ធផ្លូវចំនួន៣៨ខ្សែ នៅក្រុងសៀមរាប ខេត្ត សៀមរាប អាចប្រព្រឹត្តទៅដោយរលូនតាមការគ្រោងទុក។ គួររំលឹកផងដែរថា៖កន្លងមកលោកទេសរដ្ឋមន្ត្រី ស៊ុន ចាន់ថុល បានដឹកនាំក្រុមការងារជំនាញបច្ចេកទេសធ្វើការសិក្សាស្រាជ្រាវគម្រោងហេដ្ឋារចនាសម្ព័ន្ធផែនការមេ៣៨ខ្សែនេះ ព្រមទាំងបានធ្វើការជ្រើសរើសប្លង់សម្រាប់កែលម្អផ្លូវវាងក្រុង និងផ្លូវមួយចំនួនទៀត ដើម្បីរំដោះការកកស្ទះចរាចរណ៍តាមបណ្តោយផ្លូវសំខាន់ៗ និងបានដាក់ស្នើគម្រោងថវិកាទៅរាជរដ្ឋាភិបាល ដែលបានបញ្ចេញកញ្ចប់ថវិកាក្នុងចំនួនទឹកប្រាក់យ៉ាងច្រើនសំដៅកែប្រែមុខមាត់ថ្មី នៃទឹកដីអង្គរនៃយើងឱ្យកាន់តែមានភាពស្រស់បំព្រង និងកាន់តែមានភាពទាក់ទាញ។ ហេដ្ឋារចនាសម្ព័ន្ធផ្លូវទាំង៣៨ខ្សែនេះ បានប្រើប្រាស់ថវិកាប្រកបដោយភាពវ័យឆ្លាត និងបត់បែនក្នុងការជ្រើសរើសផ្លូវអាទិភាព ធ្វើយ៉ាងណាឱ្យហេដ្ឋារចនាសម្ព័ន្ធនេះមានលក្ខណៈប្រទាក់ក្រឡាគ្នាជាប្រព័ន្ធ និងមានទំហំផ្លូវស្របតាមភូមិសាស្ត្រ មានផ្លូវសម្រាប់គ្រប់មធ្យោបាយ រួមទាំងថ្មើរជើង មានគុណភាពរឹងមាំ និងរចនាឱ្យមានសោភ័ណភាពទាក់ទាញបំផុតផងដែរ៕សរន