អប់រំផ្សព្វផ្សាយបញ្ជ្រាបការយល់ដឹងជាសាធារណៈពីបណ្តាញលូ និងទឹកកខ្វក់ ទៅដល់បងប្អូនប្រជាពលរដ្ឋប្រមាណជាង ៣០០នាក់ ដើម្បីជំរុញឱ្យមានការចូលរួមថែរក្សាបណ្តាញលូ និងការគាំទ្រប្រតិបត្តិការសេវាកម្មប្រព័ន្ធចម្រោះទឹកកខ្វក់ ថ្ងៃពុធ ៤រោច ខែមិគសិរ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃ ទី២៣ ខែធ្នូ ឆ្នាំ២០២១ ឯកឧត្តម វង្ស ពិសិដ្ឋ អនុរដ្ឋលេខាធិការ បានអញ្ជើញជាអធិតីភាព ក្នុងកម្មវិធីអប់រំផ្សព្វផ្សាយបញ្ជ្រាបការយល់ដឹងជាសាធារណៈ អំពីបណ្តាញលូ និងទឹកកខ្វក់ដែលរៀបចំឡើងដោយ នាយកដ្ឋានសរុប និងព័ត៌មាន នៃអគ្គនាយកដ្ឋានប្រព័ន្ធចម្រោះទឹកកខ្វក់ ក្រសួងសាធារណការ និងដឹកជញ្ជូន ក្រោមកិច្ចសហការជាមួយរដ្ឋបាលក្រុងព្រះសីហនុ និងការចូលរួមសហការពីអង្គការសហប្រជាជាតិសម្រាប់លំនៅឋានមនុស្សជាតិ (UN-Habitat) នៅទីតាំងឆ្នេរបរិវេណសណ្ឋាគារសុខា ក្រុងព្រះសីហនុ ខេត្តព្រះសីហនុ ។ កម្មវិធីនេះមានការអញ្ជើញជាអធិបតីរួមគ្នាពីលោក អ៊ី សុខឡេង អភិបាលក្រុងព្រះសីហនុ និងលោកសុខ វណ្ណា ប្រធានកម្មវិធីUN-Habitat និងមានការចូលរួមពីមន្ត្រីរាជការមកពីមន្ទីរ អង្គភាពពាក់ព័ន្ធនានាក្នុងខេត្តព្រះសីហនុ កងរាជអាវុធហត្ថ រដ្ឋបាលក្រុង សង្កាត់ លោកគ្រូ អ្នកគ្រូ សិស្ស និស្សិត ក្រុមយុវជនសហភាពសហព័ន្ធយុវជនកម្ពុជា (ស.ស.យ.ក) ក្រុមយុវជនស្រលាញ់សន្តិភាព ក្រុមយុវជន៨ ក្រុមយុជនអ.ម.ត តំណាងក្រុមហ៊ុនប្រមូលសម្រាម KSWM និងក្រុមអ្នកប្រមូលសម្រាម សរុបទាំងអស់ប្រមាណជាង ៣០០នាក់។ កម្មវិធីអបរំផ្សព្វផ្សាយនេះធ្វើឡើង ក្នុងគោលបំណងបញ្រ្ជាបការយល់ដឹងដល់បងប្អូនប្រជាពលរដ្ឋ អំពីបណ្តាញលូ ប្រព័ន្ធចម្រោះទឹកកខ្វក់ ការចូលរួមថែរក្សាសុខមាលភាព មានអនាម័យស្អាត និង សេវាកម្មប្រព័ន្ធចម្រោះទឹកកខ្វក់ ។ ឯកឧត្តមអនុរដ្ឋលេខាធិការ បានលើកឡើងថា ដោយសាកម្ពុជាបច្ចុប្បន្នមានសន្តិភាព ទើបធ្វើឱ្យយើងមានការរីកចម្រើនផ្នែកសេដ្ឋកិច្ចក្នុងរយៈពេលពីរទសវត្សរ៍ចុងក្រោយនេះ។ ទន្ទឹមនឹងសន្ទុះនៃការអភិវឌ្ឍនៅក្នុងខេត្តព្រះសីហនុ បញ្ហាទឹកកខ្វក់ដែលបង្កពីសកម្មភាពផ្សេងៗ បានហូរចូលទៅក្នុងតំបន់លំនៅដ្ឋានរបស់បងប្អូនប្រជាពលរដ្ឋ និងសហគមន៍ បង្កផលប៉ះពាល់ដល់សុខមាលភាពប្រជាជន សោភ័ណភាព ជីវៈចម្រុះ ប្រព័ន្ធអេកូឡូស៊ី និងជះឥទ្ធិពលដល់សេដ្ឋកិច្ចជាតិ ហើយត្រូវបានរាជរដ្ឋាភិបាលកម្ពុជា កំពុងយកចិត្តទុកដាក់ជាចម្បង។ ហេតុដូចនេះ ហេដ្ឋារចនាសម្ព័ន្ធសាធារណៈជាច្រើនពិសេស បណ្តាញលូទឹកភ្លៀង បណ្តាញលូទឹកកខ្វក់ ស្ថានីយ៍ប្រព្រឹត្តកម្មទឹកកខ្វក់ ទីលានចាក់សំណល់ភក់ ត្រូវបានសាង់សង់ និងកំពុងសាងសង់នៅតាមបណ្តារាជធានី និងក្រុងសំខាន់ៗ រួមទាំងក្រុងព្រះសីហនុផងដែរ។ ឯកឧត្តម ក៏បានលើកឡើងបន្ថែមទៀតថា ដើម្បីឱ្យសមិទ្ធផលអាចប្រើប្រាស់បានយូអង្វែង សូមឱ្យមានការចូលរួមពីប្រជាពលរដ្ឋ និងគ្រប់ភាគីពាក់ព័ន្ធដើម្នីប្រែក្លាយក្រុងព្រះសីហនុទៅជាទីក្រុងឆ្នេរសមុទ្រកម្ពុជាដ៏ស្រស់ស្អាត មានសោភ័ណភាព អនាម័យស្អាត បរិស្ថានល្អ និងគួរឱ្យចង់រស់នៅ ក៏ដូចជាទាក់ទាញភ្ញៀវទេសចរណ៍ជាតិ និងអន្តរជាតិ តាមរយ:ការលើកកម្ពស់អនាម័យស្អាត និងសុខភាពសាធារណៈ ធ្វើឱ្យសុខមាលភាពរបស់ប្រជាពលរដ្ឋកាន់តែប្រសើរឡើង។ តាមរយៈកម្មវិធីអប់រំផ្សព្វផ្សាយបញ្ជ្រាបឱ្យមានការយល់ដឹងជាសាធារណៈអំពីបណ្តាញលូ និងទឹកកខ្វក់ ក្នុងក្រុងព្រះសីហនុនាពេលនេះ ជាមធ្យោបាយមួយដ៏ល្អ ក្នុងការជំរុញឲ្យមានការចូលរួមខ្ពស់ពីសំណាក់ប្រជាពលរដ្ឋទូទៅក្នុងការប្រើប្រាស់ និងថែរក្សាការពារហេដ្ឋារចនាសម្ព័ន្ធ ដែលបានសាងសង់រួច ប្រកបដោយ ប្រសិទ្ធភាព និងនិរន្តរភាព។ ការចូលរួមផ្តើមចេញពីយើងទាំងអស់គ្នា ជាប្រជាពលរដ្ឋ ដើម្បីផ្ទះយើងស្អាត ភូមិយើងស្អាត សង្កាត់យើងស្អាត ទីក្រុងយើងស្អាត និងសុខភាពយើងល្អ ៕ អរគុណសន្តិភាព!