តាមការឱ្យដឹងពីក្រុមហ៊ុនសាងសង់របស់ចិន បានបញ្ជាក់ថា ស្ពានឆ្លងកាត់ទឹកជ្រោះមួយខ្សែរនេះគឺជាស្ពានធំជាង នៅក្នុងគម្រោងផ្លូវល្បឿនលឿនភ្នំពេញ-ព្រះសីហនុ បានផុសរូបរាងឡើងជាបណ្តើរៗហើយ ។ យោងតាមប្រភពដដែលបានឱ្យដឹងថា ស្ពានធំនេះ ស្ថិតនៅចំណុចគីឡូម៉េត្រលេខ ១៧៨ ដោយប្រវែង ២២៥ម៉ែត្រ ហើយស្ពាននេះគឺរំលងកាត់ទទឺងទន្លេទឹកជ្រោះក្បាលឆាយ ខណៈបច្ចុប្បន្ន ចំណុចនេះបានសម្រេចនូវការសាងសង់សសរធ្នឹមស្ពានខ្ពស់ទីមួយហើយ។ សម្រាប់ការសាងសង់ផ្លូវល្បឿនលឿនភ្នំពេញ-ព្រះសីហនុ គិតត្រឹមខែកក្កដា ឆ្នាំ២០២១ នេះបានសម្រេចការសាងសង់ ៦៤% ហើយ។ ជាមួយគ្នានេះដែរ បើតាមការឱ្យដឹងពីឯកឧត្ដមទេសរដ្ឋមន្ត្រី ស៊ុន ចាន់ថុល​ រដ្ឋមន្ត្រីក្រសួងសាធារណការនិងដឹកជញ្ជូន បានបញ្ជាក់យ៉ាងមុតមាំថា៖ ទោះបីជាបច្ចុប្បន្ន យើងកំពុងប្រឈមនឹងជំងឺរាតត្បាតកូវីដ-១៩ ក៏គម្រោងផ្លូវល្បឿនលឿនភ្នំពេញ-ព្រះសីហនុនៅតែរំពឹងទុកថានឹងបញ្ចប់ការងារនៅក្នុងឆ្នាំក្រោយ នឹងក្លាយជាការធានាមួយដល់សេដ្ឋកិច្ចយូរអង្វែងរបស់កម្ពុជា។ គួរបញ្ជាក់ថា៖ តាមផែនការផ្លូវល្បឿនលឿនពីភ្នំពេញទៅក្រុងព្រះសីហនុ នឹងចប់រួចរាល់ជាស្ថាពរនៅ ខែកញ្ញា ឆ្នាំ២០២២ បន្ទាប់ពីបើកការដ្ឋាន សាងសង់នៅថ្ងៃទី២២ ខែមីនា ឆ្នាំ២០១៩ ក្រោមអធិបតីភាពសម្តេចតេជោហ៊ុន សែន នាយករដ្ឋមន្រ្តីកម្ពុជា ក្នុងទុនវិនិយោគរបស់ក្រុមហ៊ុនសាជីវកម្មស្ពាន និងថ្នល់ចិន(CRBC) ពីប្រទេសចិន តាមរយៈក្រុមហ៊ុន Cambodian PPSHV Expressway Co.,Ltd ប្រមាណ២.០០០លានដុល្លារអាមេរិក និងហិរញ្ញប្បទានឥតសំណងពីរដ្ឋាភិបាលចិនប្រមាណ១៥០លានដុល្លារ។