ក្រសួងសាធារណការ និងដឹកជញ្ជូន បានឱ្យដឹងថា កាលពីថ្ងៃទី១២ ខែសីហាម្សិលមិញ ក្រុមការងារចល័តចម្រុះសម្រាប់ឆ្មក់ត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ បានឆ្មក់ចាប់បានយាន យន្តដឹកជញ្ជូនលើសទម្ងន់កម្រិតកំណត់ចំនួន២គ្រឿងនៅក្រុងតាខ្មៅ ខេត្តកណ្តាល។ រថយន្តទាំង២គ្រឿងនោះលើស ទម្ងន់កម្រិតកំណត់ ចាប់ពី ១១តោន និង១៦តោន ដែលលើសពី២០ភាគរយនៃទម្ងន់អនុញ្ញាត និងត្រូវឃាត់ទុករយៈពេល ១ឆ្នាំ ដោយអនុលោមតាមច្បាប់ស្តីពីផ្លូវថ្នល់ មាត្រា៦០។ មន្ត្រីនៃក្រុមការងារចល័តចម្រុះសម្រាប់ឆ្មក់ត្រួតពិនិត្យយាន យន្តដឹកជញ្ជូនលើសទម្ងន់កម្រិតកំណត់ បានបញ្ជាក់ថា ថ្នាក់ដឹកនាំក្រសួងសាធារណការ និងដឹកជញ្ជូន នៅតែបន្តជំរុញ សកម្មភាពចុះឆ្មក់ និងឃាត់យានយន្តដឹកជញ្ជូនលើសទម្ងន់កម្រិតកំណត់ និងចុះអប់រំផ្សព្វផ្សាយច្បាប់ស្តីពីផ្លូវថ្នល់ ក្នុងមាត្រា២៦ មាត្រា៦០ សំដៅពង្រឹងវិធានការយ៉ាងតឹងរ៉ឹងបន្ថែមចំពោះយានយន្តដឹកជញ្ជូនធុនធ្ងន់ដែលបើកបរលើបណ្តាញផ្លូវថ្នល់ ព្រមទាំងការស្នើសុំផ្តល់កិច្ចសហការចូលរួមទប់ស្កាត់យានយន្តដឹកជញ្ជូនធុនធ្ងន់ ដែលដឹកថ្ម ខ្សាច់ និងដី លើសទម្ងន់កម្រិតកំណត់ចេញពីការដ្ឋានថ្ម ខ្សាច់ និងដីនៅទូទាំងប្រទេស ដើម្បីបញ្ចៀសឱ្យបាននូវការខូចខាតផ្លូវថ្នល់ និងកាត់បន្ថយគ្រោះថ្នាក់ចរាចរណ៍។ សូមបញ្ជាក់ថា ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន តែងតែរំឭកដល់ម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ និងអ្នកបើកបររថយន្តធុនធ្ងន់ទាំងអស់ម្តងហើយម្តងទៀតថា ក្រសួងនឹងបន្តអនុវត្តតាមនីតិវិធីច្បាប់យ៉ាងតឹងរ៉ឹង ដោយមិនមានការលើកលែងនោះឡើយ សំដៅធ្វើយ៉ាងណាឱ្យការអនុវត្តន៍ច្បាប់កាន់តែមានប្រសិទ្ធភាពបន្ថែមទៀត ៕