ពិធីបើកវគ្គបណ្តុះបណ្តាលស្តីពី "Professional Highway Training Program" រៀបចំដោយក្រសួងសាធារណការនិងដឹកជញ្ជូន ក្រោមកិច្ចសហការរបស់ក្រុមហ៊ុន CRBC និងក្រសួងដឹកជញ្ជូននៃប្រទេសចិន --- នាថ្ងៃព្រហស្បតិ៍ ៨រោច ខែមិគសិរ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី១៩ ខែធ្នូ ឆ្នាំ២០១៩ នៅទីស្តីការក្រសួងសាធារណការ និងដឹកជញ្ជូន ឯកឧត្តម យិត បុណ្ណា រដ្ឋលេខាធិការ អញ្ជើញជាអធិបតីក្នុងពិធីបើកវគ្គបណ្តុះបណ្តាលស្តីពី "Professional Highway Training Program" ក្រោមកិច្ចសហការរបស់ក្រុមហ៊ុន CRBC និងក្រសួងដឹកជញ្ជូននៃប្រទេសចិន ដោយមានការចូលរួមពីគ្រប់អគ្គនាយកដ្ឋាន អង្គភាព មន្ទីរសារធារណការ និងដឹកជញ្ជូនទាំង ២៥ រាជធានី-ខេត្ត សាស្រ្តាចារ្យពីវិទ្យាស្ថានបច្ចេកវិទ្យាកម្ពុជា និងមន្រ្តីជំនាញពាក់ព័ន្ធផងដែរ។ វគ្គបណ្តុះបណ្តាលនេះត្រូវបានធ្វើឡើងក្នុងគោលបំណងចែករំលែកចំណេះដឹង និងបទពិសោធន៍របស់អ្នកជំនាញមកពីវិទ្យាស្ថានស្រាវជ្រាវផ្លូវ Highway របស់ក្រសួងដឹកជញ្ជូនចិន ពាក់ព័ន្ធនឹងការធ្វើអោយប្រសើរឡើងហេដ្ឋារចនាសម្ព័ន្ធផ្លូវ-ថ្នល់ តាមរយៈការធ្វើអធិការកិច្ចផ្លូវ-ថ្នល់ ការវាយតម្លៃស្តង់ដារគុណភាព និងសុវត្ថិភាពចរាចរណ៍ផ្លូវ-ថ្នល់ ព្រមទាំងការធានាបាននូវការគ្រប់គ្រងសុវត្ថិភាព ក្នុងដំណាក់កាលសាងសង់។ នាថ្ងៃដដែលនេះផងដែរ បន្ទាប់ពីបញ្ចប់វគ្គបណ្តុះបណ្តាល Professional Highway Training ឯកឧត្តម យិត បុណ្ណា បានដឹកនាំកិច្ចប្រជុំខ្លី ជាមួយប្រតិភូវិទ្យាស្ថានស្រាវជ្រាវនៃក្រសួងដឹកជញ្ជូន នៃប្រទេសចិន ដើម្បីថ្លែងអំណរគុណ ព្រមទាំងពិភាក្សាលើកិច្ចសហប្រតិបត្តិការក្នុងពេលខាងមុន រវាងក្រសួងសាធារណការ និងដឹកជញ្ជូននៃប្រទេសកម្ពុជា និងក្រសួងដឹកជញ្ជូននៃប្រទេសចិន។ ក្នុងកិច្ចប្រជុំនោះ ឯកឧត្តមរដ្ឋលេខាធិការ បានធ្វើការស្នើសុំកិច្ចសហប្រតិបត្តិការលើបញ្ហាមួយចំនួនដូចខាងក្រោម៖ ១-ការជួយពង្រឹងវិទ្យាស្ថាន នៅក្រសួងសាធារណការ និងដឹកញ្ជូន ២-ការបណ្តុះបណ្តាលនិងពង្រីកចំណេះដឹងលើបទដ្ឋានបច្ចេកទេសចិន ដល់ក្រសួង ជាពិសេសបច្ចេកទេស សវនកម្មផ្លូវថ្នល់ (Road Safety Audit), ការត្រួតពិនិត្យគុណភាព (Quality Control) និង ការធានាគុណភាព (Quality Assurance) ៣-ជួយពង្រឹងការងារថែទាំផ្លូវ និងស្ពាន ជាការឆ្លើយតប ប្រតិភូវិទ្យាស្ថានស្រាវជ្រាវ នឹងយកសំណើរខាងលើទៅពិភាក្សាជាមួយថ្នាក់ដឹកនាំក្រសួងដឹកជញ្ជូននៃប្រទេសចិន ដោយបានចាត់ទុកថាសំណើរទាំងនេះជាប្រធានបទគន្លឹះសម្រាប់កិច្ចប្រតិបត្តការនាពេលអនាគត។