ថ្ងៃសុក្រ ៣កើត ខែមិគសិរ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី២៩ ខែវិច្ឆិកា ឆ្នាំ២០១៩ នៅមន្ទីរសាធារណការ និងដឹកជញ្ជូនខេត្តឧត្តរមានជ័យ បានបន្តធ្វើយុទ្ធនាការបណ្តុះបណ្តាល និងផ្សព្វផ្សាយស្តីពីបច្ចេកទេសជួសជុលថែទាំផ្លូវ និងកម្មវិធីថែទាំផ្លូវ (ROAD CARE Mobile App) ក្រោមអធិបតីភាពលោក នួន ចំរុង អគ្គនាយករងបច្ចេកទេស។ កម្មវិធីយុទ្ធនាការបណ្តុះបណ្តាល និងផ្សព្វផ្សាយនេះ មានការចូលរួមពីលោក យិន សិរីវុធ ប្រធានវិទ្យាស្ថានជាតិបណ្តុះបណ្ដាលបច្ចេកទេសសាធារណការ និងដឹកជញ្ជូន តំណាងអាជ្ញាធរដែនដី ក្រុង ស្រុកទាំង៥ សមាជិកក្រុមប្រឹក្សាឃុំ សង្កាត់ កងកម្លាំងប្រដាប់អាវុធ លោកគ្រូ អ្នកគ្រូ សិស្សានុសិស្ស និងមន្ត្រីរាជការនៃមន្ទីរសាធារណការ និងដឹកជញ្ជូនខេត្ត សរុបប្រមាណ ១២៧នាក់។ យុទ្ធនាការបណ្តុះបណ្តាល និងផ្សព្វផ្សាយនេះ រៀបចំដោយអគ្គនាយកដ្ឋានបច្ចេកទេស និងនាយកដ្ឋានព័ត៌មានវិទ្យា និងទំនាក់ទំនងសាធារណៈ សហការជាមួយមន្ទីរសាធារណការ និងដឹកជញ្ជូនខេត្តឧត្តរមានជ័យ ក្រោមកិច្ចសហការគាំទ្រពីកម្មវិធីអភិវឌ្ឍន៍សហប្រជាជាតិ (UNDP) ប្រចាំព្រះរាជាណាចក្រកម្ពុជា ក្នុងគោលបំណងសំខាន់ គឺជួយឱ្យមន្រ្តីបច្ចេកទេស នៃមន្ទីរសាធារណការ និងដឹកជញ្ជូនខេត្តឧត្តរមានជ័យ បានយល់ដឹងបន្ថែមពីបច្ចេកទេសសំខាន់ៗនៃការសាងសង់ និងការជួសជុលថែទាំផ្លូវថ្នល់ ឱ្យមានលក្ខណៈល្អប្រសើរ មានអាយុកាលយូរអង្វែង និងការប្រើប្រាស់កម្មវិធីថែទាំផ្លូវ (ROAD CARE Mobile App) ដែលផ្ដល់ភាពងាយស្រួលក្នុងការឆ្លើយតប និងទំនាក់ទំនងទៅកាន់បងប្អូនប្រជាពលរដ្ឋ ព្រមទាំងធ្វើការផ្សព្វផ្សាយបន្តដល់បងប្អូនប្រជាពលរដ្ឋក្នុងតំបន់ឱ្យយល់ពីអត្ថប្រយោជន៍ និងវិធីប្រើប្រាស់កម្មវិធីថែទាំផ្លូវ (ROAD CARE Mobile App) ដើម្បីឱ្យបងប្អូនប្រជាពលរដ្ឋរាយការណ៍ផ្ទាល់ពីស្ថានភាពផ្លូវជង្ហុកសំបុកមាន់តាមដងផ្លូវនានាក្នុងរាជធានី-ខេត្ត នៅទូទាំងប្រទេស សម្រាប់ចូលរួមចំណែកឱ្យក្រុមការងារបច្ចេកទេសធ្វើការជួសជុលបានទាន់ពេលវេលា កាត់បន្ថយការចំណាយថវិកាជាតិច្រើន និងកាត់បន្ថយគ្រោះថ្នាក់ចរាចរណ៍ ព្រមទាំងបង្កើនសុវត្ថិភាពចរាចរណ៍ជូនអ្នកប្រើប្រាស់ផ្លូវថ្នល់ និងអភិវឌ្ឍប្រព័ន្ធហេដ្ឋារចនាសម្ព័ន្ធដឹកជញ្ជូនក្នុងប្រទេសកម្ពុជា។ សូមបញ្ជាក់ផងដែរថា៖ ខេត្តឧត្តរមានជ័យ គឺជាខេត្តទី១៩ នៃយុទ្ធនាការបណ្តុះបណ្តាល និងផ្សព្វផ្សាយ ពីបច្ចេកទេសជួសជុលថែទាំផ្លូវ និងកម្មវិធីថែទាំផ្លូវ (ROAD CARE Mobile App) ហើយយុទ្ធនាការនេះ នឹងបន្ដបេសកកម្មបណ្តុះបណ្តាល និងផ្សព្វផ្សាយដល់មន្ទីរសាធារណការ និងដឹកជញ្ជូនខេត្តចំនួន០៦ខេត្តបន្តទៀត ក្នុងគោលដៅបណ្តុះបណ្តាល និងផ្សព្វផ្សាយឱ្យបានគ្រប់ទាំង២៥រាជធានី ខេត្ត ទូទាំងប្រទេស៕ ទាញយកកម្មវិធីថែទាំផ្លូវ (ROAD CARE Mobile App)៖ - App Store: roadcare.mpwt.gov.kh/ios - Play Store: roadcare.mpwt.gov.kh/android ::: សម្រាប់ព័ត៌មានបន្ថែម សូមទំនាក់ទំនងមកកាន់លេខ៖ 085 92 90 90 / 015 92 90 90 / 067 92 90 90