ថ្ងៃព្រហស្បតិ៍ ២កើត ខែមិគសិរ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី២៨ ខែវិច្ឆិកា ឆ្នាំ២០១៩ នៅមន្ទីរសាធារណការ និងដឹកជញ្ជូនខេត្តព្រះវិហារ បានបន្តធ្វើយុទ្ធនាការបណ្តុះបណ្តាល និងផ្សព្វផ្សាយស្តីពីបច្ចេកទេសជួសជុលថែទាំផ្លូវ និងកម្មវិធីថែទាំផ្លូវ (ROAD CARE Mobile App) ក្រោមអធិបតីភាព ឯកឧត្តម គោស៊ុ ប៊ុនសឿត អភិបាលរង នៃគណៈអភិបាលខេត្តព្រះវិហារ លោក នួន ចំរុង អគ្គនាយករងបច្ចេកទេស លោក យិន សិរីវុធ ប្រធានវិទ្យាស្ថានជាតិបណ្តុះបណ្ដាលបច្ចេកទេសសាធារណការ និងដឹកជញ្ជូន។ កម្មវិធីយុទ្ធនាការបណ្តុះបណ្តាល និងផ្សព្វផ្សាយនេះ មានការចូលរួមពីតំណាងអាជ្ញាធរដែនដី ក្រុង ស្រុកទាំង៨ សមាជិកក្រុមប្រឹក្សាឃុំ សង្កាត់ កងកម្លាំងប្រដាប់អាវុធ លោកគ្រូ អ្នកគ្រូ សិស្សានុសិស្ស យុវជនកាកបាតក្រហម យុវជនកាយរឹទ្ធ យុវជន ស.ស.យ.ក. ខេត្ត និងមន្ត្រីរាជការនៃមន្ទីរសាធារណការ និងដឹកជញ្ជូនខេត្ត សរុបប្រមាណ ២៦០នាក់។ យុទ្ធនាការបណ្តុះបណ្តាល និងផ្សព្វផ្សាយនេះ រៀបចំដោយអគ្គនាយកដ្ឋានបច្ចេកទេស និងនាយកដ្ឋានព័ត៌មានវិទ្យា និងទំនាក់ទំនងសាធារណៈ សហការជាមួយមន្ទីរសាធារណការ និងដឹកជញ្ជូនខេត្តព្រះវិហារ ក្រោមកិច្ចសហការគាំទ្រពីកម្មវិធីអភិវឌ្ឍន៍សហប្រជាជាតិ (UNDP) ប្រចាំព្រះរាជាណាចក្រកម្ពុជា ក្នុង គោលបំណងសំខាន់ គឺជួយឱ្យមន្រ្តីបច្ចេកទេស នៃមន្ទីរសាធារណការ និងដឹកជញ្ជូនខេត្តព្រះវិហារ បានយល់ដឹងបន្ថែមពីបច្ចេកទេសសំខាន់ៗនៃការសាងសង់ និងការជួសជុលថែទាំផ្លូវថ្នល់ ឱ្យមានលក្ខណៈល្អប្រសើរ មានអាយុកាលយូរអង្វែង និងការប្រើប្រាស់កម្មវិធីថែទាំផ្លូវ (ROAD CARE Mobile App) ដែលផ្ដល់ភាពងាយស្រួលក្នុងការឆ្លើយតប និងទំនាក់ទំនងទៅកាន់បងប្អូនប្រជាពលរដ្ឋ ព្រមទាំងធ្វើការផ្សព្វផ្សាយបន្តដល់បងប្អូនប្រជាពលរដ្ឋក្នុងតំបន់ឱ្យយល់ពីអត្ថប្រយោជន៍ និងវិធីប្រើប្រាស់កម្មវិធីថែទាំផ្លូវ (ROAD CARE Mobile App) ដើម្បីឱ្យបងប្អូនប្រជាពលរដ្ឋរាយការណ៍ផ្ទាល់ពីស្ថានភាពផ្លូវជង្ហុកសំបុកមាន់តាមដងផ្លូវនានាក្នុងរាជធានី-ខេត្ត នៅទូទាំងប្រទេស សម្រាប់ចូលរួមចំណែកឱ្យក្រុមការងារបច្ចេកទេសធ្វើការជួសជុលបានទាន់ពេលវេលា កាត់បន្ថយការចំណាយថវិកាជាតិច្រើន និងកាត់បន្ថយគ្រោះថ្នាក់ចរាចរណ៍ ព្រមទាំងបង្កើនសុវត្ថិភាពចរាចរណ៍ជូនអ្នកប្រើប្រាស់ផ្លូវថ្នល់ និងអភិវឌ្ឍប្រព័ន្ធហេដ្ឋារចនាសម្ព័ន្ធដឹកជញ្ជូនក្នុងប្រទេសកម្ពុជា។ សូមបញ្ជាក់ផងដែរថា៖ ខេត្តព្រះវិហារ គឺជាខេត្តទី១៨ នៃយុទ្ធនាការបណ្តុះបណ្តាល និងផ្សព្វផ្សាយ ពីបច្ចេកទេសជួសជុលថែទាំផ្លូវ និងកម្មវិធីថែទាំផ្លូវ (ROAD CARE Mobile App) ហើយយុទ្ធនាការនេះ នឹងបន្ដបេសកកម្មបណ្តុះបណ្តាល និងផ្សព្វផ្សាយ ដល់មន្ទីរសាធារណការ និងដឹកជញ្ជូនខេត្តចំនួន ០៧ខេត្តបន្តទៀត ក្នុងគោលដៅបណ្តុះបណ្តាល និងផ្សព្វផ្សាយឱ្យបានគ្រប់ទាំង ២៥រាជធានី ខេត្ត ទូទាំងប្រទេស៕ ទាញយកកម្មវិធីថែទាំផ្លូវ (ROAD CARE Mobile App)៖ - App Store: roadcare.mpwt.gov.kh/ios - Play Store: roadcare.mpwt.gov.kh/android ::: សម្រាប់ព័ត៌មានបន្ថែម សូមទំនាក់ទំនងមកកាន់លេខ៖ 085 92 90 90 / 015 92 90 90 / 067 92 90 90