ថ្ងៃសុក្រ ១២កើត ខែកត្តិក ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី០៨ ខែវិច្ឆិកា ឆ្នាំ២០១៩ នៅទីស្តីការក្រសួង ឯកឧត្តម ស៊ឹង សុគង់ អនុរដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកសិក្ខាសាលាផ្សព្វផ្សាយស្តីពី “សៀវភៅគម្រោងកម្មវិធីវិនិយោគសាធារណៈ (ក.វ.ស.) ៣ឆ្នាំរំកិល ២០២០-២០២២” ដល់អង្គភាពពាក់ព័ន្ធក្រោមឱវាទរបស់ក្រសួង ដោយមានការចូលរួមពីមន្ត្រីអង្គភាពពាក់ព័ន្ធ ក្រោមឱវាទក្រសួងនៅ មន្ទីរជំនាញទាំង២៥ រាជធានី ខេត្ត និងដៃគូអភិវឌ្ឍន៍ផងដែរ។ សិក្ខាសាលានេះ ត្រូវបានរៀបចំឡើងដោយអគ្គនាយកដ្ឋានផែនការ និងគោលនយោបាយ សហការជាមួយក្រសួងផែនការ ក្នុងគោលបំណងផ្សព្វផ្សាយបណ្ដាគម្រោង សកម្មភាពជាអាទិភាព និងសមិទ្ធផលគម្រោងរបស់អង្គភាពក្រោមឱវាទក្រសួង ជាមួយនឹងដៃគូអភិវឌ្ឍន៍នានា សម្រាប់ចូលរួមអនុវត្តផែនការអភិវឌ្ឍជាតិ និងផែនការថវិកាប្រចាំឆ្នាំ ជាពិសេសថវិកាកម្មវិធីរបស់ក្រសួង។ ថ្លែងក្នុងសន្ទរកថាបើកសិក្ខាសាលា ឯកឧត្តមអនុរដ្ឋលេខាធិការ បានមានប្រសាសន៍ថា៖ ការរៀបចំ ក.វ.ស. ៣ឆ្នាំរំកិល ២០២០-២០២២ នេះ គឺជាការបន្ដការអនុវត្ដសេចក្ដីសម្រេចរបស់រាជរដ្ឋាភិបាលកម្ពុជាស្ដីពីសុខដុមនីយកម្មការងារផែនការចំណាយវិនិយោគសាធារណៈរបស់រដ្ឋ និងហិរញ្ញប្បទានសហប្រតិបត្ដិការ ដែលជាគោលដៅសំខាន់នៃកម្មវិធីកំណែទម្រង់ការគ្រប់គ្រងហិរញ្ញវត្ថុសាធារណៈ ដែលជាកំណែទម្រង់ស៊ីជម្រៅរបស់រាជរដ្ឋាភិបាលកម្ពុជា។ ឯកឧត្តមអនុរដ្ឋលេខាធិការ បានបន្តថា៖ ការរៀបចំកម្មវិធីវិនិយោគសាធារណៈ (ក.វ.ស.) ៣ឆ្នាំរំកិល ២០២០-២០២២ នាពេលនេះ គឺកាន់តែមានភាពប្រសើរឡើង និងងាយស្រួលជាងបណ្ដាឆ្នាំមុនៗ បន្ទាប់ពីយើងបានធ្វើការកែលម្អ និងលើកកម្ពស់ ដោយមានការសហការយ៉ាងជិតស្និទ្ធជាមួយនាយកដ្ឋានវិនិយោគសាធារណៈ នៃក្រសួងផែនការ ដើម្បីឈានទៅសម្រេចឱ្យបានចំណុចដៅ នៃសុខដុមនីយកម្មការងារកសាងផែនការ ចំណាយវិនិយោគសាធារណៈរបស់រដ្ឋ និងហិរញ្ញប្បទានសហប្រត្ដិបត្ដិការរបស់ក្រសួងសាធារណការ និងដឹកជញ្ចូន ដើម្បីពង្រឹងបន្ថែមទៀតនូវយន្ដការក្រុមការងារនៅតាមនាយកដ្ឋាន និងអង្គភាពក្រោមឱវាទរបស់ក្រសួង។ ឯកឧត្តមបានបញ្ជាក់បន្ថែមថា៖ ដើម្បីឱ្យមានប្រសិទ្ធភាពក្នុងការរៀបចំ ក.វ.ស. ៣ឆ្នាំរំកិល នាយកដ្ឋាន អង្គភាពនីមួយៗ ត្រូវធ្វើការពិនិត្យឱ្យបានច្បាស់លាស់ពីសារសំខាន់នៃគម្រោង ការវិភាជន៍តាមវិស័យអាទិភាព ប្រភពធនធានជាសក្ដានុពលក្នុងការផ្ដល់ហិរញ្ញប្បទានដល់គម្រោង និងលំដាប់អាទិភាពរបស់គម្រោង ក្នុងការគាំទ្រដល់គោលដៅអភិវឌ្ឍន៍សេដ្ឋកិច្ច សង្គមកិច្ចរបស់រាជរដ្ឋាភិបាល ដើម្បីឈានទៅសម្រេចបានគោលនយោបាយជាអាទិភាពនៃយុទ្ធសាស្ដ្រចតុកោណដំណាក់កាលទី៣ ព្រមទាំងផែនការសកម្មភាពជាអាទិភាពរបស់ក្រសួង ស្ថាប័ន ដែលមានចែង នៅក្នុងផែនការយុទ្ធសាស្ត្រអភិវឌ្ឍន៍ជាតិ (ផ.យ.អ.ជ.) ២០១៩-២០២៣។ ឯកឧត្តមអនុរដ្ឋលេខាធិការ បានផ្តាំផ្ញើដល់សិក្ខាកាមទាំងអស់ឱ្យចូលរួមផ្ដល់ធាតុចូលរបស់គម្រោងប្រកបដោយគុណភាពរបស់នាយកដ្ឋាន និងអង្គភាព ក្នុងការរៀបចំគម្រោង និងសូមផ្ដល់នូវការកែលម្អដល់ ក.វ.ស. ៣ឆ្នាំរំកិល ២០២០-២០២២ ដើម្បីឱ្យ ក.វ.ស. ៣ឆ្នាំរំកិល ២០២០-២០២២ ទទួលបាននូវលទ្ធផលខ្ពស់ មានគុណភាពពិតប្រាកដ និងឈានទៅសម្រេចបានការអនុវត្ដ ផ.យ.អ.ជ. ២០១៩-២០២៣ និងកាត់បន្ថយភាពក្រីក្រនៅកម្ពុជា។ សូមបញ្ជាក់ដែរថា៖ គម្រោងរបស់ក្រសួងសាធារណការ និងដឹកជញ្ជូន ទទួលបានហិរញ្ញប្បទានពីដៃគូអភិវឌ្ឍន៍រួមមាន៖ ប្រទេសចិន ជប៉ុន កូរ៉េ ថៃ វៀតណាម ធនាគារអភិវឌ្ឍន៍អាស៊ី ធនាគារពិភពលោក។ល។ និងថវិកាបដិភាគរបស់រាជរដ្ឋាភិបាលកម្ពុជាផងដែរ។ សម្រាប់កម្មវិធីវិនយោគសាធារណៈ (ក.វ.ស.) ៣ឆ្នាំរំកិល ២០២០-២០២២របស់ក្រសួងសាធារណការ និងដឹកជញ្ចូន មានគម្រោងសរុបចំនួន ៩៤គម្រោង ក្នុងនោះគម្រោងកំពុងដំណើរការមាន ២៤គម្រោង (តម្រូវការថវិកាចំនួន ៤.៩៤៧លានដុល្លារអាមេរិក) និងគម្រោងស្នើសុំថ្មី (គម្រោងសម្រាប់អនុវត្ត ផ.យ.អ.ជ.)ចំនួន ៧០គម្រោង (តម្រូវការថវិកាសរុបចំនួន ១០.៨៧៥លានដុល្លារអាមេរិក)៕