ថ្ងៃព្រហស្បតិ៍ ៤រោច ខែអស្សុជ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី១៧ ខែតុលា ឆ្នាំ២០១៩ អគ្គនាយកដ្ឋានបច្ចេកទេស សហការជាមួយ នាយកដ្ឋានព័ត៌មានវិទ្យា និងទំនាក់ទំនងសាធារណៈ និងមន្ទីរសាធារណការ និងដឹកជញ្ជូនរាជធានីភ្នំពេញ បានបន្តធ្វើយុទ្ធនាការបណ្តុះបណ្តាល និងផ្សព្វផ្សាយ បច្ចេកទេសជួសជុលថែទាំផ្លូវ និងការប្រើប្រាស់កម្មវិធីថែទាំផ្លូវ (ROAD CARE Mobile App) នៅមន្ទីរសាធារណការ និងដឹកជញ្ជូនរាជធានីភ្នំពេញ ដោយមានអ្នកចូលរួមពីមន្រ្តីបច្ចេកទេសនៃមន្ទីរសាធារណការ និងដឹកជញ្ជូនរាជធានីភ្នំពេញប្រមាណ៥០រូប។ យុទ្ធនាការបណ្តុះបណ្តាលនេះ អាចឱ្យមន្រ្តីបច្ចេកទេសនៃមន្ទីរសាធារណការ និង ដឹកជញ្ជូនរាជធានីភ្នំពេញ បានយល់ដឹងបន្ថែមពី បច្ចេកទេសនៃការជួសជុលថែទាំផ្លូវ ក៏ដូចជាការប្រើប្រាស់កម្មវិធីថែទាំផ្លូវ (ROAD CARE Mobile App) ដែលអាចផ្ដល់ភាពងាយស្រួលក្នុងការឆ្លើយតបទំនាក់ទំនងទៅកាន់ប្រជាពលរដ្ឋ និងផ្សព្វផ្សាយដល់ប្រជាពលរដ្ឋក្នុងតំបន់ឱ្យយល់ពីអត្ថប្រយោជន៍ និងវិធីប្រើប្រាស់ដើម្បីរាយការណ៍ផ្ទាល់ ពីស្ថានភាពជង្ហុកសំបុកមាន់ ដើម្បីធ្វើការជួសជុលបានទាន់ពេលវេលា កាត់បន្ថយគ្រោះថ្នាក់ចរាចរណ៍។ គោលបំណងសំខាន់ក្នុងបេសកកម្មនេះគឺការសាងសង់ និងថែទាំផ្លូវថ្នល់ឱ្យមានលក្ខណៈល្អប្រសើរសម្រាប់ប្រជាពលរដ្ឋ លុបបំបាត់ផ្លូវខូច និងជង្ហុកសំបុកមាន់តាមដងផ្លូវនានាក្នុងរាជធានី-ខេត្ត ព្រមទាំងបង្កើនសុវត្ថិភាពចរាចរណ៍ជូនអ្នកប្រើប្រាស់ផ្លូវថ្នល់ និងអភិវឌ្ឍប្រព័ន្ធហេដ្ឋារចនាសម្ព័ន្ធដឹកជញ្ជូនក្នុងប្រទេសកម្ពុជា។ គួរបញ្ជាក់ថា៖ រាជធានីភ្នំពេញគឺជាថ្ងៃទីបួននៃយុទ្ធនាការ “បណ្តុះបណ្តាល និងផ្សព្វផ្សាយបច្ចេកទេសជួសជុលថែទាំផ្លូវ និងការប្រើប្រាស់កម្មវិធី ថែទាំផ្លូវ (ROAD CARE Mobile App)នេះ ក្រុមការងារនឹងបន្ដបេសកកម្មរបស់ខ្លួនទូទាំង ២៥រាជធានី-ខេត្ត” ក្រោមកិច្ចសហការគាំទ្រពីកម្មវិធីអភិវឌ្ឍសហប្រជាជាតិ ប្រចាំព្រះរាជាណាចក្រកម្ពុជា (UNDP)។ ទាញយកកម្មវិធីថែទាំផ្លូវ (ROAD CARE Mobile App)៖ - App Store: roadcare.mpwt.gov.kh/ios - Play Store: roadcare.mpwt.gov.kh/android ::: សម្រាប់ព័ត៌មានបន្ថែម សូមទំនាក់ទំនងមកកាន់លេខ៖ 085 92 90 90 / 015 92 90 90 / 067 92 90 90