កាលពីថ្ងៃចន្ទ ១រោច ខែអស្សុជ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៤ ខែតុលា ឆ្នាំ២០១៩ លោក ព្រំ វន្ថា ប្រធាននាយកដ្ឋានសុវត្ថិភាពចរាចរណ៍ផ្លូវគោក បានអមដំណើរ ឯកឧត្តម ប៉ែន បុរាណ អនុរដ្ឋលេខាធិការ នៃក្រសួងសធារណការ និងដឹកជញ្ជូន និងជាអគ្គលេខាធិការរង នៃគ.ស.ច.គ ក្នុងការបើកយុទ្ធនាការ “បើកបរដោយសុវត្ថិភាព” ឆ្នាំទី៣ ដែលផ្តោតទៅលើការពាក់មួកសុវត្ថិភាព ក្រោមប្រធានបទ “មួកសុវត្ថិភាពមួយ ជីវិតម្នាក់” ដែលរៀបចំដោយក្រុមហ៊ុនប្រេងឥន្ធនៈតូតាល់កម្ពុជា និងមានការចូលរួមពីបណ្តាដៃគូសហការមកពីវិស័យឯកជនមួយចំនួន។ យុទ្ធនាការនេះនឹងប្រារព្ធឡើងចាប់ពីថ្ងៃទី ១៤ ដល់ថ្ងៃទី ១៩ ខែតុលាឆ្នាំ ២០១៩ នៅទូទាំងប្រទេសកម្ពុជាដែលដឹកនាំដោយបណ្ដាញដៃគូសហការជាច្រើន ក្នុងគោលបំណងដើម្បីជាការផ្សព្វផ្សាយអំពីសុវត្ថិភាពចរាចរណ៍ទៅដល់សិស្សានុសិស្ស និងប្រជាពលរដ្ឋខ្មែរ ដែលជាប្រើប្រាស់ផ្លូវដើម្បីជាការចូលរួមកាត់បន្ថយគ្រោះថ្នាក់ចរាចរណ៍នៅក្នុងប្រទេសយើង។