នៅថ្ងៃពុធ ១២រោច ខែភទ្របទ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២៥ ខែកញ្ញា ឆ្នាំ២០១៩ នៅទីស្ដីការក្រសួងសាធារណការ និងដឹកជញ្ជូន ឯកឧត្តមទេសរដ្ឋមន្ត្រី ស៊ុន ចាន់ថុល បានទទួលជួបប្រជុំពិភាក្សាជាមួយគណៈប្រតិភូនៃក្រុមហ៊ុន China Merchants Group ដែលដឹកនាំដោយ លោក Tiang Luning ប្រធានគ្រប់គ្រងពាណិជកម្មក្រៅប្រទេស(Director of Oversea Business)។ គោលបំណងនៃកិច្ចពិភាក្សានេះ គឺដើម្បីបង្ហាញពីលទ្ធផលនៃការសិក្សាដំបូងពាក់ព័ន្ធនឹងផែនការអភិវឌ្ឍ និងពង្រីកកំពង់ផែ ដែលរៀបចំឡើងដោយក្រុមហ៊ុន China Merchants Group។ ឯកឧត្តមទេសរដ្ឋមន្រ្តី បានសម្ដែងនូវការស្វាគមន៍ដល់ក្រុមហ៊ុន China Merchants Group សម្រាប់ការសិក្សាទៅលើផែនការអភិវឌ្ឍ និងពង្រីកសមត្ថភាពនៃកំពង់ផែ ដែលជាផ្នែកមួយយ៉ាងសំខាន់ក្នុងការដាក់បញ្ជូលទៅក្នុងផែនការមេភស្តុភាកម្មនៅកម្ពុជា។ ក្នុងឱកាសនោះ ឯកឧត្តមទេសរដ្ឋមន្រ្តី ក៏បានជម្រាបជូនក្រុមហ៊ុនពីសាវតានៃការសិក្សាពីគម្រោងពង្រីកសមត្ថភាពកំពង់ផែស្វយ័តក្រុងភ្នំពេញ ដែលបានធ្វើការសិក្សាចប់រួចរាល់ដោយទីភ្នាក់ងារ JICA និងគម្រោងសិក្សាដោយឧត្តមក្រុមប្រឹក្សាសេដ្ឋកិច្ចជាតិផងដែរ។ ក្រុមហ៊ុន China Merchants Group បានធ្វើបទបង្ហាញពីលទ្ធផលនៃការសិក្សាដំបូងពាក់ព័ន្ធនឹងផែនការអភិវឌ្ឍកំពង់ផែស្វយ័តក្រុងភ្នំពេញ និងព្រះសីហនុ ដែលជាការឆ្លើយតបទៅនឹងសំណើររបស់ឯកឧត្តមទេសរដ្ឋមន្ដ្រី ក្នុងកំឡុងពេលដែលឯកឧត្តមទេសរដ្ឋមន្ដ្រី ទៅបំពេញទស្សនកិច្ចផ្លូវការនៅប្រទេសចិន កាលពីខែមីនា ឆ្នាំ២០១៩ ។ ឯកឧត្តមទេសរដ្ឋមន្រ្តីបានកោតសរសើរទៅលើការរៀបចំ និងការវិភាគយ៉ាងលម្អិតទៅលើគម្រោងពង្រីកកំពង់ផែទាំងពីរនេះ។ លើសពីនេះទៅទៀត ឯកឧត្តមទេសរដ្ឋមន្រ្តី បានស្នើឱ្យក្រុមហ៊ុន China Merchants Group ពិភាក្សាបន្ថែមទៀតជាមួយអគ្គនាយកដ្ឋានភស្តុភារកម្ម កំពង់ផែស្វយ័តភ្នំពេញ និងកំពង់ផែស្វយ័តព្រះសីហនុ ដើម្បីស្វែងរកធាតុចូលបន្ថែមទៅលើរបាយការណ៍នៃការសិក្សារបស់ខ្លួន។ ក្រុមហ៊ុន China Merchants Group បានថ្លែងអំណរគុណដល់ឯកឧត្តមទេសរដ្ឋមន្រ្តី សម្រាប់ការស្វាគមន៍យ៉ាងកក់ក្តៅ ព្រមទាំងទទួលយកមតិយោបល់ណែនាំរបស់ឯកឧត្តមទេសរដ្ឋមន្រ្តីទៅពិចារណា និងសិក្សាបន្ថែមទៀត ៕