(ភ្នំពេញ​)៖​ នៅថ្ងៃទី២៥ ខែកញ្ញា ឆ្នាំ២០១៩ នេះនៅទីស្តីការក្រសួងសេដ្ឋកិច្ច និងហិរញ្ញវត្ថុ, ឯកឧត្តម​ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាបរធនបាលនៃ “មូលនិធិគន្ធបុប្ផាកម្ពុជា” បានទទួលជួបសំណេះសំណាលជាមួយ ឯកឧត្តម ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន និងសហការីដែលបាននាំមកនូវថវិកាសប្បុរសធម៌ចំនួន ៧៦,០០៦,០០០ រៀល ដែលបានមកពីការបរិច្ចាគប្រចាំឆ្នាំរបស់អង្គភាពក្រោមឱវាទក្រសួង និង ចំនួន ៩៥,៤៨២ ដុល្លារអាមេរិក ដែលបានមកពីការផ្តួចផ្តើមរៀបចំកម្មវិធីជិះកង់ ដើម្បីសុខភាព ត្រួតពិនិត្យផ្លូវ និងរៃអង្គាសថវិកា នៅខេត្តសៀមរាបកាលពីថ្ងៃទី១៦ ខែសីហា ឆ្នាំ២០១៩ កន្លងទៅ ដើម្បីបរិច្ចាគជូន “មូលនិធិគន្ធបុប្ផាកម្ពុជា” រួមទាំងថវិកាដែលជាការចូលរួមផ្ទាល់របស់ឯកឧត្តមចំនួន ៥,០០០ ដុល្លារអាមេរិក ផងដែរ។ ឯកឧត្តម ស៊ុន ចាន់ថុល បានសម្តែងការកោតសរសើរចំពោះរាជរដ្ឋាភិបាលកម្ពុជា ដែលតែងតែគិតគូរអំពីសុខទុក្ខរបស់ប្រជាពលរដ្ឋ និងជាពិសេស ការគិតគូរអំពីសុខុមាលភាពរបស់កុមារ តាមរយៈការបង្កើត មូលនិធិគន្ធបុប្ផាកម្ពុជា នេះឡើង ដើម្បីចូលរួមធានានិរន្តរភាពរបស់មន្ទីរពេទ្យគន្ធបុប្ផា ។ ឯកឧត្តម ក៏បានសម្តែងនូវសេចក្តីសោមនស្សរីករាយ ដែលបានរួមចំណែកក្នុងការគាំទ្រដល់ការគិតគូររបស់រាជរដ្ឋាភិបាលក្នុងការងារមនុស្សធម៌នេះ និងសន្យាបន្ត និងបំផុសចលនាគាំទ្រ និងចូលរួមជាមួយមូលនិធិគន្ធបុប្ផាកម្ពុជា។ ក្នុងនាមប្រធានក្រុមប្រឹក្សាបរធនបាលនៃមូលនិធិគន្ធបុប្ផាកម្ពុជា, ឯកឧត្តម​ អូន ព័ន្ធមុនីរ័ត្ន​ បានថ្លែងអំណរគុណយ៉ាងជ្រាលជ្រៅ និងកោតសរសើរដល់ ឯកឧត្តម ស៊ុន ចាន់ថុល និងសហការីទាំងអស់ចំពោះការផ្តល់វិភាគទានដ៏សប្បុរសធម៌ជូនមូលនិធិគន្ធបុប្ផាកម្ពុជា ឆ្លើយតបចំពោះការអំពាវនាវ និងលើកទឹកចិត្តរបស់ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ដែលបានបំផុសចលនាផ្សព្វផ្សាយ និងលើកទឹកចិត្តក្នុងការបន្តផ្តល់វិភាគទានសប្បុរសធម៌ តាមរយៈការចូលរួមជាសមាជិក មូលនិធិគន្ធបុប្ផាកម្ពុជា ក្នុងស្មារតី “ខ្មែរជួយខ្មែរ”។ ឯកឧត្តម ក៍បានរំលឹកអំពីសាវតានៃការបង្កើត មូលនិធិគន្ធបុប្ផាកម្ពុជា ក៍ដូចជា ការរួមចំណែករបស់ មូលនិធិគន្ធបុប្ផាស្វីស និងគុណបំណាច់ ដែលមិនអាចកាត់ថ្លៃបានរបស់លោកសាស្រ្តាចារ្យវេជ្ជបណ្ឌិត Beat Richner ផងដែរ។ ឯកឧត្តមអគ្គបណ្ឌិតសភាចារ្យឧបនាយករដ្ឋមន្ត្រី អូន ព័ន្ធមុនីរ័ត្ន បានអំពាវនាវ និងបន្តលើកទឹកចិត្តថ្នាក់ដឹកនាំ និងបុគ្គលិកគ្រប់លំដាប់ថ្នាក់នៃក្រសួងសាធារណការ និងដឹកជញ្ជូន ក៍ដូចជាក្រសួង-ស្ថាប័នរដ្ឋ ក្រុមហ៊ុន និងបណ្តាសាធារណជន ឱ្យចូលរួមបរិច្ចាគ និងចូលជាសមាជិក មូលនិធិគន្ធបុប្ផាកម្ពុជា ទៅតាមលទ្ធភាពដោយប្រកាន់ខ្ជាប់នូវស្មារតី និងគុណធម៌ “ខ្មែរជួយខ្មែរ” ដើម្បីធានាបាននូវនិរន្តរភាពរបស់មន្ទីរពេទ្យគន្ធបុប្ផាទាំង ០៥ ទីតាំង និងដើម្បីភាពញញឹមរបស់កុមារដែលជាអនាគតដ៏ភ្លឺស្វាងរបស់កម្ពុជា និងដើម្បីការអភិវឌ្ឍន៍របស់កម្ពុជា៕