ថ្ងៃព្រហស្បតិ៍ ៦រោច ខែភទ្របទ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី១៩ ខែកញ្ញា ឆ្នាំ២០១៩ នាយកដ្ឋានសំណង់ប្រព័ន្ធចម្រោះទឹកកខ្វក់ នៃអគ្គនាយកដ្ឋានសាធារណការ ពីក្រសួងសាធារណការ និងដឹកជញ្ជូន ចំនួន០២រូប បានចូលរួមក្នុងព្រឹត្តិការណ៍មជ្ឈមណ្ឌលបៃតងសកល កូរ៉េ ២០១៩ (the Global Green Hub Korea, GGHK 2019) នៅទីក្រុងសេអ៊ូល ប្រទេសកូរ៉េខាងត្បូងចំនួន ០៣ថ្ងៃ ចាប់ពីថ្ងៃទី ១៧-១៩ ខែកញ្ញា ឆ្នាំ២០១៩។ ព្រឹត្តិការណ៍មជ្ឈមណ្ឌលបៃតងសកល កូរ៉េ ២០១៩ ជាព្រឹត្តិការណ៍លើកទី១២ ដែលមានអ្នកចូលរួមមកពីជាង៣០ប្រទេស សរុបប្រហែលចំនួនជាង៤០០នាក់ មកពីស្ថាប័នរដ្ឋាភិបាលកូរ៉េ-ស្ថាប័នអន្តរជាតិដៃគូ វិទ្យាស្ថាន អង្គការមិនរកប្រាក់ចំណូល និងពីបណ្តាក្រុមហ៊ុនឯកជនធំៗជាច្រើនរបស់កូរ៉េផងដែរ ក្រោមប្រធានបទសំខាន់ៗមួយចំនួន ដូចខាងក្រោម៖ - ចក្ខុវិស័យបរិស្ថាន និងថាមពលជាសកល (Global Environment and Energy Vision Forum) - បទបង្ហាញ និងវឌ្ឍនភាពលើការគ្រប់គ្រងទឹកទឹកកខ្វក់ និងសំណល់រឹង - កិច្ចពិភាក្សាពិគ្រោះយោបល់លើគម្រោងពាក់ព័ន្ធដោយឡែក (Project Briefing 1:1) និងកាលានុវត្តភាពស្នើគម្រោងជំនួយបច្ចេកទេស គម្រោងសិក្សា និងការទាក់ទាញអ្នកវិនិយោគិនពីប្រទេសកូរ៉េ តាមវិស័យ និងជំនាញ ក្នុងនោះតំណាងក្រសួងសាធារណការ និងដឹកជញ្ជូន បានធ្វើបទបង្ហាញចែករំលែកដល់អ្នកចូលរួមមកពីបណ្តាប្រទេសនានា ទាក់ទងទៅនឹងគោលនយោបាយគ្រប់គ្រងទឹកកខ្វក់ក្នុងព្រះរាជាណាចក្រកម្ពុជា គម្រោងពាក់ព័ន្ធទឹកកខ្វក់ និងបរិស្ថានដែលកំពុងសិក្សា ព្រមទាំងគម្រោងដែលកំពុងស្នើសុំហិរញ្ញប្បទានពីដែគូអភិវឌ្ឍន៍នានា ៕