ភ្នំពេញ ៖ បន្ទាប់ពីសាឡង់ដឹកខ្សាច់ បើកបុកស្ពានព្រែកតាមាក់ កាលពីប៉ុន្មានថ្ងៃមុនោះ ឥឡូវសាឡង់ដឹកប្រេង បានបុកប៉ះទង្គិចស្ពានបេឡេឫស្សីកែវ នៅល្ងាចថ្ងៃទី១០ ខែកញ្ញា ឆ្នាំ២០១៩ ហើយស្ពានត្រូវបានផ្អាក ឲ្យធ្វើចរាចរជាបណ្តោះអាសន្នសិន។ យោងតាមហ្វេសប៊ុក របស់ក្រសួងមន្ទីរ សាធារណការរាជធានីភ្នំពេញ បានឲ្យដឹងនៅថ្ងៃទី១១ កញ្ញាថា “ស្ពានបេឡេឫស្សីកែវ ត្រូវបានផ្អាកឲ្យធ្វើចរាចរជាបណ្តោះអាសន្ន បន្ទាប់ពីមានឧបទ្ទេវហេតុកើតឡើង បង្កដោយសាឡង់ដឹកប្រេង បុកប៉ះទង្គិចនៅវេលាម៉ោង ១៥និង១នាទីរសៀល ថ្ងៃទី១០ខែកញ្ញា ឆ្នាំ២០១៩ម្សិលមិញ”។ ភ្លាមៗបន្ទាប់ពីកើតហេតុ ក្រុមការងារជំនាញ បានចុះពិនិត្យ និងសិក្សា ដើម្បីធ្វើការជួសជុលបន្ទាន់ ដែលនឹងដាក់ឲ្យដំណើរការ ចរាចរឡើងវិញ នៅប៉ុន្មានថ្ងៃខាងមុខ។ ក្រសួងក៏បានឲ្យប្រជាពលរដ្ឋយោគយល់ ចំពោះការផ្អាកចរាចរលើស្ពានបេឡេ ជាបណ្តោះអាសន្ននេះ ៕