ភ្នំពេញ៖ផ្លូវបេតុងឡើងភ្នំអានសេះ ស្ថិតក្នុងស្រុកជាំក្សាន្ត ខេត្តព្រះវិហារប្រវែង ១២០ម ទទឹង ៩ម ចាប់ពីគ.ម ២+០០០ ដល់២+១២០ ត្រូវបានខូចខាត ដោយភ្លៀងធ្លាក់ខ្លាំង ចំនួនបួនថ្ងៃជាប់ៗគ្នា បានបង្កទៅជាជំនន់ទឹកភ្លៀង ហូរច្រោះផ្លូវ ដែលធ្វើឱ្យមានការស្រុតបាក់ នៅថ្ងៃទី៥ខែ កញ្ញា ឆ្នាំ ២០១៩ ។ នេះបើយោង តាមបណ្ដាញសង្គមហ្វេសប៊ុក របស់ក្រសួងសាធារណការ។ ក្រសួងសាធារណការ និងភាគីពាក់ព័ន្ធ កំពុងតែយកចិត្តទុកដាក់ ក្នុងកិច្ចការជួសជុលឡើងវិញ នៅកំណាត់ផ្លូវដែលរងការខូចខាតនេះ ដើម្បីសម្រួលចរាចរណ៍ ជូនបងប្អូនប្រជាពលរដ្ឋ។ សូមបញ្ជាក់ដែរថាប៉ុន្មានថ្ងៃនេះប្រទេសកម្ពុជា បានទទួលរងឥទ្ធិពលព្យុះជាប់ៗគ្នា ធ្វើឱ្យមានភ្លៀងធ្លាក់បន្តបន្ទាប់ឥតឈប់ឈរ ដែលកំពុងគំរាមកំហែងដល់ផ្លូវមួយចំនួន នៅក្នុងប្រទេសកម្ពុជា អាស្រ័យហេតុនេះ សូមបងប្អូនប្រជាពលរដ្ឋមេត្តាអធ្យាស្រ័យ និងមានការប្រុងប្រយ័ត្ន៕