ថ្ងៃសៅរិ៍ ១០កើត ខែស្រាពណ៍ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី១០ ខែសីហា ឆ្នាំ២០១៩ ឯកឧត្តមទេសរដ្ឋមន្ដ្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំក្រុមមន្ដ្រីជំនាញក្រោមឱវាទក្រសួង អមដំណើរឯកឧត្តមឧបនាយករដ្ឋមន្ដ្រី ជា សុផារ៉ា រដ្ឋមន្ដ្រីក្រសួងរៀបចំដែនដី នគរូបនីយកម្ម និងសំណង់ អញ្ជើញចុះពិនិត្យមើលស្ថានភាពទឹកជំនន់ទឹកភ្លៀង និងប្រព័ន្ធប្រឡាយបង្ហូរទឹកចេញពីក្រុង ព្រះសីហនុ ដោយមានការចូលរួមពីអាជ្ញាធរដែនដី មន្ទីរពាក់ព័ន្ធ និងថ្នាក់ដឹកនាំក្រសួងផងដែរ។ សូមជម្រាបជូនថា បន្ទាប់ពីភ្លៀងធ្លាក់ជោគជាំអស់រយៈពេលជាច្រើនថ្ងៃកន្លងមកនេះ បានធ្វើឱ្យក្រុងព្រះសីហនុ ទទួលរងនូវការគំរាមកំហែងដោយទឹកភ្លៀង បង្កជាគ្រោះទឹកជំនន់យ៉ាងធ្ងន់ធ្ងរ ធ្វើឱ្យប្រព័ន្ធហេដ្ឋារចនាសម្ព័ន្ធផ្លូវថ្នល់ផ្សេងៗ ត្រូវបានខូចខាតយ៉ាងដំណំ។ ថ្លែងនៅក្នុងឱកាសចុះពិនិត្យស្ថានភាពទឹកជំនន់នាពេលនោះ ឯកឧត្តមទេសរដ្ឋមន្ត្រី បានគូសបញ្ជាក់ថាក្រសួងសាធារណការ និងដឹកជញ្ជូនត្រៀមសហការជាមួយក្រសួងស្ថាប័នពាក់ព័ន្ធ ដើម្បីបញ្ចេញគ្រឿងចក្រក្នុងការដោះស្រាយកាយប្រព័ន្ធលូដែលកកស្ទះឱ្យបានធំ ងាយស្រួលរំដោះទឹកចេញពីទីក្រុងឱ្យបានឆាប់ ដែលបានបង្កផលប៉ះពាល់ធ្ងន់ធ្ងរដល់ផ្លូវថ្នល់ កកស្ទះចរាចរណ៍ និងពិបាកធ្វើដំណើររបស់ប្រជាពលរដ្ឋ។ សូមបញ្ជាក់ផងដែរថា ស្ថានភាពទឹកជំនន់នៅក្រុងព្រះសីហនុ បង្កឡើងដោយបរិមាណទឹកភ្លៀងច្រើនលើសលប់ ធ្វើឲ្យប្រព័ន្ធប្រឡាយបង្ហូរទឹកមានការកកស្ទះដោយសារសម្រាម អូរនិងប្រឡាយធម្មជាតិកាន់តែរាក់ទៅ ៕