ភ្នំពេញ៖ លោក គួច ចំរើន អភិបាលខេត្តព្រះសីហនុ នៅព្រឹកថ្ងៃទី៦ សីហានេះបានចុះពិនិត្យ ការជួសជុលបន្ទាន់ត្រង់ចំណុចស្ពានអូគគីរ ដែលមានករណីទឹកហូរច្រោះ បាក់ក្បាលស្ពានដើម្បីទប់ស្កាត់ ការកើតមានគ្រោះថ្នាក់ជាយថាហេតុ និងអំពាវនាវដល់អ្នកបើកបរយោគយល់ បន្ថយលឿនត្រង់ចំណុចនេះផងដែរ។ លោក គួច ចំរើន បានសរសរលើបណ្ដាញសង្គមហ្វេសប៊ុកថា “ព្រឹកនេះ បានចុះពិនិត្យ ការជួសជុលបន្ទាន់ របស់ក្រុមការងារក្រសួងសាធារណៈការ និងដឹកជញ្ជូន សហការជាមួយគណៈបញ្ជាការ ឯកភាពរដ្ឋបាលស្រុកកំពង់សីលា ត្រង់ចំណុចស្ពានអូគគីរ (ព្រំប្រទល់ខេត្តកំពង់ស្ពឺ) ចន្លោះ គីឡូម៉ែត្រ ១០៦-១០៧ ក្នុងភូមិស្ទឹងច្រាល ឃុំអូរបាក់រទេះ ស្រុកកំពង់សិលា ខេត្តព្រះសីហនុ ដែលមានករណីទឹកហូរច្រោះ បាក់ក្បាលស្ពានផ្នែកខាងជើង និងស៊ីរូងដីចូលទ្រូងផ្លូវប្រវែង១ម៉ែត្រ ដើម្បីទប់ស្កាត់ការកើត មានគ្រោះថ្នាក់ជាយថាហេតុ ជាពិសេសការពារសុវត្ថិភាព ដល់បងប្អូនប្រជាពលរដ្ឋអ្នកធ្វើដំណើរឆ្លងកាត់” ។ អភិបាលខេត្តព្រះសីហនុបញ្ជាក់ថា “ចរាចរណ៍ផ្លូវជាតិលេខ៤ ចាប់ពីព្រំប្រទល់ ខេត្តកំពង់ស្ពឺ ដំណើរការជាធម្មតា តែសូមអ្នកបើកបរយោគយល់បន្ថយលឿន ត្រង់ចង់ចំណុចនេះ និងគោរពច្បាប់ចរាចរណ៍ទាំងអស់គ្នា។ ជូនពរសំណាងល្អ និងមានសុវត្ថិភាពពេលបើកបរ៕