ថ្ងៃពុធ ១៥រោច ខែអាសាឍ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី៣១ ខែកក្កដា ឆ្នាំ២០១៩ នៅទីស្តីការក្រសួងសាធារណការ និងដឹកជញ្ជូន ឯកឧត្តមទេសរដ្ឋមន្ត្រី ស៊ុន ចាន់ថុល បានទទួលជួបសំណេះសំណាលជាមួយមន្ដ្រីរាជការក្រសួងសាធារណការ និងដឹកជញ្ជូន ដែលជាក្រុមនិស្សិតជ័យលាភីអាហារូបករណ៍ទៅសិក្សានៅប្រទេសជប៉ុន និងសាធារណរដ្ឋកូរ៉េ ក្នុងឆ្នាំសិក្សា២០១៩ -២០២២ ដោយមានការចូលរួមពីមន្ត្រីជាន់ខ្ពស់ក្រសួង។ ការជួបសំណេះសំណាលនេះមានគោលបំណងទទួលបានអនុសាសន៍ ណែនាំ ក៏ដូចជាបទពិសោធន៍ល្អៗពីឯកឧត្តមទេសរដ្ឋមន្ត្រីមុនពេលធ្វើដំណើរទៅសិក្សានៅក្រៅប្រទេសចំនួន០៣រូប ក្នុងនោះមាន ថ្នាក់បណ្ឌិតចំនួន ០១រូប និងថ្នាក់បរិញ្ញាបត្រជាន់ខ្ពស់ចំនួន ០២រូប ដែលនឹងត្រូវចេញដំណើរទៅសិក្សាលើមុខវិជ្ជាវិទ្យាសាស្ត្រសង្គមនៅចុងខែសីហា និងខែកញ្ញា ឆ្នាំ២០១៩ នេះ។ ឯកឧត្ដមទេសរដ្ឋមន្ត្រីបានគូសបញ្ជាក់ថា៖ សុខសន្តិភាព និងស្ថេរភាពនយោបាយដ៏រឹងមាំ ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កម្ពុជាអាចរក្សាស្ថិរភាពម៉ាក្រូសេដ្ឋកិច្ច ស្ថិរភាពអត្រាប្តូរប្រាក់ សិទ្ធិស្មើភាពគ្នាក្នុងការវិនិយោគ រំហូរទេសចរណ៍បរទេសបង្កើតការងារធ្វើ និងប្រាក់ចំណូលប្រជាពលរដ្ឋ និងឱកាសកសាងហេដ្ឋារចនាសម្ព័ន្ធរូបវន្ត ជាកត្តាជំរុញកំណើនសេដ្ឋកិច្ចយ៉ាងសំខាន់។ ឯកឧត្ដមទេសរដ្ឋមន្ត្រីបានបន្ថែមថា៖ បច្ចុប្បន្នវិនិយោគិនជប៉ុនកំពុងហូរចូលកម្ពុជាជាបណ្តើរៗជាការដាក់ទុនរយៈពេលវែង ជាការវិនិយោគនាំនូវបច្ចេកវិទ្យាកម្រិតខ្ពស់ របៀបដឹកនាំរបស់ក្រុមហ៊ុនល្អ និងបានសំណូមពរឱ្យក្រុមនិស្សិតជួយទាក់ទាញវិនិយោគិនជប៉ុន និងកូរ៉េ មកវិនិយោគនៅកម្ពុជាបន្ថែមទៀត ជួយផ្សព្វផ្សាយផលិតផលកម្ពុជា និងបានលើកឡើងអំពីកំណែទម្រង់ស៊ីជម្រៅដើម្បីកាត់បន្ថយចំណាយផ្លូវការ និងក្រៅផ្លូវការដើម្បីទាក់ទាញវិនិយោគិន។ ជាមួយគ្នានេះ ឯកឧត្តមទេសរដ្ឋមន្ត្រី ក៏បានគូសបញ្ជាក់ផងដែរអំពី៖ ការខិតខំប្រឹងប្រែងរបស់ក្រសួង ក្នុងការបំពេញការងារបម្រើសេវាចាំបាច់ឱ្យបានល្អជូនប្រជាពលរដ្ឋប្រកបដោយភាពជឿជាក់ ធ្វើបានលឿន មានប្រសិទ្ធភាព និងតម្លាភាព ដែលក្នុងនោះរួមមាន ការបង្កើតមណ្ឌលប្តូរ និងពន្យារបណ្ណបើកបរ ការផ្តល់សេវាត្រួតពិនិត្យលក្ខណៈបច្ចេកទេសយានយន្តនៅទូទាំងប្រទេស ដើម្បីបង្វិតសេវាឱ្យកៀកទៅនឹងប្រជាពលរដ្ឋ។ ជាទីបញ្ចប់ ឯកឧត្តមទេសរដ្ឋមន្ត្រី ស៊ុន ចាន់ថុល បានផ្តាំផ្ញើឱ្យក្មួយៗនិស្សិតខិតខំរៀនសូត្របន្ថែមដើម្បី ត្រឡប់មកវិញបម្រើស្ថាប័នជាតិ បង្កើតទំនាក់ទំនងល្អក្នុងចំណោមមិត្តភក្តិជានិស្សិតដើម្បីប្រយោជន៍ជាតិ ធ្វើអំពើល្អដើម្បីមុខមាត់ជាតិមាតុភូមិ ជួយផ្សព្វផ្សាយអំពីការរីកចម្រើនរបស់ប្រទេសជាតិឱ្យគេបានដឹង ជាពិសេសឆ្លៀតឱកាសស្វែងយល់ពីវប្បធម៌និងការរីកចម្រើនរបស់ប្រទេសជាតិគេ ដើម្បីទទួលបទពិសោធន៍ល្អៗយកមកបន្តវេនដឹកនាំអភិវឌ្ឍជាតិ យើងឱ្យកាន់តែមានការរីកចម្រើនថែមទៀត៕