[I Share Today] - ន៎ុះ រដ្ឋមន្ត្រីសាធារណការ ដកមន្ត្រីត្រួតពិនិត្យបច្ចេកទេស៦នាក់ចោលដូចកូនស្ពៃ ដោយសារតែធ្វើផ្លូវគ្មានគុណភាព
2019-07-26
ទៅកាន់ទំព័រចុះផ្សាយក្នុង I Share Today
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន សម្រេចដកមន្ត្រីគម្រោង៦នាក់ ដែលកំពុងត្រួតពិនិត្យ និងគ្រប់គ្រងការងារស្ថាបនាលើកំណាត់ផ្លូវជាតិលេខ៧ ក្នុងខេត្តត្បូងឃ្មុំ ក្រោយរកឃើញថាផ្លូវដែលទើបសាងសង់រួចនេះ ចាប់ផ្ដើមខូចជាបណ្ដើៗទៅហើយ។
ការដកនេះធ្វើឡើងក្រោយ លោក ស៊ុន ចាន់ថុល បានជិះកង់ត្រួតពិនិត្យលើកំណាត់ផ្លូវលេខ ៧នេះ កាលពីថ្ងៃទី២៤ ខែកក្កដា ម្សិលមិញ។ ហើយលោកបានរកឃើញថា ការសាងសង់មិនមានគុណភាព ព្រោះកន្លែងខ្លះបានប្រេះកៅស៊ូ ឡើងស្រកានាគ ដែលត្រូវប៉ះ និងជួសជុលជាច្រើនកន្លែង។ លោកក៏បានតម្រូវឲ្យក្រុមហ៊ុនសាងសងចិននោះ ជួសជុល និងកែលម្អឡើងវិញ ទើបលោកព្រមទទួលយក។
លោកបាននិយាយដូច្នេះថា៖«មន្ត្រីទាំងនេះ ដែលចូលរួមជាមួយគេ ក៏ត្រូវតែតាមដាន ធ្វើរបាយការណ៍ ឬបញ្ឈប់កុំឲ្យសាងសង់បន្ត ប្រសិនបើឃើញថាគាត់សាងសង់ខុសបច្ចេកទេស។ មន្ត្រីម្នាក់ប្រាប់ខ្ញុំថា បានប្រាប់គេដែរតែគេមិនព្រមឈប់ យើង ជាអ្នកត្រួតពិនិត្យ ប្រាប់មកក្រសួង យើងនឹងបញ្ជាឲ្យបញ្ឈប់ភ្លាម។ គាត់ប្រាប់ថា ប្រាប់គេដែរតែគេមិនព្រមឈប់ ហើយម៉េចទៅជាអ៊ីចឹង យើងមានសិទ្ធិ ផ្អាកកាដ្ឋានភ្លាម»។
លោក វ៉ាស៊ឹម សុរិយា អ្នកនាំពាក្យក្រសួងសាធារណការ បានឲ្យដឹងថា អ្នកទាំង៦រូបនោះ ជាមន្ត្រីគម្រោងផ្នែកប្រឹក្សាយោបល់នៃក្រុមហ៊ុនកូរ៉េ ដែលទទួលបានសិទ្ធិក្នុងការត្រួតពិនិត្យលើគុណភាព។ មន្ត្រីគម្រោងដែលក្រសួងសម្រេចចិត្តដកនោះរួមមាន ប្រធានទីប្រឹក្សាបច្ចេកទេស ១រូប អនុប្រធានទីប្រឹក្សាបច្ចេកទេស១រូប និង សមាជិកទីប្រឹក្សាបច្ចេកទេស៤រូប ព្រោះអ្នកទាំងនោះមិនបានគោរពតួនាទីរបស់ខ្លួនក្នុងការត្រួតពិនិត្យលើក្រុមហ៊ុនសាងសង់ និងមិនរាយការណ៍ពីបញ្ហាទៅក្រសួង ដើម្បីចាត់វិធានការនោះទេ។
លោកបាននិយាយថា៖«កាលណាយើងមិនស្ដាប់បញ្ជា និងការណែនាំរបស់ក្រសួង ដូច្នេះយើងដកចោលទៅ ព្រោះនេះជាសិទ្ធិសម្រេចរបស់ក្រសួង។ ទី២ ពួកគាត់មិនបាននៅជាប់លាប់ជាមួយនឹងអ្នកម៉ៅការសំណង់។ ទី៣ គាត់តែងតែមានលេសដោះសារលើបញ្ហាសាងសង់»។
លោកបន្តថា ក្រសួងបានតម្រូវឲ្យក្រុមហ៊ុនសាងសង់ត្រូវតែជួសជុល និងកែលម្អផ្លូវឡើងវិញ ទៅតាមកិច្ចសន្យា ដែលក្រសួង និងក្រុមហ៊ុនបានចុះហត្ថលេខាជាមួយគ្នា។
ក្រុមហ៊ុនចិន ជាអ្នកទទួលបានសិទ្ធិក្នុងការសាងសង់ និងក្រុមហ៊ុនកូរ៉េ ជាអ្នកត្រួតពិនិត្យគុណភាព នៃការសាងសង់លើផ្លូវជាតិលេខ៧នោះ។
ផ្លូវជាតិលេខ៧នេះ មានប្រវែងជាង៤៦០គីឡូម៉ែត្រ ត្រូវបានសាងសង់ទៅជាប្រភេទបេតុងកៅស៊ូ (AC) ដែលគិតចាប់ពីស្គន់ ផ្លូវជាតិលេខ៦ (PK ៧៥+០០០) ដល់ត្រពាំងគ្រៀល (ព្រំដែនកម្ពុជា-ឡាវ) ដែលបានចំណាយថវិកាអន្តរជាតិជិត៧0លានដុល្លារ។
ត្រង់បង្គោលគីឡូម៉ែត្រលេខ PK136 – PK300 ជាគម្រោង RAMP II ក្រោមហិរញ្ញប្បទានពីធនាគារពិភពលោកក្នុងទឹកប្រាក់ជាង៣៦លានដុល្លារ និងចាប់ពីបង្គោលគីឡូម៉ែត្រលេខ PK332.125 – PK424.690 ជាជំនួយឥតសំណងរបស់រដ្ឋាភិបាលចិនក្នុងទឹកប្រាក់ជាង៣៣ លានដុល្លារអាមេរិក៕
