ឯកឧត្តមទេសរដ្ឋមន្ត្រី ស៊ុន ចាន់ថុល បានអញ្ជើញវេរទៀនព្រះវស្សាប្រគេនព្រះសង្ឃចំនួន៤០វត្ត ឋិតក្នុងស្រុកកោះធំ ខេត្តកណ្តាល --- ថ្ងៃអង្គារ ១៥កើត ខែអាសាឍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៦ ខែកក្កដា ឆ្នាំ២០១៩ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន និងជាប្រធានគណៈអចិន្ត្រៃយ៍គណៈពង្រឹងមូលដ្ឋានស្រុកកោះធំ បានអញ្ជើញដឹកនាំក្រុមការងារ ព្រមទាំងពុទ្ធបរិស័ទចំណុះជើងវត្ត ហែទៀនព្រះវស្សា ដើម្បីប្រគេនព្រះសង្ឃដែលនឹងគង់ចាំព្រះវស្សារយៈពេលត្រីមាសចំនួន ៤០វត្ត នៅស្រុកកោះធំ ខេត្តកណ្តាល ដោយមានការនិមន្តចូលរួមពីព្រះសង្ឃ ថ្នាក់ដឹកនាំ មន្ត្រីរាជការ និងពុទ្ធបរិស័ទចំណុះជើងវត្តជាច្រើនអង្គ/នាក់ផងដែរ។ កម្មវិធីនេះបានប្រារព្ធឡើងនៅវត្តព្រែកតាដួង ស្ថិតនៅក្នុងឃុំព្រែកថ្មី ស្រុកកោះធំ ខេត្តកណ្ដាល ដើម្បីរួមចំណែកប្រគេនទេយ្យវត្ថុ គ្រឿងឧបភោគបរិភោគ គ្រឿងបរិក្ខាប្រគេនព្រះសង្ឃ សម្រាប់ប្រើប្រាស់អំឡុងពេលគង់ចាំព្រះវស្សារយៈពេលត្រីមាស តាមពុទ្ធបញ្ញត្តិ ក៏ដូចជាដើម្បីឧទ្ទិសបុណ្យកុសលផលបុណ្យនេះ ជូនដល់បុព្វការីជនដែលបានចែកឋានទៅកាន់បរលោក ព្រមទាំងជូនមហាកុសលដល់បងប្អូនប្រជាពលរដ្ឋខ្មែរទាំងអស់ឱ្យជួបតែសេចក្តីសុខ សេចក្តីចម្រើនគ្រប់ប្រការ។ ទន្ទឹមនឹងការប្រគេនទេយ្យវត្ថុ គ្រឿងឧបភោគបរិភោគ និងគ្រឿងបរិក្ខា ក្រុមការងារដឹកនាំដោយឯកឧត្ដមទេសរដ្ឋមន្ត្រី ក៏បានប្រគេនបច្ច័យជូនវត្តទាំង៤០ និងព្រះសង្ឃដែលបាននិមន្តចូលរួមក្នុងកម្មវិធីនោះផងដែរ ដោយក្នុងមួយវត្តៗ ទទួលបានបច្ច័យចំនួន៤០ម៉ឺនរៀល និង១០០ដុល្លារ។ ដោយឡែក វត្តព្រែកតាដួងដែលជាកន្លែងប្រារព្ធពិធីទទួលបានបច្ច័យ ១លានរៀល និង៤១០ដុល្លារបន្ថែមទៀត។ រីឯព្រះសង្ឃដែលបាននិមន្តចូលរួមក្នុងកម្មវិធីនោះ ទទួលបានបច្ច័យចំនួន១០ម៉ឺនរៀលក្នុងមួយអង្គ៕ 16/07/2019-ឯកឧត្តមទេសរដ្ឋមន្ត្រី ស៊ុន ចាន់ថុល វេរទៀនព្រះវស្សាចំន 33 Photos